A dolu mannu est istadu agatadu su corpus sena vida de Fabio Argiolas.

Su militare casteddaju de 42 annos fiat iscumpartu lunis a pustis de èssere essidu dae domo pro andare a s’allenare.

In is coladas oras su corpus sena vida de s’òmine est istadu agatadu in fundu a s’iscolliera de Calamosca, in ue si suponet siat rutu.

S’òmine est istadu agatadu custu mangianu dae unu passante chi at avisadu deretu is fortzas de s’òrdine sa possìbile presèntzia de su corpus de un’òmine in zona.

Deretu at acudidu una motovedeta de sa guàrdia costera chi at averguadu a su presèntzia de s’òmine e dae mare at donadu inditos a is iscuadras de su Sucursu Alpinu e Ispeleològicu chi sun lòmpiadas a su logu acata s’agatada su corpus sena vida. Unu mèigu at cunfirmadu sa morte.

Chi si poderet tratare de Fabio Argiolas est essidu a campu in is oras a pustis cun is sutzessivas verìficas chi a dolu mannu ant cunfirmadu is ipòtesis, comente ant cunfirmadu is Vìgiles de su fogu, chi sunt intervènnidos in su logu de s’intzidente.

A is pompieris, paris cun is tècnicos de su sucursu alpinu, est istadu afidadu s’incàrrigu de protzedire a su recùperu de su corpus de su militare cun una lètia chi posca est istada trasferida dae mare cun unu gommone a unu potigheddu pagu a largu.

Sa presèntzia de su corpus in sa Sedda de su Diàulu abbalorat s’ipòtesi de unu intzidente a sa base de su detzessu. Fabio Argiolas fiat unu caporale de s’Esèrtzitu aposentadu in sa caserma Villasanta de Casteddu. Dae duas dies nemos dd’aiat torradu a bìdere. S’òmine fiat essidu pro si fàghere una cursa in is àndalas intre Calamosca e sa Sedda de su Diàulu, chi connoschiat bene meda.

Una malore o una disatentzione diat àere provocadu sa ruta de s’òmine in s’ispèntuma profunda una deghina de metros. A pustis de s’allarme de is familiares, is chircas si fiant cuntzentradas in zona e aiant bidu sa partetzipatzione fintzas de is collegas militares de s’esèrtzitu e amigos de Argiolas, paris cun is carabineris e is òmines de su Sucursu Alpinu.

Is chircas sunt sighidas eris e oe, ma a dolu mannu si sunt concruidas oe etotu cun grandu disisperu de totus. Fabio lassat una sorre, Silvia, sa mama Sandra e su babbu Egidio.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Regorta differentziada,Sardigna intre sas primas ma serbit unu passu in prus.

Sa Sardigna si cuffirmat intre sas regiones prus attentas a sa conduida de s’arga. In su 2024 sa regorta differentziada est arrivada a su 76,5% e balet su terzu postu in Italia, in daesegus de Emilia Romagna e Veneto.

S’elementu,presentadu dae Legambiente in su mentres de s’Ecoforum de Casteddu, mustrat una situassione positiva.Intames si registrat una minimada pitticca de sos comunes prus virtudosos e de cussos chi resessint a arrivare a prezenias artas meda de regorta. In d’una parte manna de s’isula sunt oramai diffundidas abitudines bonas in s’isseperu de s’arga, signu chi in sos annos est bistadu fattu unu tribagliu importante dae sas amministratziones e sos tzittadinos. Sa regorta gianna pro gianna e un’attentzione prus manna a sos cumportamentos de donzi die ant dadu unu contribbudu pro mezorare sos risurtados.

A su mattessi tempus addurant ancora trempas de mezoramentu. Carchi tzentru no arribat a sos livellos prevedidos e sighint a faghere prus fatiga,comente Tattari, mancari siant arribande cambiamentos chi diant podere battire menzus resurtados giai in sos annos imbenientes. Intre sas tzittades printzipales si annoditant Aristanis e Nugoro, chi cuffirmant prezenias artas e organizassione bona de su servitziu, divenninde puntu de relata fintzas po sas atteras iscroccas.

Su cuadru chi bessit a pizu est cussu de una regione chi at fattu passos in daenantis importantes, ma chi non si podet permittere de si frimmare. Una parte de s’arga sighit difattis a no essere differentziada e custu pesat siat supra de s’ambiente chi supra sos costos pro sas comunidades. Sa bera porfia como no est solu mantennere sos risurtados segudados, ma los rendere prus pariviles in totta sa Sardigna. Bi sunt iscroccas chi andant bene meda e atteras chi addurant in daesegus: minimare custa differentzias at essere de fundamentu pro mezorare deabberu su sistema.

In giogu non bi est solu una prezenia, ma sa manera cun sa cale si abbidat a su tempus benidore. Mezorare sa derettura de s’arga cheret narrere de minimare su corpu supra de s’ambiente, ma fintzas fraigare comunidades prus scientes e responsabbiles. Est unu caminu chi dimandat continuidade e impignu e seperos craros, pro itte sos resurtados alcansados fintzas a como mustrant chi furriare est possibile, ma solu si si andat a daenantis chena si frimmare.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22