S’idrògenu intrat a su benidore energèticu fintzas de sa Sardigna. Agiuadu, comente  àteras fontes lìmpias, de su Pranu de Ripresa e Resilièntzia, at tentu su parre positivu de sa Regione pro impiantos de fraigare in sas àreas industriales serradas. Sas tapas imbenientes tapa sunt sos bandos pùblicos pro finantziare sos traballos. “Amus a predispònnere unu bandu pro sa presentada de sas manifestatziones de interessu pro s’atzessu a sos fundos pro sa produtzione de idrògenu birde, prodùidu cun fontes energèticas rennoaditzas” ispiegat s’Assessora a s’Indùstria, Anita Pili. Sa Regione at adotadu una deliberatzione respetende s’avisu chi su Ministeru de sa Transitzione ecològica at publicadu in ghennàrgiu pro sas Regiones. Su passàgiu a sa produtzione de idrògenu birde, in realidade, est sa punna de unu pianu prus articuladu, bidu su ligàmine istrintu cun sos pranos de decarbonizatzione de s’Ue. Si tratat de ricunvertire in sos vàrios Paisos, sistemas de alimentatzione energètica de sas fontes fòssiles a s’idrògenu chi non luat. Dae unos cantos mese in Itàlia s’est mòvida fintzas sa Regione Abrutzu.

Sa Regione- agiunghet s’assessora Pili- at identificadu s’idrògenu comente  vetore istratègicu in su Pranu energèticu ambientale regionale suo pro su 2015-2030 (Pears) e s’atzessu a su bandu diat ofèrrere s’oportunidade de aviare sa realizatzione de un’economia suportada dae custa fonte . Su cuadru regionale de àreas dismissas, in sa carta, favorit una sìmile programatzione ma est a bìdere in su cuncretu comente  s’at a articulare a pustis de s’emissione de sos bandos pùblicos. B’at medas sitos cun territòrios idòneos pro s’isvilupu de progetos in iscala locale e una tzerta densidade de impiantos de produtzione de energia elètrica. S’idrògenu birde diat dèvere sostituire cantidades mannas de ògiu combustìbile a su presente impreadu in sos giassos in atividade. Si faeddat de àmbitos territoriales “chi diant pòdere favorire sa sinergia intre sos vàrios setores energèticos, bilantziende s’impreu de energia elètrica e gas e favorire s’integratzione e s’isfrutamentu in loco de sa produtzione chi benit dae sas rennoaditzas” ispiegat ancora s’Assessora Pili. Sos impiantos noos, ultres a sos eletrolizadores — coro de su sistema de produtzione- ant a dèpere èssere progetados cun critèrios de acùmulu de s’energia prodùida e impiantos de immagasinamentu in favore de sos territòrios. Parte importante in s’iter progetuale e autorizativu est sa sostenibilidade ambientale. At a bisongiare averguare in cuncretu comente ant a èssere aplicados custos printzìpios chi non petzi in Sardigna sunt istados impreados pro meda tempus in modu istrumentale pro blocare progetos subra sas fontes alternativas. Giai  dae printzìpiu su protzessu industriale pro otènnere idrògenu birde tenet costos artos. In ogni manera su guvernu in s’avisu a sas Regiones at fissadu in manera giusta tempos istrintos pro sos impiantos industriales benidores: s’ant a dèpere concruire intro su 31 de mese de idas de su 2025.

 “Progetto finanziato con l’Avviso Pubblico IMPRENTAS annualità 2021-2022”

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22