A pustis de unu biàgiu longu meda a beru, a pustis de is dificultades acapiadas a s’imparu de sa limba, Elizabet est resèssida a portare a crompimentu is punnas suas. Immoe, gràtzias a su determinu suo, est regollende is frutos de custu impinnu. Elizabeth Rijo, tenet 48 annos e est in Itàlia dae 20 annos e prus. Benit dae sa  Repùblica Dominicana. At lassadu s’ìsula sua suo pro amore, e pròpiu custu amore dd’at fata lòmpere in su paisu nostru acanta at cumentzadu una vida noa.

Dae su babbu maistru de muru at pigadu sa fortza e su determinu de portare a crompimentu is progetos suos, totu calidades chi chircat de imparare a is duos fìgios. In su 2007 s’est laureada in Ingegneria in s’Universidade de Casteddu, cosa non fàtzile pro una fèmina istràngia chi at dèvidu giumpare s’otzèanu e in prus imparare una limba e una cultura diferente. “M’ammento chi is primas bias aiat medas problemas a sighire is letziones, sende chi non connoschia s’italianu. Est una limba chi s’assimbìgiat a s’ispagnolu, ma no est sa matessi cosa. Duncas, mi so dèvida isconchiare meda pro dda imparare, e a sa coa nche dd’apo fata”.

Gràtzias a sa fortza sua, duncas Elizabeth est resèssida a si laureare in ingegneria e a agatare deretu traballu in Sardigna etotu, acanta est portende a in antis medas progetos. Mancari gasi issa, cando calicunu ddi narat chi est una casteddaja, rispondet:  “M’intendo prus tzitadina de su mundu. Creo chi sa Sardigna siat una de is medas tapas de sa vida mia. Mi diat pràghere andare a bìvere in àteras terras, mancari in Àfrica”.

Ma in Sardigna Elizabeth at postu fintzas unu pagu de righinas, difatis est intrada a fàghere parte de unu progetu de grandu valore e impinnu sotziale pro tèndere sa manu a chie nde tente bisòngiu. Semus alleghende de s’assòtziu de su cale Elizabeth faghet parte, “La rosa roja”, assotziatzione acanta dae annos si furriant  medas migrantes chi sunt arribbados a s’ìsula nostra dae tesu. “In Itàlia forsis sa cultura de s’acasàgiu no est forte meda. – at naradu ischieta Elisabeth – In su paisu nostru semus prus abituados a agiudare a chie tenet netzessidade, fintzas a chie non si connoschet. Non bastat a fàghere arribbare is istràngios e si nde ismentigare de issos. Est pretzisu a istantargiare fintzas progetos de integratzione. Pro more chi tra is pòpulos bi siat armonia, ma fintzas tra sa gente,  est importante su respetu,  su diàlogu e a s’abertura cara a àteras realidades”.

 “Progetto finanziato con l’Avviso Pubblico IMPRENTAS annualità 2021-2022”

S’arte de su tessinzu in Sardigna: filos de istoria, identidade e bellesa chentza tempus.

Sa tessidura in Sardigna est un’arte millenaria, abbarbada in fundaria in s’istoria e in sa vida de donzi die de s’isula. Unu sapere antigu, passadu dae mama a fiza, chi in sos seculos at revertidu materiales simples comente lana,linu e cotone in manivattos unicos,fattos po mesu de telarzos a manu orizontales o ritzos.

Intre sas eccellentzias regionales prus de signifficu bi sunt sos tappettos sardos, nodidos po sa calidade de sos tribaglios e sa ricchesa de sas decoraduras. Meda isparta est sa tennica de su pibiones, giammada gai pro itte ammentat sos pupujones de s’aghina. Custu tribagliu, chi creat disignos tridimensionales supra sos pannos, est una de sas prus cumplessas e ammaghiantes e acciappat s’espressione massima sua in tzentros comente Samugheo, Nule e Mogoro.

Accanta a sos pibiones, un’attera tennica de su connottu, isparta meda est cussa a lizzos, chi permitit de faghere motivos geometricos cadrios e chi si repitint. Non mancana tribaglios prus antigos e reffinados comente su puntu a traccu, impittadu mescamente po decoraduras essentziales e ideales, e sa produssione de s’arbaxi, unu pannu de lana chi no est tribagliada, cumpattu e chi non faghet passare s’abba, chi a s’ispissu fuit impittadu po bistires de su connottu e manteddos.

Sa Sardigna mustrat una variedade istravanada de tzentros de produssione, donzunu cun d’una forma chi si reconnoschet. Samugheo, in su coro de s’Aristanesu, est cussideradu su logu printzipale de s’artesanadu tessile sardu e accasazzat unu connottu bivu, chi fintzas oe est capatze de si mezzorare chentza perdere sas raighinas suas. Nule, in sa costera, est tzelebre po sos tappettos in lana dae sos colores cadrios e dae sos motivos geometricos detzisos, mentres Aggius, in Gaddura, si annodittat po cosas fattas a manu dae sas tonalidades prus cardas e naturales,ispiradas a sa bista granitica de s’iscrocca.

Unu rolu de primu pianu ispettat fintzas a Mogoro, nodidu po sa produssione de tappettos e aratzos e po s’istorica viera de s’artesanadu, chi donzi annu faghet arribare bisitadores dae tottu s’isula. Atteros tzentros importantes sunt Isili e Busachi, inube sa tessidura sighit a essere pratigada secundu tennicas de su connottu, manteninde biva una cultura de su “faghere” chi resistit a su tempus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22