Su Project Financing est a su tzentru in custas dies de sa sanidade nugoresa pro s’inghitzu de un’àteru progetu importante. A dd’annuntziare est sa Asl in una nota: “Mancant sos ùrtimos detàllios a su cronoprogramma de sos traballos de sos cantieris, netzessàrios pro limitare a su màssimu eventuales discumbènios e crititzidades. In sos 36 meses imbenientes su Santu Frantziscu at  a devènnere un’ispidale a s’avanguàrdia”.

“Su project financing — sighit sa nota -, at a serrare a manera definitiva sa paràbola sua: pionierìstica, ammajadore e, a bias, gherrada”. S’Asl si referit a sos fatos giuditziàrios dèvidos a s’annullamentu in autotutela dae banda de s’ex cummissàriu istraordinàriu de s’Assl de Nùgoro, Mario Palermo, de su cuntratu firmadu dae s’assòtziu temporàneu de impresas (Ati), denumenada Polo Sanitàriu Sardigna Tzentrale — Sotziedade de Progetu s.p.a. (Pssc), acontèssidu in su 2016 a pustis de sos rilievos de s’Anac. Unu cuntratu istipuladu annos faghet e chi previdiat sa cuntzessione de sos traballos finalizados a sa ricualificatzione de sos presìdios ospedalieris de su distretu nugoresu, ultres a sa frunidura de totu sos servìtzios istrumentales non sanitàrios, de su balore de prus de unu milliardu de èuros pro sa durada de 27 annos.

Su Pssc aiat fatu denùntzia sa su Tribunale de Nùgoro cuntestende s’annullamentu de su cuntratu, e sighende a traballare. Duncas in 2018, sas ocurrèntzias de su project financing fiant istadas pigadas in manu dae sa diretora de s’Assl nugoresa, Grazia Cattina, chi cun unu traballu de grupu longu, suportada dae s’Àrea Tècnica Nùgoro-Lanusè e de s’Ufìtziu de su RUP de su Project Financing, aiat permìtidu sa ripresa de su diàlogu cun sa sotziedade e su cumpretamentu cunsighente de diversas importantes òperas cun s’achirimentu issoro.

A su matessi tempus chi sa diretzione de s’Assl sighiat cun sos traballos (si puru in su 2021 siat istada cummissariada in preparatzione de s’inghitzu de sa reforma sanitària noa), s’ex Cummissàriu istraordinàriu Ats, Massimo Temussi, a traessu de sos legales, at propostu a sa Pssc sa transatzione de un’acòrdiu deliberadu chi at prevìdidu su saldu a sa sotziedade de unu dèpidu pro sos traballos giai acumpridos, chi sunt istados licuidados, mentras sa sotziedade s’est impinnada a cumpletare sas òperas de edilìtzia pùblica intro 36 meses, e a s’agabbu essire dae sa gestione de sos servìtzios dados chi ant a èssere mandados in custa manera a gara noa.

Cun sa reforma sanitària e sa nàschida de s’Asl duncas, cussu cronoprogramma benit portadu a cumprimentu. “No esistet in s’ìsula Nostra un’ispidale cun sas caraterìsticas e sas potentzialidades de su Santu Frantziscu — at naradu su manager Paolo Cannas, chi no at mai cuadu s’apretzamentu suo pro s’ispidale prus mannu de su  Tzentru Sardigna -. E custu s’at a bìdere ancora de prus a traballos urtimados, cando a nde tènnere profetu at a èssere mescamente s’oferta sanitària, cun sa Meighina Nucleare, sos repartos rinnovados e modernos, de sa cale si podet giai bìdere s’anteprima in sos locales de su padillione DEA, Cardiologia — UTIC etc.”.

“Ma a tènnere profetu de su rinnovu — sighit concruit Cannas — at a èssere “s’umanizatzione” de sos ambientes ospedalieris. Mi refèrgios a totus cussos ispàtzios fintzas a immoe non impreados, chi ant a dare unu sentidu fintzas a s’intrada (hall) chi fintzas a como pariat tropu manna: ant a nàschere servìtzios cummertziales e de ristoratzione, ma fintzas de utilidade (comente a parruchieris), chi non s’agatant in perunu àteru ispidale de sa Sardigna, ma chi medas sardos ant tentu modu de apretziare in àteros ispidales– pùblicos e privados — de Itàlia e de Europa”.

 “Progetto finanziato con l’Avviso Pubblico IMPRENTAS annualità 2021-2022”

S’istoria de su Casteddu Fubbalu, s’isquadra simbulu de sa Sardigna.

Sa sotziedade fundada in su 1920 in sa tzittade de Casteddu. Dae prus de chentu annos est unu puntu de relata po s’isport sardu e po medas appassionados de fubbalu. In sos primos annos de s’istoria sua, s’iquadra giogaiat mescamente in sos campionados regionales e minores de su fubbalu italianu. In cussu tempus su Casteddu non fuit ancora intre sas isquadras prus fortes de s’Italia, ma cun su passare de su tempus est creschida e at incumintzadu a mezzorare sos risurtados suos.

Una bortada importante arribat in sos annos Sessanta,cando su Casteddu resessit a arribare in Serie A, su campionadu prus importante de su fubbalu italianu. Dae cussu mamentu s’isquadra incumintzat a si faghere connoschere semper de prus fintzas a livellu naztionale. Su mamentu prus importante de s’istoria de su club arribat in s’istajone 1969-1970. In cuss’annu su Casteddu resessit a binchere s’iscudetto, su campionadu italianu. Est unu risurtadu istoricu pro itte est s’unicu iscudetto binchidu dae un’isquadra de sa Sardigna.

In cussos annos s’isquadra fuit ghiada dae s’allenadore Manlio Scopigno e intre sos giogadores prus importantes bi fuit Gigi Riva. Riva est cussideradu unu de sos attaccantes prus mannos de s’istoria de su fubbalu italianu. Gratzias a sos goals suos est divennidu su simbulu de su Casteddu e fintzas unu de sos giogadores prus amados dae sos tiffosos sardos.

Sa binchida de s’iscudetto est bistada una festa manna po totta sa Sardigna. Fintzas oe cussu sutzessu est ammentadu cun galabera manna e d’est unu de sos mamentos prus importantes in s’istoria de s’isport italianu. Pustis de cussos annos su Casteddu at sighidu a giogare po meda tempus in Serie A, ma at tentu fintzas mamentos diffitziles. S’isquadra at tentu simanas positivas e atteras prus cumplicadas, cun carchi masqada in sas categorias prus bassas. In sos annos Noranta su Casteddu est torradu a tennere resurtados bonos e at partetzipadu fintzas a cumpetissiones europeas, accomettande isquadras de atteros Paisos. Ets bistadu unu periodu importante po sa sotziedade e sos tiffosos.

In sos urtimos annos s’isquadra est bistada in serie A e in serie B.Mancari custu, su Casteddu sighit a essere un’isquadra sighida meda e d’est fintzas oe unu simbulu po totta sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22