Sunt ufitziales totu is resurtados de is eletziones amministrativas chi pertocaiat su rinnovu de is cunsìgios comunales in sete biddas de Ogiastra, cun is tzitadinos mutidos is urnas domìniga 10 e lunis 11 de ladàmine.

In Baunei, su sìndigu nou at a èssere s’abogadu de 47 annos Stefano Monni cun sa lista “Per Baunei e Santa Maria”, chi collit su testimòngiu de su primu tzitadinu betzu Salvatore Corrias, superende su limenàrgiu de su quorum essende s’ùnicu candidadu in campu, in custas votatziones.

Talana, at a èssere ghiada dae Christian Paolo Loddo, 47 annos, dotzente de lìteras in Tortolì, chi s’est presentadu cun sa lista “Talana rinasce nel cuore”. Fintzas in custu casu est bastada sa propassada de su quorum — acontèssidu giai eris sero — e intrat a su postu de su cummissàriu prefetìtziu.

Anna Assunta Chironi si cunfirmat sìndiga de Triei. A sa sìndiga noa, 51 annos, laureada in Giurisprudèntzia, sustentada dae sa lista “Triei Nuova”, est bastadu superare su limenàrgiu de su quorum pro pòdere comintzare su segundu mandadu consecutivu.

In Cardedu su primu tzitadinu nou at a èssere Giacomo Pani, candidadu cun sa lista “Torniamo a costruire il futuro”. S’ex segretàriu de sa CGIL Nùgoro- Ogiastra, 51 annos, at pigadu prus votos de s’ex sìndigu Marco Piras, chi s’est presentadu cun sa lista “Cardedu si rinnova e continua”.

A sa ghia de Lotzorai ddoe at a àere Cesare Mannini chi sèperat a Antonello Rubiu, chi perdet a pustis de duos mandados consecutivos a sa ghia de sa bidda. Su primu tzitadinu nou, geòmetra de 43 annos, s’est presentadu cun sa lista “Noii per Lotzorai Donigala e Tancau”, imbetzes Rubiu, 58 annos ispetore superiore de su Corpus Forestale, fiat sustentadu dae sa lista “Lotzorai bene comune”.

In Ulassa, torrat a sa càrriga de primu tzitadinu Giovanni Soru. Pro s’ingennieri de 67° annos at a èssere su de chimbe mandados, a pustis de èssere istadu a sa ghia de sa bidda de sa Badde de su Pardu in duos diferentes perìodos: dae su 1988 a su 1997 e dae su 2001 a su 2011. Cun sa lista sua “Il Cantiere”, s’est impostu subra su sìndigu betzu Gianluigi Serra – ingennieri fintzas issu – sustentadu dae “Viviamo Ulassai”.

Su disafiu a tres de Tertenia at premiadu su capu de s’esecutivu in càrriga, Giulio Murgia a sa ghia de sa lista “Unidade”. Su geòmetra de 43 annos si cunfirmat sìndigu superende s’imprendidore de 63 annos Francesco Lai, sustentadu dae sa lista “Progetto Tertenia crescere insie,e” e su veteranu de 72 annos professore in cungedu, Guido Pisu, chi s’est presentadu cun sa lista “Per volare alto”.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

S’Itàlia est lòmpida a su de tres postos in sa Lega de is Natziones, a pustis àere bìnchidu 2-1 contra su Bèlgiu in su Juventus Stadium de Torino.

Su matessi resurtadu de sa partida de is Europeos, cun s’Itàlia chi at torradu a agatare su bellu giogu fatu bìdere custa istade colada.

Pro is òmines de Roberto Mancini is retes sunt istadas marcadas dae su sardu Barella e dae Berardi – gràtzias unu rigore -, imbetzes pro sa natzionale belga su gol est istadu realizadu dae De Ketelaere.

In veridade tocat a nàrrere chi s’iscuadra foras de domo at corpidu unu palu e duas traversas cun is giogadores Saelemaekers, Batshuayi e Carrasco.

In custa gara, pro sa prima borta, su portieri Donnarumma at postu sa fàscia de capitanu de is asulos, e a diferèntzia de sa partida in s’istàdiu Meazza, acanta fiat istadu pigadu a sùrvios pro more de àere lassadu in malu modu su Milan – sa gente in is gradinadas dd’at fatu festa.

In sa gara contra su Bèlgiu s’allenadore Mancini at fatu giogare un’iscuadra giòvana, cun òmines chi ant tentu pagu ispàtziu in is Europeos. Custa est istada una cosa importante meda pro su tempus benente, comintzende dae is partidas de cualificatzione a su Mundiale in Qatar in s’atòngiu de su 2022.

Comente in s’ùrtimu Europeu chi s’Itàlia at bìnchidu contra s’Inghilterra, su juventinu Chiesa est istadu unu de is mègius giogadores, e at mustradu chi cando istat bene est difìtzile a ddu firmare.

Tzertu, cussu chi mancat a custa natzionale asula, est unu tzentru a in antis balente meda, a s’imbesse su tzentru-campu e sa defensa sunt repartos de livellu mundiale.

Imbetzes sa finale de sa Lega de is Natziones est istada bìnchida dae sa Frantza chi at superadu s’Ispagna cun su resurtadu de 2-1, gratziàs is retes marcadas dae Benzema e Mbappé. Pro is ispagnolos at realizadu su gol Oyarzabal.

Sa natzionale frantzesa sutzedet in s’albu de oro a su Portogallu de Cristiano Ronaldo.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22