De seguru in sa die de oe est istadu fatu unu passu importante pro sa Sardigna. Difatis s’àula de su Senadu at dadu su parre a favore a su reconnoschimentu de su printzìpiu de insularidade in Costitutzione.

Est istadu votadu su testu propostu dae sa Cummissione Afares Costitutzionales chi narat “Sa Repùblica reconnoschet is particularidades de is Ìsulas e promovet is mesuras netzessàrias a nche bogare is isvantàgios chi dipendent dae s’insularidade”, sa proposta de lege populare chi at collidu in prus de 200 mìgia firmas intro e in foras de is làcanas de sa Sardigna, cumintzat s’iter parlamentare suo cun unu semàforu birde chi, pro is promotores, tenet unu significu de importu.

Unu momentu istòricu, cun totu is senadores sardos chi ant sustentadu s’initziativa e chi in custos meses si sunt dados de fàghere pro arribbare a su resurtadu de oe, cun is cales festant fintzas is cummissàrios de sa Cummissione ispetziale pro s’insularidade.

In medas ant sutaliniadu chi est una die manna pro sa Sardigna e pro is sardos, sende chi benit bida sa possibilidade de torrare a dare dignidade a sa Sardigna e a totu is sardos.
Pro medas s’arresonu a sa base de sa proposta de lege, cumportat medas costos agiuntivos chi devent èssere cumpensados in nùmene de sa coesione natzionale, cun sa punna de rèndere uguales is puntos de partèntzia de totu is tzitadinos italianos.

Un’istùdiu ispetzìficu de su problema, fatu dae s’Istitutu Bruno Leoni, at cuantificadu in 5.700 èuros a peròmine su costu de s’insularidade pro sa Sardigna: unos 9 milliardos de èuros a s’annu – in cumparàntzia de unu Pil de sa regione chi est de 20 milliardos de èuros -.
Custu su motivu de sa rechesta de sa Sardigna a su Parlamentu: bogare is isvantàgios istruturales atuales acapiados a s’insularidade e chi siat duncas cunsentidu a is sardos de cumpètere a su matessi livellu cun totus is àteros tzitadinos italianos.

De sutaliniare chi sa regorta de firmas sustentada dae ultres 200.000 persones, at rapresentadu e rapresentat una batalla trasversale chi unit totu su pòpulu sardu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Grandu resèssida de Nicola Bartolini in is Mundiales giaponesos de ginnàstica.

S’atleta sardu de sa Pro Patria Bustese faghet prestatzione etzetzionale a su corpus lìberu e divenit campione de su mundu.

S’Itàlia torrat in su pòdiu prus artu a 24 annos dae s’ùrtima vitòria de Yuri Chechi a is aneddos. In s’ispetzializade, in passadu, solu unu brunzu in su 1966 cun Menichelli.

Est su segundu oro asulu in s’istòria: su primu fiat arribbadu in su 1913 cun Giorgio Zampori. Bartolini trìunfat cun su puntègiu de 14.800 (6.2 su Puntègiu D). A palas suas su giaponesu Kazuki Mina•mi (14.766) e su finlandesu Emil Soravuo (14.700).

Su cuartesu si fiat presentadu a s’atu conclusivu cun su segundu puntègiu de calìfica (14.966, 6.2 sa nota de partèntzia) e teniat totu is cartas in règula pro pigare in su pòdiu, ma a sa fine at fatu meda de prus de su chi si pensaiat.

In abrile Bartolini aiat bintu una medàllia de brunzu a is Europeos: de sa rassegna continentale est istadu capassu de artziare su Puntègiu D de bator dètzimos, fundamentale pro pòdere intrare in màssima cumpetitzione internatzionale.

Un’aumentu de is dificultades chi però no at influidu in sa limpiesa de s’esecutzione, su puntu suo de fortza chi fintzas oe dd’at permìtidu de bìnchere cun unu puntègiu netu de 14.800 (6.2).

Sa diferèntzia intre su sardu e totus is aversàrios suos dipendent pròpiu dae custu: s’esertzìtziu suo est dae manuale de su Prùere de Magnèsiu pro sa netesa de is lìnias, sa pretzisione in totu is arribos, is imperfetziones limitadas a s’etzessu,

Duos “avitamentos” e mesu a in antis, dòpiu “càrpiu” cun mesu giru, Tsukahara avitadu. Unu e mesu duos avitamentos, duos e mesu-unu a in antis. Serrada cun unu super triplu avitamentu. Custos is elementos prus significativos de una prova colada oramai a s’istòria e chi aprèsiat a Nicola Bartolini a is mannos de sa ginnàstica artìstica italiana.

Una bella satisfatzione a pustis de sa delusione de no àere pòdidu partetzipare a is Giogos de Tòkyo 2020. Su ginnasta asulu s’est postu a palas aversàrios de bàlia comente su giaponesu Kazuki Minami (14.766, chi moviat dae 6.5), su finlandesu Emil Soravuo (14.700, 6.0), e su sudcoreanu Ryu Sunghyun (14.600)

Attività realizzata col contributo della Regione Sardegna – IMPRENTAS 2020-2021. LR 22/2018, art. 22