Male meda pro su Casteddu in sa partida contra s’Udinese.

Is sardos ant pérdidu eris pro 0-4 a dae in antis de is tifosos issoro in s’Unipol Domus, sena gherrare in totu sa partida e umiliados dae is aversàrios. Una figura fea chi nesciunu s’ispetaiat, antzis custa diat àere dèvidu èssere sa gara pro furriare s’àndala mala comintzada in custa istajone.

Imbetzes est istada sa partida de sa birgòngia, fortis sa gara peus de is ùrtimos trinta annos. Mancu s’annu chi su Casteddu at arriscadu de nde falare in Sèrie C, is ruju-blu ant giogadu in custa modu.

Su primu gol de s’Udinese est lòmpidu a su minutu nùmeru bator, pro more de una farta de Godin, chi at serbidu is atacantes biancu-nieddos: Makengo no at perdonadu e at marcadu sa rete de su vàntagiu.

Is òmines de Mazzarri ant fatu pagu e nudda pro proare a agatare su parègiu, Pavoletti ebbia fiat acant ade fàghere gol, ma su portieri de is friulanos s’est fatu agatare prontu.

Su 2-0 pro s’Udinese est lòmpidu a sa coa de su primu tempus, cun s’ispagnolu Deulofeu chi cun un’iscuta de pee de punitzione at collionadu s’ùrtimu difensore ruju-blu, Cragno, chi at regortu sa botza a intro de su sacu.

A pustis de custa rete is sardos non si sunt bitos prus, cun is giogadores friulanos chi ant ghiadu sa partida. Difatis a su comintzu de su segundu tempus, Molina at indovinadu su gol de su 3-0 gratziàs a unu tiru chi est lòmpidu a s’àngulu de su palu.

A su minutu 66 in prus est istadu bogadu foras de su retàngulu birde Marin cun su cartelinu ruju dae parte de s’àrbitru, pro more de duas ammunitziones.

Colant un’àtera pariga de minutos e is biancu-nieddos agatant su 4-0 cun Deulofeu, chi cun una bella iscuta de pe’ est resèssidu a bìnchere a torra a Cragno, cun sa botza chi est acabbada a giosso de sa traversa.

Unu resurtadu chi at a costare sa banchita a s’allenadore ruju-blu Mazzarri? Su diretore isportivu casteddaju Capozucca at naradu chi su tècnicu no est a arriscu, ma medas giogadores no ant prus a giogare cun sa màllia de is bator moros a pustis de sa birgòngia manna de custa isfida contra s’Udinese.

Amus a bìdere in is dies benentes. Giai martis su Casteddu at a falare in campu pro giogare sa partida contra sa Juventus de s’ex allenadore ruju-blu, Allegri.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Savetura e sa mototzicleta biagiaiant in sa matessi diretzione, su giòvanu est istadu leadu currende a su Brotzu. Sa moto fiat colende fatu de sa bia Lungosaline conca a Casteddu cando, pro càusas galu de ispiegare, est finida contra sa màchina chi biagiaiat in sa matessi diretzione de martza. Unu casteddaju de 33 annos, su chi guidaiat sa motzicleta, est istadu sucùrridu in deretura dae su personale de su 118 e leadu de presse a su prontu sucursu de s’Ispidale Brotzu.

Su giòvanu cun trauma bastante graves, ricoveradu, est in prògnosi riservada. A sul logu acantu est sutzèdidu s’intzidente sunt arribbados in deretura is politzotos e su su personale de sa Setzione Infortunistica Istradale de su Corpus de Politzia Locale de Casteddu, chi ant fatu totu sos rilevos.

Segundu su chi nd’est essidu a campu dae is prima indàgines, a inghìriu a sas oras 3:00 de custa note, su conducente de su mototziclu fiat colende fatu de sa via Lungosaline, in su poeto de Casteddu ma benende dae Cuartu Sant’Aleno, cun diretzione de martza conca a Casteddu cando, pro càusas impretzisadas s’est tumbadu cun un’autoveìculu chi a sa pròpiu manera percurriat sa bia Lungosaline, in sa matessi diretzione de martza.

S’atumbada, violenta, s’est verificada intre sa parte anteriore de su mototziclu e sa parte posteriore de s’autoveìculu. Su conducente de su motoveìculu, unu pitzocu casteddaju classe 1989, est istadu sucùrridu dae personale de su 118 e carradu in deretura in s’ambulantza e leadu de presse a su prontu sucursu de s’Ispidale Brotzu, acanta sos sanitàrios de turnu, cunstatende sas graves lesiones causadas dae su corpu retzidu, nd’ant dispostu su ricòveru in prògnosi riservada.

Pro connòschere de chie sunt sas responsabilidades de s’intzidente, si de su mototziclista o si de s’autista de sa vetura, at a tocare a isetare sos èsitos cumpletos de is esàmenes de sa politzia istradale, ma sa cosa prus importante est chi isferidos potzant sanare e torrare in transa.

“Progetto finanziato con l’Avviso Pubblico IMPRENTAS annualità 2021-2022”