Tenet 17 annos ebbia su primu e prus giòvanu pilota sardu a su Campionadu italianu GT. Lorenzo Cossu, naschidu in Assèmini, at a rapresentare sa S.R.&R.-Iscuderia Ravetto & Ruberti srl in sos campionados italianos Gt 2022 classe Endurance e at a ghiare una Ferrari 488 Challenge EVO, una màchina de cursa cun unu motore turbo, V8 de 3,9 litros e 670 CV.

Istudiante de s’Istitutu Tècnicu “Dionigi Scano” de Casteddu cun indiritzu mecatrònica-energia, at comintzadu a fàghere sas garas cando teniat 9 annos. Sa prima tapa at a èssere sa de su 15 de maju in s’autòdromu de Pergusa in Sitzìlia, posca su 17 de trìulas in su Mugello in Toscana, su 18 cabudanni in sa pista de Vallelunga e su 9 de santugaine in Monza.

S’iscuderia SR&R est istada fundada in su 2017 de Manfredi Ravetto e Paolo Ruberti, e tenet sa base sua a Verona.

Lorenzo Cossu, 17 annos, est su pilota sardu prus giòvanu a partetzipare a su Campionadu italianu Gran Turismo, classe Endurance.

Su primu donu est istadu unu go-kart a pedales, cun su cale giraiat intre sos parcos de Assèmini, a inghìriu de Casteddu. Ma Lorenzo Cossu giai a ses annos ischiat ite cheriat devènnere: unu pilota professionista. Pro custu su go-kart fiat giai a motore. A noe annos partètzipat a sas primas garas amatoriales, mentras dae su 2014 s’allenat in modu  istàbile in su kartòdromu Skindoor de Muristeni. Inoghe at comintzadu a s’ammaniare pro cumpètere in sos campionados italianos, binchende su campionadu in su 2019, cun tantu de gala de premiatzione in sa sede de su Conos in Roma. In mesu su Covid, chi l’at impedidu de cùrrere pro prus de un’annu pro posca torrare a cumentzare in s’agabbu de su 2021.

Su programma. Primu apuntamentu su 15 de maju in s’autòdromu de Pergusa in Sitzìlia, posca su 17 de trìulas in su Mugello in Toscana, su 18 cabudanni in sa pista de Vallelunga e su 9 de santugaine in Monza. Un’apuntamentu chi s’annu coladu est istadu sighidu dae in prus de 73 mìgia ispetadores e sighida de 52 emitentes televisivas, 13 regiones e 100 oras de trasmissiones cumplessivas.

Unu gràtzias mannu andat mescamente a s’Iscuderia Ravetto & Ruberti srl, Elèt evento, Street Sardinia, Fundatzione de Sardigna, Asd Màster Driving Camp Guidare Sicuri, SKindoor & outdoor, Grupu Optima & Co., Spanu Bottarga e Simone Leinardi.

 “Progetto finanziato con l’Avviso Pubblico IMPRENTAS annualità 2021-2022”

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22