A pustis de su primu ultrà arrestadu a s’incras de sa gara, como sunt istados acapiados un’òmine de 44 annos e unu de 37, acusados de resistèntzia e violèntzia a pùblicu ufitziale e possessu de ogetos pro ofèndere. Sos atzertamentos fatos dae sa Digos de Casteddu ant permìtidu de identificare sos arrestados gràtzias a sas ripresas de sas telecàmeras. Su de 45 annos cun in manu unu fuste sotaiat sos àteros tifosos a s’esternu de s’istàdiu a agredire sas fortzas de s’òrdine. Su de 37 annos, imbetzes, est istadu filmadu collende de terra bidros, ampullas e pedras pro las iscùdere a sos aversàrios e agentes de politzia.

Sa faina investigativa no est galu concruida. Sa Digos de su cabulogu sardu, in collaboratzione cun sos collegas de Nàpolu, est traballende pro identificare cantu prus tifosos partenopeos chi ant chircadu de fortzare su cordone de politzia a s’internu de s’istàdiu pro andare a agredire sos sustenidores de su Casteddu. Su matessi pro sos tifosos de su Nàpoli chi ant partetzipadu a su corteu no autorizadu fatu sos caminos tzitadinos, aboghinende contra sos aversàrios e sa tzitade.

Totus ant a èssere denuntziados pro “manifestatzione non preavisada e radunada seditziosa”. In sos cunfrontos de sos sustenidores casteddajos e partenopeos chi ant a èssere denuntziados ant a iscatare fintzas sos Daspo emìtidos dae su cuestore de Casteddu.

Una partida bella meda cussa giogada in s’Unipol Domus tra su Casteddu e su Nàpule.

Su puntègiu finale no at satisfatu nisciuna de sas duas iscuadras, mescamente su Casteddu, chi diat àere meritadu sa vitòria. Un’ispetàculu feu imbetzes cuddu andadu in iscena a s’agabbu de sa partida dae banda de sas duas tifoserias. Sos ultrà partenopeos, a pustis de su “corteu” de su merie acanta ant provocadu sa tifoseria ruja-blu intentadu un’atacu in sa sede de s’Unione Sarda (sena nche resèssere) e insulladu sa tzitade chi los ospitaiat,  si sunt betados contra sa Politzia intervènnida in assetu antidisturbu.

 “Progetto finanziato con l’Avviso Pubblico IMPRENTAS annualità 2021-2022”

Tribulìa in sa plaja in Casteddu: piccioccu de seighi annos agattadu mortu pustis de una festa a denotte.

Un festa in atta ‘e mare est finida in sa manera pius drammatiga. Est ancora imboddicada in su misteru sa morte de Mariano Olla, 16 annos, naschidu in Casteddu, ma chi dae carchi annu bistaiat in Sestu, su corpus de su cale est bistadu acciappidu a s’arbeschida de dominiga 15 de lampadas in sa plaja intre su portu de Su Siccu e sa passizzada scalu de Sant’Elia.

A iscoperrere su corpus, a deghe metros dae sa riva, sunt bistados piscadores e zente chi faghiat su bagnu in cussu logu. In presse meda sunt arrivados sos Viglies de su Fogu po su recuberu de su corpus, sighidu dae s’arribu de sa politzia e de su 118, chi ant potidu solu cunfirmare chi su zovanu fit mortu. Su piccioccu teniat ancora sas iscarpas e sos pantalones curtzos, ma non teniat sa maglia. No presentaiat sinzos de violentzia.

Secundu sos primos pensamentos, intre su notte bi diat essere bistada una festa propriu in cussa plaja pitticca e franta, pagu attesu dae su coro de sa “movida” de sos zovanos de su portu turisticu de Su Siccu. Addurat peroe de accrarare si Mariano esserat deabberu intre sos partetzipantes a sa festa e, si custu est beru, itte potat essere capitadu in sas oras imbenientes.

Sa plaja in sa cale est bistadu agattadu su corpus, una limba de rena pitticca in daesegus de su molu de su portu, si podet segudare dae una caminera de terra chi partit dae su parchizu Coro, su mattessi impittadu dae sos tiffosos po sas partidas a sa Unipol Domus, s’Istadiu de su Casteddu. A curtzu si agattant puru s’istadiu bezzu e su Lazzaretto. Sa Politzia at fattu partire sas scruccullas po accrarare sos motivos de sa morte. Sunt gia bistados iscurtados sos familiares de su piccioccu e si est chircande de torrare a fraigare sas urtimas oras de sa vida sua.

Unu puntu de fundamentu de s’iscrucculla at essere de cumprendere si su piccioccu si siat istesiadu a sa sola, si si siat intesu male, o si bi siant bistados elementos de arriscu in sa serana. At essere importante sa resessia de lotomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22