Un’infermieri de su Brotzu est istadu iscutu dae su genitore de unu malàidu. Su sindacadu (Nursing Up) pedit prus seguridade. Su Sindacadu de sos infermieris (Nursing Up) denùntziat un’àtera agressione fìsica e verbale a dannu un’infermieri in servìtziu acanta s’ispidale casteddaju.

Domìniga 2 ghennàrgiu 2022 un’infermieri in servìtziu in su prontu sucursu de su Brotzu de Casteddu mentras faghiat servìtziu est istadu pigadu a faeddos malos, minetzadu e iscutu dae su babbu de unu malàidu in isetos de curas.

Su su sindacadu at donadu solidariedade a s’Infermieri vìtima de s’ennèsima agressione e pedint cun firmesa chi su personale sanitàriu potzat traballare in ambientes seguros e amparados.  Su sindacadu de sos infermieris giai impinnadu in un’operatzione natzionale pro sensibilitzare  contra a  sa violèntzia a sos operadores sanitàrios pedit prus respetu pro sos operadores e tolleràntzia zero pro sos chi agredint.

Su sindacadu de sos infermieris (Nursing Up) invitat sa tzitadinàntzia a cumprèndere chi sas dificultades mannas de su servìtziu sanitàriu ruent in sas palas de sos impitadores e de sos operadores sanitàrios a sa matessi manera.  S’infermieri, su mèigu e sos àteros operadores sanitàrios chi garantint su servìtziu sanitàriu si iscòntriant ogni die cun milli crititzidades e tenent bisòngiu de sa collaboratzione e de sa cumprensione de sos impitadores.  Su sindacadu (Nursing Up) pedit a sa Diretzione Generale de s’Arnas de su Brotzu s’atuatzione a sa lestra de unu programma de seguridade contra sas agressiones e s’ativatzione de una postòrgiu de Politzia a die e a note a s’internu de su Prontu Sucursu.

 “Progetto finanziato con l’Avviso Pubblico IMPRENTAS annualità 2021-2022”

© RIPRODUTZIONE RISERVADA

Ispidale de Santu Bainzu firmu a su palu:ritardos chi iscobiant unu sistema chentza disignu.

S’abertura de s’ispedale nou de Santu Bainzu Monreale patit unu rinviu novu e, segundu sas istimas prus reghentes, s’ispidale no at a èssere operativu a innantis de su 2027. Una data ancora a tesu, mescamente si  si cunsiderat chi s’istùdiu de possibilidade est de sa segunda metade de sos annos Duamìzza e chi su cantieri, cumintzadu in su 2022, est bistadu prenu de abbaccamentos, firmadas e torradas a cumintzare chi ant fattu su percursu isvariadu meda.

Su ritardu de su cantieri ponet in lughe una difficultade prus manna: sa Sardigna bivet dae annos sa mancàntzia de una progetatzione sanidària firma e coerente. S’Ìsula non tenet unu pranu azzorronadu e abberu orientadu a sos bisònzos de sas comunidades, pro itte s’ùrtimu Pianu sanidàriu regionale est de su 2007. In su mentres, si sunt sighidas refformas e cuntra refformas, acuntzentramentos e cummissariamentos chi non ant resòrvidu sos problemas istruturales de s’assentu sanidàriu regionale.

A cumplicare de prus  su cuadru est sa crèschida de su campu privadu, in manera particulare si biet in sos tzentros prus populados, in ue ant pigadu forma poliambolatòrios modernos e istruturas chirùrgicas novas capatzes de apparare servìtzios lestros. In parallelu, sa salude pùbrica fadigat semper prus a garantire sas prestassiones netzessàrias, cun su perìgulu beru de allargare sa distantzia intre chie podet atzèdere a curas deretas agguantande costos privados e chie imbetzes est costrintu a si cunfrontare cun listas de isettu, tempos longos e mancàntzias organizativas.

In su Campidanu Mesanu, logu chi isettat unu ispidale novu dae belle vinti annos, custa dèbilesa est evidente meda: sa meighina de s’iscrocca s’est afortigada a pagu a pagu, medas bàrdias mèigas ant serradu o minimadu sos òrarios, sos mèigos de base non bastant e sos servìtzios netzessàrios benint dados cun difficultade. Comunidades intreas s’agatant a bìvere gai in d’una cunditzione de emergèntzia donzi die.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”