Sos protagonistas de custa istòria sunt duos: Federica Granai, 27 annos, e Simone Terreni, titulare de s’azienda informàtica de Empoli «VoipVoice». Federica chircat traballu, Simone l’oferit: chircat calicunu comente assistente a sa clientela. « A sa seletzione b’at diversos candidados – narat Terreni in unu post in Facebook- Pro intrare in VoipVoice tocat a fàghere duos collòchios e tres proas pràticas. Prus cussa finale cun megus. Issa superat totu sos ostàculos e a sa fine resurtat èssere sa mègius. Duncas sa responsàbile nostra de sas risursas umanas li comùnicat chi at a comintzare su perìodu de proa».

Est tando chi Federica pedit un’addòbiu nou cun Terreni e li cunfessat: «Pro curretesa prima de cumintzare ti naro chi so impedida…». A cuddu puntu arribbat sa risposta de s’imprendidore: «Totu inoghe? Est una bella meda noa ». Gasi Federica benit assùmida, sa tutora sua la sighit e la format e imparat  àteras cosas, a in antis de intrare a maternidade.

Proite Terreni at detzìdidu de contare custa istòria? «Ispero chi cussa mirada de timoria chi apo bidu in Federica, isparat dae sos ogros de totu sas fèminas chi devent comunicare a sos meres de traballu s’arribu de unu fìgiu. Ispero chi ogni fèmina, potzat tènnere sas matessi possibilidades de un’òmine in su mundu de su traballu. Ispero chi non si pedat mai prus a una fèmina, in unu collòchiu, si tenet fìgios o intentzione de nde fàghere. Ispero imbetzes chi sos  imprendidores siat cuntentos pro s’arribu de una vida noa. Ca unu pipiu non devet èssere mai unu problema».

«Est istadu su momentu prus bellu de sa vida mea – at contadu Federica a su giornalista chi lat intervistada a pustis chi s’istòria est essida a campu in sas retzas sotziales — Mi dia èssere pòdida tzitire e firmare su  cuntratu. Ma non mi pariat giustu. Fiat tropu mannu s’oportunidade chi mi beniat oferta e non cheria traìghere sa fidùtzia de chie at crèidu in mene: de Simone e de totus sos àteros. In una sotziedade in ue s’intendet nàrrere medas bortas chi ancora oe sas fèminas devent seberare sa carriera o sos fìgios, deo apo tentu timoria, l’ammito, ma  pro fortuna custa borta no est andada gasi!».

 “Progetto finanziato con l’Avviso Pubblico IMPRENTAS annualità 2021-2022”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22