Su sìndigu de Lanusè e presidente de sa Cunferèntzia sòtziu sanitària ogiastrina, Davide Burchi: «No amus agabbare de nos cheschiare e de nos fàghere intèndere fintzas a cando su problema no at a èssere risòlvidu e s’ispidale afortigadu.»

Dae eris e finas a su 20 de ghennàrgiu sighente, su naschidòrgiu s’ispidale de Lanusè at a abarrare serradu in modu temporàneu.

Unu grave discumbèniu pro sas mamas ogiastrinas chi ant a èssere custrintas a andare in sas àteras istruturas sanitàrias de sa Sardigna pro pòdere fàghere nàschere sos figigeddos issoro.

Sa serrada de su puntu nàschida est istadu causadu dae sa mancàntzia de personale in su repartu Pediatria e Neonatologia. A garantire s’assistèntzia in casu de apreu ant a èssere sos repartos de Ginecologia e Ostetricia. Fintzas Pediatria at a abarrare ativu ogna die dae sas 8.00 a sas 20.00 pro garantire su servìtziu de consulèntzia in su Prontu Sucursu e cussu ambulatoriale.

Subra de sa situatzione grave amus intesu su sìndigu de Lanusè e presidente de sa Cunferèntzia sòtziu sanitària ogiastrina, Davide Burchi.

«S’assessore regionale a sa Sanidade Nieddu – afirmat Burchi – aiat garantidu chi in s’ispidale de Lanusè diant èssere arribbados pediatras dae su Brotzu. A su presente, a pustis de l’àere torradu a intèndere m’at naradu chi sunt traballende pro chircare de agatare una solutzione lestra. Pro s’ora su Puntu nàschida at a abarrare serradu finas a su 20 de ghennàrgiu.»

«In Cunferèntzia sòtziu sanitària – at sighidu su primu tzitadinu lanuseinu – fiat essidu a campu chi sa serrada diat èssere istada a su màssimu de unas cantas die, e non pro meda tempus. Duncas sa recherta nostra est semper sa matessi: agatare unu modu pro chi s’ispidale tèngiat funtzionalidade prena.»

«Pro nois su naschidòrgiu est unu chistione de orgòlliu – sighit su presidente de sa Cunferèntzia sòtziu sanitària – siat pro sos problemas acapiados a su partu e possìbiles nàschidas chi diant pòdere acontèssere in caminu, comente a dolu mannu est capitadu medas bas . Una situatzione chi non bolimus sutavalutare e chi nos apessamentat meda.»

«Duncas semus organizende un‘atopu in Casteddu in assessoradu regionale – at agiuntu su sìndigu – cun s’assessore Nieddu o mancari cun su guvernadore Solinas, in modu chi detzidant de risòlvere custu problema grave. Fintzas ca in ocasione de su controllu Covid de custas dies, sos comunos ogiastrinos ant dimustradu de èssere in prima lìnia e de èssere semper disponìbiles a su chi benit rechertu a livellu regionale. Duncas pensamus de meritare atentzione pro su chi faghimus, fintzas pro more de sas dificultades in sa zona nostra chi dipendet dae sos trasportos e non petzi, e pro sa distàntzia dae sos àteros territòrios de s’Ìsula.»

«Duncas no amus a abbassare sa guàrdia e amus a sighire a protestare e a nos fàghere intèndere fintzas a cando custu problema no at a èssere risòlvidu e finas a cando totu s’ispidale de Lanusè no at a èssere afortiadu», concruit Burchi.

 “Progetto finanziato con l’Avviso Pubblico IMPRENTAS annualità 2021-2022”

Bentu a prus de 100 km/h, prus de 200 interventos de sos vigiles de su fogu in Sardigna in su fine de chida.

Unu fine de chida de tempus malu meda at proadu sa Sardigna, ferta dae bentu forte meda chi ant binchidu sos 100 km/h e dae un’abbiza meteo po arriscu fintzas de nie in sos montes de su tzentru de s’isula. Sa situassione at creadu problemas in tottue e dimandadu un’interventu importante de sos Vigiles de su Fogu, impignados in prus de 200 operassiones de succursu tennicu lestru supra de tottu s’iscrocca de sa Regione.

Sos problemas prus mannos bi sunt bistados mescamente in sas carrelas,inube sa rutta de medas arbures at creadu difficultades a sas macchinas, e in carchi casu, at intzidiadu sa serrada de carchi carrela. Sunt bistados casi 60 sos interventos fattos po che franghere arbures ruttos o chi funt po nde ruere, chi intzippaint carrelas, marciapes e bintradas de sas domos.

A custos si aggiunghent a su nessi 35 interventos po ponnere in siguresa ligados a su distaccu o s’arriscu de rutta de elementos de sos palattos, commente guarnisiones, teulas, insinzas e cartellones po sa pubblicidade,abbuttinados o movidos dae su bentu forte. In medas biddas bi sunt bistados puru dannos e domos privadas o pubbricas, cun sa netzessidade de allaccanare carchi zura po appartare perigulos a sos tzittadinos.

In su mentres, sos cumandos de sos Vigiles de su Fogu de Casteddu, Tattari, Nugoro e Aristanis sighint a controllare prus de 40 dimandas de operassiones chi sunt ancora in daesegus, cun sas isquadras impignadas chentza si frimmare po intervennere in sos logos prus apprettosos e cun arriscos mannos.

Su tempus malu, accumpanzadu dae s’abbizu meteo po bentu forte e nie in sas zuras prus artas, ad dadu unu contribbudu a cumplicare sas operassiones, in manera particulare in sas zuras de sa parte de intro de s’isula, inube sa minimada de sas temperaduras e sas ispentumadas ant fattu divennere prus diffitziles sas tramudas e sos interventos de succursu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22