S’ispetat cun grandu emotzione s’arresonu de fine annu de su Capu de s’Istadu, Sergio Mattarella.

S’interventu de Mattarella, registradu dae sa Rai, at a andare in unda in direta su 31 de nadale sero in totus is tv natzionales, a retes unificadas. A su chi s’ischet is ripresas diant dèpere èssere giradas in s’istùdiu de sa Palatzina, e fortzis no at a istare sètzidu a palas de s’iscrivania ma in poltrona o peri peri a camba, in istile giornalismu televisivu. S’isfundu at a èssere simpre, cun sa bandera tricolore e cussa de sa s’Unione europea.

Is temas diant dèvere èssere cussos s’identidade e de s’orgòlliu natzionale paris cun su cuntzetu de sa responsabilidade, cun unu incoragiamentu forte a unu Paisu chi tenet is trastos, morales e de cumpetèntzia, pro essire foras dae sa crisi pandèmica e de totus is cunsighèntzias negativas suas.

S’at a tratare duncas de unu discursu basadu a pitzu de s’identidade italiana cun sa netzessidade de una unione sotziale forte, unione chi issu pedit fintzas a is fortzas polìticas in sa gestione de custa fase delicada de sa vida natzionale.

In s’arresonu de su presidente tema printzipale at a èssere peri su de is responsabilidades individuales in s’afrontare custa crisi sanitària sena agabbu e is responsabilidades de sa polìtica in s’ischire lèghere s’impatu malu chi at tentu a dannu de is tzitadinos e de s’economia.

Cun custu arresonu Mattarella si cungedat a sa fine de sete annos intensos. Unu cungedu giai annuntziadu in diversos interventos pùblicos in s’ùrtima parte de s’annu, e chi nde pesat totu is ipòtesis de unu bis a su Quirinale.

No at a mancare s’incoragiamentu a totu is italianos: chi est unu pagu fintzas su tema de sa parte finale sua de presidèntzia, ca Mattarella serrat s’aficu orgolliosu suo de sa risposta de su Paisu, chi at sighidu a andare a in antis mancari totu is dificultades. Unu caminu custu chi non si devet arrere pro interessos de pagos, e prus pagu pro càrculos eletorales de is partidos.

De seguru is teleispetadores at a èssere unu pagu in pensamentu pro s’apretu pandèmicu chi s’est agravende pròpiu in custu momentu polìticu e in manera istitutzionale delicadu meda. Ddoe tent pro s’eletzione in ghennàrgiu de su presidente nou de sa Repùblica, chi at a èssere su sutzessore de Mattarella e at a èssere importante meda pro poderare a camba su sistema natzionale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Dramma in Arzachena, duos piccioccos mortos in d’unu atzocchiu orrorosu comunidade abbolottada.

Serradu po dolu su parcu de s’abba inube tribagliaiant sos zovanos mortos. Sa die de deris si est abberta cun d’unu dramma chi che at bettadu Arzachena in su dolore. A s’arbeschida, in d’una de sas carrelas provintziales chi cameddant sa bidda a su logu turisticu de Baja Sardinia, bi est bistadu un’atzocchiu forte meda intre una Ford Fiesta e unu SUV. Supra de sa Fiesta biazaiant tres piccioccos zovanes meda, de 16,17 e 18 annos, tottus de bessida marocchina e chi bistaiant in Arzachena.

Si fuint affilande a su tribagliu in su parcu de s’abba Aquadream, inube aiant incumintzadu dae pagu un’esperientzia de tribagliu po s’istiu. Po duos de issos s’atzocchiu est bistadu mortale. S’atteru, su pius zovanu de sa truma, ch’est bistadu leadu in s’ispidale in cunditziones graves meda. Fintzas sas duas feminas chi si acciappaiant intro de su SUV sunt adduradas fertas e cuberradas in s’ispidale de Nugoro.

S’atzocchiu rebbestu est sutzessu in d’unu trettu de carrela chi paret simple de attraessare, ma chi no est privu de transas. Sos motivos de s’atzocchiu sunt in accertamentu. In su logu de s’atzocchiu sunt arrivados sos de sa politzia istradale e sos vigiles de su comune, impignados a cumprendere sos motivos de s’atzocchiu po accrarare sas responsabilidades.

Su nuntzu si est isparghidu in presse meda in sa bidda, dassande chentza paraulas sos chi bistant inie.Supra sos social medas sunt bistadas sas bogadas a campu de affettu e de dolu. Sos tres piccioccos funt connoschidos bene e funt appretziados po su trazu rispettosu e sa gana de s’impignare. Funt insertados in sa sotziedade de s’iscrocca e medas los aiant bidos creschere.

In sinzu de dolu, s’Aquadream at detzisu de suspendere sas attividades. Sos cantzellos de su parcu de s’abba, sunt addurados serrados po tottu sa die. Su personale ancora no creet a su chi est sutzessu, e si est assortadu in d’unu momentu de mudore e collimentu.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22