Su Project Financing est a su tzentru in custas dies de sa sanidade nugoresa pro s’inghitzu de un’àteru progetu importante. A dd’annuntziare est sa Asl in una nota: “Mancant sos ùrtimos detàllios a su cronoprogramma de sos traballos de sos cantieris, netzessàrios pro limitare a su màssimu eventuales discumbènios e crititzidades. In sos 36 meses imbenientes su Santu Frantziscu at  a devènnere un’ispidale a s’avanguàrdia”.

“Su project financing — sighit sa nota -, at a serrare a manera definitiva sa paràbola sua: pionierìstica, ammajadore e, a bias, gherrada”. S’Asl si referit a sos fatos giuditziàrios dèvidos a s’annullamentu in autotutela dae banda de s’ex cummissàriu istraordinàriu de s’Assl de Nùgoro, Mario Palermo, de su cuntratu firmadu dae s’assòtziu temporàneu de impresas (Ati), denumenada Polo Sanitàriu Sardigna Tzentrale — Sotziedade de Progetu s.p.a. (Pssc), acontèssidu in su 2016 a pustis de sos rilievos de s’Anac. Unu cuntratu istipuladu annos faghet e chi previdiat sa cuntzessione de sos traballos finalizados a sa ricualificatzione de sos presìdios ospedalieris de su distretu nugoresu, ultres a sa frunidura de totu sos servìtzios istrumentales non sanitàrios, de su balore de prus de unu milliardu de èuros pro sa durada de 27 annos.

Su Pssc aiat fatu denùntzia sa su Tribunale de Nùgoro cuntestende s’annullamentu de su cuntratu, e sighende a traballare. Duncas in 2018, sas ocurrèntzias de su project financing fiant istadas pigadas in manu dae sa diretora de s’Assl nugoresa, Grazia Cattina, chi cun unu traballu de grupu longu, suportada dae s’Àrea Tècnica Nùgoro-Lanusè e de s’Ufìtziu de su RUP de su Project Financing, aiat permìtidu sa ripresa de su diàlogu cun sa sotziedade e su cumpretamentu cunsighente de diversas importantes òperas cun s’achirimentu issoro.

A su matessi tempus chi sa diretzione de s’Assl sighiat cun sos traballos (si puru in su 2021 siat istada cummissariada in preparatzione de s’inghitzu de sa reforma sanitària noa), s’ex Cummissàriu istraordinàriu Ats, Massimo Temussi, a traessu de sos legales, at propostu a sa Pssc sa transatzione de un’acòrdiu deliberadu chi at prevìdidu su saldu a sa sotziedade de unu dèpidu pro sos traballos giai acumpridos, chi sunt istados licuidados, mentras sa sotziedade s’est impinnada a cumpletare sas òperas de edilìtzia pùblica intro 36 meses, e a s’agabbu essire dae sa gestione de sos servìtzios dados chi ant a èssere mandados in custa manera a gara noa.

Cun sa reforma sanitària e sa nàschida de s’Asl duncas, cussu cronoprogramma benit portadu a cumprimentu. “No esistet in s’ìsula Nostra un’ispidale cun sas caraterìsticas e sas potentzialidades de su Santu Frantziscu — at naradu su manager Paolo Cannas, chi no at mai cuadu s’apretzamentu suo pro s’ispidale prus mannu de su  Tzentru Sardigna -. E custu s’at a bìdere ancora de prus a traballos urtimados, cando a nde tènnere profetu at a èssere mescamente s’oferta sanitària, cun sa Meighina Nucleare, sos repartos rinnovados e modernos, de sa cale si podet giai bìdere s’anteprima in sos locales de su padillione DEA, Cardiologia — UTIC etc.”.

“Ma a tènnere profetu de su rinnovu — sighit concruit Cannas — at a èssere “s’umanizatzione” de sos ambientes ospedalieris. Mi refèrgios a totus cussos ispàtzios fintzas a immoe non impreados, chi ant a dare unu sentidu fintzas a s’intrada (hall) chi fintzas a como pariat tropu manna: ant a nàschere servìtzios cummertziales e de ristoratzione, ma fintzas de utilidade (comente a parruchieris), chi non s’agatant in perunu àteru ispidale de sa Sardigna, ma chi medas sardos ant tentu modu de apretziare in àteros ispidales– pùblicos e privados — de Itàlia e de Europa”.

 “Progetto finanziato con l’Avviso Pubblico IMPRENTAS annualità 2021-2022”

Sas Prendas Arkeològicas de Cràbas ant a èssere sas printzipales in Danimarca.

Unu pùbbricu meda e abbizosu at pigadu parte giòvia coladu a s’Istitutu italianu de Cultura de Copenaghen a s’addobiu dedicadu a sas prendas arkeològicas de Cràbas e a su Parcu arkeològigu naturale de su Sinis, cunfirmande s’interèssu forte internatzionale pro s’istòria e s’identidade de sa
Sardigna. S’initziativa, insertada in s’abbenimentu “Sardigna: s’istòria, sa trama” e fatta gràtzias a sa collaboratzione intre assòtzios culturales e
istitutziones, at rapresentadu una occasione importante de faveddu po bandire su patrimòniu sardu in fora de s’isula.

Sa serana at postu in lughe cantu siat importante contare sa Sardigna a foras de sos assettios regionales e natzionales, non solu comente logu turìsticu ma comente logu de tziviltades antigas, de iscobertas arkeològicas de importu internatzionale e de connottos culturales ancora arradigadas in manera funguda in su presente.

Po mesu de su contu de sos logos printzipales de su Sinis, dae Tharros a sa zura arkeològiga de Mont’e Prama, passande pro museos e logos chi
rappresentant s’iscrocca, su pùblicu danesu at pòtidu cumintzare unu viàzu ideale intre coladu e presente, cumprendinde su balore universale de unu
patrimòniu chi non apartenet solu a sa Sardigna ma a totu su cadinu de su Mediterràneu.

Accanta a s’arkeologia, logu meda est bistadu dedicadu fintzas a sas issidas artìstigas de oe, dae su tzinema a sas artes immaginativas fintzas a sa
mùsica, evidentziande comente sa cultura sarda non siat un’erèntzia cristallizzada in su tempus coladu ma una realidade bìva, capatze de si rennovare e faeddare cun su presente. Custu intrizu intre istòria e moda afortigat su nuntzu de una Sardigna chi cambiat, cabosa de sas raighinas suas e a su matessi tempus aberta a su mundu.

Abbenimentos comente custu dimustrant s’importu de sa cooperatzione intre istitutziones, assòtzios culturales in su fraigare caminos de balorizatzione cumpartzidos e chi durant. Leare sa cultura sarda a su forastigu cheret nàrrere difatis afortigare sos ligàmenes cun sas comunidades internatzionales, favoressere sa connoschèntzia pare-pare e dare unu contribbudu a una diplomàtzia culturael fundada subra su rispetu e s’iscàmbiu.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”