Su Project Financing est a su tzentru in custas dies de sa sanidade nugoresa pro s’inghitzu de un’àteru progetu importante. A dd’annuntziare est sa Asl in una nota: “Mancant sos ùrtimos detàllios a su cronoprogramma de sos traballos de sos cantieris, netzessàrios pro limitare a su màssimu eventuales discumbènios e crititzidades. In sos 36 meses imbenientes su Santu Frantziscu at  a devènnere un’ispidale a s’avanguàrdia”.

“Su project financing — sighit sa nota -, at a serrare a manera definitiva sa paràbola sua: pionierìstica, ammajadore e, a bias, gherrada”. S’Asl si referit a sos fatos giuditziàrios dèvidos a s’annullamentu in autotutela dae banda de s’ex cummissàriu istraordinàriu de s’Assl de Nùgoro, Mario Palermo, de su cuntratu firmadu dae s’assòtziu temporàneu de impresas (Ati), denumenada Polo Sanitàriu Sardigna Tzentrale — Sotziedade de Progetu s.p.a. (Pssc), acontèssidu in su 2016 a pustis de sos rilievos de s’Anac. Unu cuntratu istipuladu annos faghet e chi previdiat sa cuntzessione de sos traballos finalizados a sa ricualificatzione de sos presìdios ospedalieris de su distretu nugoresu, ultres a sa frunidura de totu sos servìtzios istrumentales non sanitàrios, de su balore de prus de unu milliardu de èuros pro sa durada de 27 annos.

Su Pssc aiat fatu denùntzia sa su Tribunale de Nùgoro cuntestende s’annullamentu de su cuntratu, e sighende a traballare. Duncas in 2018, sas ocurrèntzias de su project financing fiant istadas pigadas in manu dae sa diretora de s’Assl nugoresa, Grazia Cattina, chi cun unu traballu de grupu longu, suportada dae s’Àrea Tècnica Nùgoro-Lanusè e de s’Ufìtziu de su RUP de su Project Financing, aiat permìtidu sa ripresa de su diàlogu cun sa sotziedade e su cumpretamentu cunsighente de diversas importantes òperas cun s’achirimentu issoro.

A su matessi tempus chi sa diretzione de s’Assl sighiat cun sos traballos (si puru in su 2021 siat istada cummissariada in preparatzione de s’inghitzu de sa reforma sanitària noa), s’ex Cummissàriu istraordinàriu Ats, Massimo Temussi, a traessu de sos legales, at propostu a sa Pssc sa transatzione de un’acòrdiu deliberadu chi at prevìdidu su saldu a sa sotziedade de unu dèpidu pro sos traballos giai acumpridos, chi sunt istados licuidados, mentras sa sotziedade s’est impinnada a cumpletare sas òperas de edilìtzia pùblica intro 36 meses, e a s’agabbu essire dae sa gestione de sos servìtzios dados chi ant a èssere mandados in custa manera a gara noa.

Cun sa reforma sanitària e sa nàschida de s’Asl duncas, cussu cronoprogramma benit portadu a cumprimentu. “No esistet in s’ìsula Nostra un’ispidale cun sas caraterìsticas e sas potentzialidades de su Santu Frantziscu — at naradu su manager Paolo Cannas, chi no at mai cuadu s’apretzamentu suo pro s’ispidale prus mannu de su  Tzentru Sardigna -. E custu s’at a bìdere ancora de prus a traballos urtimados, cando a nde tènnere profetu at a èssere mescamente s’oferta sanitària, cun sa Meighina Nucleare, sos repartos rinnovados e modernos, de sa cale si podet giai bìdere s’anteprima in sos locales de su padillione DEA, Cardiologia — UTIC etc.”.

“Ma a tènnere profetu de su rinnovu — sighit concruit Cannas — at a èssere “s’umanizatzione” de sos ambientes ospedalieris. Mi refèrgios a totus cussos ispàtzios fintzas a immoe non impreados, chi ant a dare unu sentidu fintzas a s’intrada (hall) chi fintzas a como pariat tropu manna: ant a nàschere servìtzios cummertziales e de ristoratzione, ma fintzas de utilidade (comente a parruchieris), chi non s’agatant in perunu àteru ispidale de sa Sardigna, ma chi medas sardos ant tentu modu de apretziare in àteros ispidales– pùblicos e privados — de Itàlia e de Europa”.

 “Progetto finanziato con l’Avviso Pubblico IMPRENTAS annualità 2021-2022”

Dramma in Arzachena, duos piccioccos mortos in d’unu atzocchiu orrorosu comunidade abbolottada.

Serradu po dolu su parcu de s’abba inube tribagliaiant sos zovanos mortos. Sa die de deris si est abberta cun d’unu dramma chi che at bettadu Arzachena in su dolore. A s’arbeschida, in d’una de sas carrelas provintziales chi cameddant sa bidda a su logu turisticu de Baja Sardinia, bi est bistadu un’atzocchiu forte meda intre una Ford Fiesta e unu SUV. Supra de sa Fiesta biazaiant tres piccioccos zovanes meda, de 16,17 e 18 annos, tottus de bessida marocchina e chi bistaiant in Arzachena.

Si fuint affilande a su tribagliu in su parcu de s’abba Aquadream, inube aiant incumintzadu dae pagu un’esperientzia de tribagliu po s’istiu. Po duos de issos s’atzocchiu est bistadu mortale. S’atteru, su pius zovanu de sa truma, ch’est bistadu leadu in s’ispidale in cunditziones graves meda. Fintzas sas duas feminas chi si acciappaiant intro de su SUV sunt adduradas fertas e cuberradas in s’ispidale de Nugoro.

S’atzocchiu rebbestu est sutzessu in d’unu trettu de carrela chi paret simple de attraessare, ma chi no est privu de transas. Sos motivos de s’atzocchiu sunt in accertamentu. In su logu de s’atzocchiu sunt arrivados sos de sa politzia istradale e sos vigiles de su comune, impignados a cumprendere sos motivos de s’atzocchiu po accrarare sas responsabilidades.

Su nuntzu si est isparghidu in presse meda in sa bidda, dassande chentza paraulas sos chi bistant inie.Supra sos social medas sunt bistadas sas bogadas a campu de affettu e de dolu. Sos tres piccioccos funt connoschidos bene e funt appretziados po su trazu rispettosu e sa gana de s’impignare. Funt insertados in sa sotziedade de s’iscrocca e medas los aiant bidos creschere.

In sinzu de dolu, s’Aquadream at detzisu de suspendere sas attividades. Sos cantzellos de su parcu de s’abba, sunt addurados serrados po tottu sa die. Su personale ancora no creet a su chi est sutzessu, e si est assortadu in d’unu momentu de mudore e collimentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22