Tzitade de su Mèssicu iscòstiat s’istàtua de Cristoforo Colombo.

Difatis su monumentu dedicadu a s’esploradore italianu no at a torrare a su logu suo, in uno de is caminos prus importantes de sa tzitade.

A ddu fàghere a ischire est sa sìndiga Claudia Sheinbaum, chi at sutaliniadu chi fiat istada remòvida pro unu traballu de restàuru, ma a pustis de su chi est sutzèdidu a àteras istàtuas de àteros pessonàgios sìmbulu de su colonialismu, s’est pensadu chi serbit una riflessione.

Tzertu Colombo, pagu nch’intrat cun s’istòria messicana, sende chi no est mancu arribbadu a tocare su territòriu de cussa natzione, ma oe ddoe tenet unu dibàtitu subra s’istragu a dannu de is populatziones indìgenas acontèssidu a càusa de su colonialismu, a pustis de s’iscoberta de su Mundu Nou fata dae su navigadore genovesu.

Custu su motivu de sa rimotzione definitiva de s’istàtua, chi duncas no at a torrare in sa peagna sua. Tocat a nàrrere chi su monumentu fiat istadu giai iscalabradu durante is protestas de su 1992, in ocasione de s’anniversàriu de is 500° annos dae s’arribu de Colombo in is Amèricas.

In càmbiu de su Columbus Day, in Mèssicu si festat sa Dia de la Raza, su 12 de ladàmine, una festa chi reconnoschet s’eredade mista indìgena e europea de su Mèssicu.

Pro onorare cuddas tziviltades precolombianas, s’iscultore Pedro Reyes at a creare un’istàtua de una fèmina olmeca. Si pensat chi su pòpulu olmecu siat una de is primas tziviltades mannas chi aiat bìvidu in su territòriu chi immoe est su Mèssicu.

“Est importante meda dedicare unu monumentu a is fèminas indìgenas e a sa Terra, ca si calicunu nos podet insegnare comente nos pigare cura de custu pianeta, sunt is pòpulos nativos nostros, e est pròpiu custu su su chi depimus torrare a imparare”, at naradu s’iscultore.

A ogna contu s’istàtua de Colombo no at a èssere isciusciada: at a bènnere iscostiada ebbia a su Parque America, unu pagu prus pagu in bista, in unu parcu de unu bighinadu.

Duncas prus de un’adiosu, si tratat de una tràmuda: in calicunu modu s’esploradore italianu sighit a “si mòvere”.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

In su Meilogu, in su pranu de Capu Abbas chi est istada numenada sa “Badde de is Nuraghes” in su XX seculu – pro sa presèntzia de trinta nuraghes e deghe tumbas de gigante – semus andados a bisitare su Nuraghe de Santu Antine, in su sartu de Turalva.

Custa est s’istrutura prus imponente de sa zona, una prenda de s’architetura ispantosa a beru, chi faghet cumprèndere s’arte fraigadora balente de su populu nuràgicu.

Su Nuraghe de Santu Antine, connotu puru comente sa Domu de su Re, est fraigada cun rocas de pedra niedda traballadas e est artu 17 metros.

Ph: Roberto Anedda

Custu casteddu-fortalesa chi dòminat totu sa badde, est costituidu a su tzentru dae una turre de tres pianos, cun diàmetru de 15 metros, e a inghìriu ddeo est unu bastione de ghetu triangulare cun àteras tres turres.

Ph: Roberto Anedda

Su turrione est istadu fraigadu in su 1800 a.C. e a pustis in su 1600 a.C. sunt istadas pesadas is àteras istruturas. In is tempos colados antigos su Nuraghe de Santu Antine fiat galu prus mannu, sa turre tzentrale fiat arta casi 25 metros. Is passadissos e is iscalas cunservant galu s’amaju: sunt ispantosos pro sa mannària e sa bellesa ùnica.

Ph: Roberto Anedda

Nois chi amus tentu sa sorte de ddoe intrare a intro, nos semus intesos piticos e incantados comente chi esseremus corpidos dae sa sìndrome de Stendhal.

A parte de foras de su fortalesa ddoe est su chi abbarat de unu biddighedda cun 14 pinnetos, chi est istada travigada fintzas a su tempus de is antigos romanos.

Ph: Roberto Anedda

De is pinnetos, su prus importante est s’aposentu de sa s’acorru, in ue sunt istados agatados is “panes” de brunzu, chi immoe sunt allogados e in mustra a su Museu Sanna de Tàtari. Is àteros repertos si podent amirare in su Museu de sa Badde de is Nuraghes de Turalva.

Ph: Roberto Anedda

Pro lòmpere a custu logu bastat a pigare s’istrada statale 131 puru e pustis una pariga de chilòmetru dae su cartellu pro su Nuraghe, lassadu su caminu prus mannu de Sardigna, semus arribados.

Pro cussos chi no ant bidu custos logos amus detzisu de pònnere calicunu vìdeu e unas cantas fotografias.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22