Male meda pro su Casteddu in sa partida contra s’Udinese.

Is sardos ant pérdidu eris pro 0-4 a dae in antis de is tifosos issoro in s’Unipol Domus, sena gherrare in totu sa partida e umiliados dae is aversàrios. Una figura fea chi nesciunu s’ispetaiat, antzis custa diat àere dèvidu èssere sa gara pro furriare s’àndala mala comintzada in custa istajone.

Imbetzes est istada sa partida de sa birgòngia, fortis sa gara peus de is ùrtimos trinta annos. Mancu s’annu chi su Casteddu at arriscadu de nde falare in Sèrie C, is ruju-blu ant giogadu in custa modu.

Su primu gol de s’Udinese est lòmpidu a su minutu nùmeru bator, pro more de una farta de Godin, chi at serbidu is atacantes biancu-nieddos: Makengo no at perdonadu e at marcadu sa rete de su vàntagiu.

Is òmines de Mazzarri ant fatu pagu e nudda pro proare a agatare su parègiu, Pavoletti ebbia fiat acant ade fàghere gol, ma su portieri de is friulanos s’est fatu agatare prontu.

Su 2-0 pro s’Udinese est lòmpidu a sa coa de su primu tempus, cun s’ispagnolu Deulofeu chi cun un’iscuta de pee de punitzione at collionadu s’ùrtimu difensore ruju-blu, Cragno, chi at regortu sa botza a intro de su sacu.

A pustis de custa rete is sardos non si sunt bitos prus, cun is giogadores friulanos chi ant ghiadu sa partida. Difatis a su comintzu de su segundu tempus, Molina at indovinadu su gol de su 3-0 gratziàs a unu tiru chi est lòmpidu a s’àngulu de su palu.

A su minutu 66 in prus est istadu bogadu foras de su retàngulu birde Marin cun su cartelinu ruju dae parte de s’àrbitru, pro more de duas ammunitziones.

Colant un’àtera pariga de minutos e is biancu-nieddos agatant su 4-0 cun Deulofeu, chi cun una bella iscuta de pe’ est resèssidu a bìnchere a torra a Cragno, cun sa botza chi est acabbada a giosso de sa traversa.

Unu resurtadu chi at a costare sa banchita a s’allenadore ruju-blu Mazzarri? Su diretore isportivu casteddaju Capozucca at naradu chi su tècnicu no est a arriscu, ma medas giogadores no ant prus a giogare cun sa màllia de is bator moros a pustis de sa birgòngia manna de custa isfida contra s’Udinese.

Amus a bìdere in is dies benentes. Giai martis su Casteddu at a falare in campu pro giogare sa partida contra sa Juventus de s’ex allenadore ruju-blu, Allegri.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Nora, sa tzittade supra de su mare chi contat sas issidas de sa Sardigna.

Intre sos logos archeologicos prus ammaghiantes de s’isula,sa zura archeologica de Nora est una de sas testimonias prus importantes de s’istoria antiga de sa Sardigna. Posta in sa costa sud-occidentale , in s’iscrocca de Pula, Nora est unu logu inube su tempus passadu ispuntat a pagos passos dae su mare, intre ruinas chi contant seculos de tzivilidade e barattos in su Mediterraneu.

Fundada cun meda probabilidade dae sos Fenicios intre su IX e s’VIII seculu A.C.,Nora est cussiderada una de sas tzittades prus antigas de s’isula. Pustis est divennida unu tzentru punicu importante meda e, prus a tardu,romanu, leande unu rolu istrategicu dae su puntu de bista de sos negossios chi de s’amministrassione. Sa posissione sua,supra de una penisula accarada supra su mare, l’at fatta divennere unu portu naturale e unu puntu de collegamentu de fundamentu intre sa Sardigna e sos atteros caminos de su Mediterraneu.

Passizzande intre sos restos de sa tzittade si podent biere in manera crara sas fases istoricas divressas chi sunt furriadas in su tempus.Intre sos elementos prus de ammaghiu bi est su teatru romanu, una de sas conas de su situ, chi fintzas oe benit impittadu in su mentres de s’istiu pro abbenimentos culturales e ispettaculos. Accanta a su teatru bi sunt sos istabilimentos termales, cun logos dedicados a su relax e sa vida sotziale, e parizzas domos decoradas cun musaigos chi testimonzant su livellu de isviluppu apperricadu dae sa tzittade in su tempus de sos romanos.

Sos caminos sticcados,sos restos de sas cresias e sas istrutturas de su portu contant de una tzittade biva e ordiminzada, inube si intrintzaiant attividades de barattu,religiosas e de donzi die.Interessante meda est su cuartieri punicu, chi custoid sas andalas de sa fase prus antiga de su logu. Unu de sos trattos pius ammaghiantes de Nora est s’appitzicu suo cun su mare. Parte de sa tzittade antiga s’isterriat in sa costa e oe carchi istruttura si agattat sutta de su livellu de s’abba, e si biet solu in carchi occasione.

Custu elementu dat unu contribbudu a faghere divennere su situ unigu, inube archeologia e bista naturale si fundent in d’unu ecchilibriu ammaghiante.Sos iscavos, chi sunt ancora faghinde, sighint a torrare materiales e informatziones novas, arricchinde sa connoschentzia de unu logu chi no at ancora iscoviadu sos segretos suos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22