A pustis de tres partidas pèrdidas de fila de pare, in sa partida benente, su Casteddu at a afrontare s’Atalanta, un’iscuadra tra is prus fortes de su campionadu.

Pro is òmines de Mazzari is tres puntos ant a èssere una prima ispera pro chircare de sistemare unu pagu sa classìfica. Difatis su Casteddu est semper prus in zona retrotzessione.

Pro cussu su Casteddu si depet iscarèschere a lestru sa gara contra su Bologna – pèrdida a s’istàdiu Dall’Ara pro 2-0 pro more de is gol de su tertzinu De Silvestri e de s’atacante Arnautovic – e agatare sa filada bona pro pòdere abarrare in sa màssima categoria de su fùbalu italianu.

Contra is bergamascos at èssere una partida isconchiosa meda pro is ruju-blu, e mancari si gioghet tra is muros amigos de s’Unipol Domus, is òmines de Mazzarri non sunt is favoridos.

Is ruju-blu ant a fàghere bìdere s’apretu e sa gana de fàghere puntos, netzessària pro chircare de aderetzare s’istajone. Duncas diat èssere una làstima a s’arrèndere mancari s’aversàriu siat prus forte, pro ite su Casteddu, in custa istajone, podet galu nàrrere sa sua.

Tzertu, is iscuadras chi sunt a in antis de is sardos non sunt perdende puntos, ma in su fùbalu non s’ischit mai comente ant a pòdere andare is cosas.

Su capitanu de is ruju-blu, Joao Pedro, at a èssere su giogadore chi diat pòdere fàghere sa diferèntzia.

Un’àteru diat pòdere èssere su tzentrucampista est Nandez, sena iscarèschere a s’atacante Pavoletti, unu maistu in su giogu de conca.

In medas però si dimandant, pro bìnchere contra s’Atalanta custa gara, chi at a serbire a fàghere prus giogu e no a ispetare s’àtera iscuadra. Fortzis at a bastare una bella partida pro fàghere torrare sa gana a s’iscuadra pro si sarbare e fàghere bìdere sa balentia issoro a is tifosos casteddajos.

Pro immoe at a èssere importante meda unu puntu e a pustis at a tocare a giogare totus is partidas chi ant a mancare comente chi esserent finales, finas a lòmpere a sa sarbesa matemàtica.

Sa prima cosa de fàghere at a èssere a frimare is atacantes de Gasperini, comintzende dae su colombianu Zapata e su slovenu Ilicic.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Onne, iscoperta una prantadura manna de marijuana: arrestados duos zovanos de Gavoi.

Un’operassione antidroga manna abberu conduida dae s’Isquadra mobbile de Nugoro, cun s’accottu de sos politziottos de su Commissariadu de Gavoi, at permittidu de iscoperrere una prantada de marijuana in sas campagnas de Onne e a s’arrestu de duos zovanos, ambos de Gavoi.
S’azione de sa politzia sighit un’attividade de collidura accurada, durada paritzas chidas, chi at prevedidu fintzas appostamentos longos meda in d’una zura chi est frunca meda e de diffitzile atzessibilidade.

Propriu in cussu trettu de campagna, cuadu bene in mesu de sas prantas, fit bistadu  prantadu unu campu prantadu cun casi 4.500 prantas de
cannabis, medas de sas cales, giai maduras e prontas po essere buddidas. Sas prannucas analizzadas ant evidentziadu una cuncentrazione arta meda de THC, cumintzu attivu chi deffinit s’effettu psicoattivo de sa marijuana.

Secundu sas istimas, sa regorta diat aere pottidu ingendrare casi 50 kilos de droga, giai pronta po sa bendita, cun d’unu balore in su mercadu illetzidu de chentinaia de mizzas de euros. Un’affare chi rendet meda, chi peroe est bistadu frimmadu gratzias  s’interventu lestru de sa politzia. Sos duos zovanos sunt bistados agattados in su logu in su mentres chi funt segande e tribagliande sas prantas. Bloccados mentre funt faghinde su crimene, sunt bistados arrestados cun s’accusa de contipitzu de sustantzias chi abberelant.

Comente at dispostu sa Procura de sa Repubblica de Nugoro, chi tenent in manu sas scruccullas, sunt bistados postos a sos arrestos in domo ispettande s’audentzia de cunvalida. Sas scruccullas sunt andande a daenanti po accrarare si sos duos arrestados faghiant a sa sola oppuru si fagherant parte de una retza meda pius manna. Sos aberguadores sunt abberguande si puru su terrinu esseret bistadu impittadu po atteras prantadas e si bi siant responsabilidades cun atteros po faghere custa attividade illetzida.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22