At fatu su giru de su Mundu, sa proposta de lege in Tzina, chi diat bòlere punire is babbos de is pitzinnos chi si cumportant male.

Duncas, ant a èssere is mannos puru a èssere punidos pro is atziones de is minores, e ant a dèpere sighire programmas de educatzione familiare.

Sa règula noa est istada numenada “Lege pro sa promotzione de s’istrutzione de sa famìlia”, e at a interessare mescamente su setore de s’iscola, ma non cussu ebbia.

Pro immoe in sa Natzione asiàtica, su babbu e sa mama sunt responsàbiles legales de su fìgiu finas a 16 ebbia, ma cun custa lege noa, ant a rispòndere in manera penale puru.

Ma ite arriscat sa famìlia pro is mancàntzia de is fìgios?

Prima de totu, su babbu e sa mama ant a dèpere pagare una contraventzione finas a 1000 yuan – casi 135 èuros – opuru iscontare finas a 5 dies de presone, a segunda de sa gravidade de su fatu chi est capitadu.

Ma cale est sa punna de sa lege? Su de megiorare sa capatzidade de fàghere bene su babbu e sa mama pro in su rispetu de is valores de su sotzialismu in totu sa Tzina.

Segundu is autoridades natzionales, su problema mannu de is travessuras de is giovaneddos, est sa mancàntzia de un’educatzione familiare bona.

Tocat a nàrrere, chi in sa proposta de lege, sa punitzione no est prevìdida pro su babbu e sa mama ebbia, ma fintzas pro is fìgios issoro. Difatis is minores de 18 annos ant a pòdere impreare is video-giogos un’ora a note ebbia, su chenàbura, sàbadu, domìniga e pro is dies nòdida. Custu pro ite su babbu e sa mama ant a dèpere educare is fìgios a sa salude fìsica e mentale.

Naramus chi totu custas régulas sunt unu pagu graes, pro ite in carchi modu sunt cunditzionende sa libertade de sa famìlia de educare is pitzinnos comente mègius pensat. Ma seguramente, tocat a pensare puru ca in totu su mundu is babbos e is mamas sunt perdende semper de prus su respetu de is fìgios.

Est a beru chi èssere genitores in custa iscuta de tempus no est fàtzile meda.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Abertas e presidiadas totu sas Càmeras de su traballu in Itàlia e addòbiu in sa sede natzionale de Roma.

In custu modu sa Cgil, paris cun is àteros sindacados, rispondet a s’atacu de eris, mentres benit aparitzada una manifestatzione pro sàbadu imbeniente.

Is sindacados: “Cgil, Cisl e Uil ant a organizare sàbadu su 16 de mese de ladàmine in Roma, una manifestatzione manna natzionale e antifascista pro su traballu e sa democratzia”.

Is dirigentes de is sindacados denùntziant chi s’atracu iscuadrista a sa sede natzionale de sa Cgil est a totu su sindacadu cunfederale italianu, a su mundu de su traballu e a sa democratzia nostra.

Pedint chi is organizatziones neofascistas e neonazistas siant postas in is cunditziones de non nòghere isorvende•las pro lege.

Is sindacados afirmant chi custu siat su momentu de afirmare e realizare is printzìpios e is balores de sa costitutzione Nostra. Invitant, duncas, totu is tzitadinos e is fortzas sanas e democràticas de su Paisu a si mobilitare e a calare a pratza sàbadu chi benit.

Maurizio Landini, segretàriu generale de sa CGIL at decraradu chi est istada ferta sa democràtica e ofesa sa Costitutzione. “Sa de eris est una ferta democràtica, un’atu de ofesa a sa Costitutzione nàschida dae sa Resistèntzia, un’atu chi at violentadu su mundu de su traballu e is deretos suos.

Su segretàriu de su sindacadu italianu prus mannu at decraradu in prus chi su de eris est unu disinnu cuncordadu dae grupos organizados chi ant postu in campu un’atzione iscuadrista e fascista e at agiuntu chi si calicunu pensat de fàghere tìmere sa CGIL, su movimentu de is traballadores sunt is chi ant derrotadu su fascismu in custu Paisu, ant torradu a conchistare sa democratzia, duncas non tenet timoria.

Landini at torradu gràtzias a sa Cisl e a sa Uil, difatis is tres siglas sindacales ant detzìdidu chi sàbadu ant a èssere totus unidos in pratza in Roma.

Su segretàriu at torradu a nàrrere chi no est su momentu de istantargiare nen muros nen cungiados in Itàlia e in Europa. Non ddoe at bisòngiu de partzire ma de unire custu Paisu e si podet unire betende a terra is disegualidades e fàghere bìvere is printzìpios fundamentales de sa Costitutzione.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22