Dae su 6 austu s’at a pòdere intrare solu cun sa tèssera birde, in zona bianca, in cale si siat esertzìtziu chi fatzat ristoratzione a sa mesa e a su serradu; a ispetàculos pùblicos, eventos e cumpetitziones isportivas; museos, mustras e eventos culturales; pischinas, palestras e tzentros benèssere (fintzas in istruturas retzidoras ma solu a su serradu), sagras fieras cunvegnos e cungressos: tzentros termales, parcos temàticos e de disaogu; tzentros culturales, sotziales e ricreativos; salas de giogu, salas de iscummissas, bingo e casinò; cuncursos pùblicos.

Si leghet in su decretu varadu in custas dies dae su Consìgiu de is ministros. Custos disponimentos “s’àplicant fintzas in is zonas groga, arantzu e ruja, acanta is servìtzios e is fainas siant cunsentidos e a is cunditziones previstas pro is sìngulas zonas”. Non s’àplicant imbetzes «a is sugetos esclusos pro edade dae sa campagna.

Sa Tzertificatzione birde COVID-19 est recherta in Itàlia pro partetzipare a is festas pro tzerimònias tziviles e religiosas, atzèdere a residèntzias sanitàrias assistentziales o àteras istruturas, pro s’iscostiare in intrada e in essida dae territòrios classificados in “zona ruja” o “zona arantzu”.

Su passaportu birde at a dèvere atestare de àere fatu a su mancu una dose de vatzinu opuru èssere resurtados negativos a unu tampone molecolare o lestru in is 48 oras pretzedentes opuru de èssere sanados dae COVID-19 in is ses meses a in antis.

Sa Tzertificatzione birde COVID-19 no est recherta a is pipios esclusos pro edade dae sa campagna vatzinale e a is sugetos esentados in sa base de idònea tzertificatzione mèdica. Pro custas persones at a èssere creada una Tzertificatzione digitale dedicada. Fintzas a cando custa no at a èssere disponìbile, podent èssere impreadas cussas emìtidas in paperi.

Sa Tzertificatzione birde COVID-19 pro vatzinatzione (prima dose) benit generada in manera automàtica dae sa Prataforma natzionale-DGC a pustis de 12 dies de sa sumministrada e est bàlida dae de 15° die de su vatzinu finas a sa data de sa segunda dose.

Sa Tzertificatzione a pustis de sa segunda dose at a èssere emìtida intro 24/48 oras dae sa segunda suministratzione e at a èssere bàlida 9 meses.

Sa Tzertificatzione birde COVID-19 semplìficat s’intrada in Itàlia dae is Paisos de s’Unione europea e dae àteros Paisos de s’àrea Schengen.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Sa Sardigna brusiada dae su fogu: sa terra infoddinada e su chelu cuadu dae su fumu e dae su chinisu.

Medas is domos evacuadas in su coro de sa note e aziendas agrìculas distruidas. Is fogos in 24 oras si che ant papadu 20 mìgia ètaros de vegetatzione e custrintu mìgias de persones a abbandonare is abitatziones issoro. Is disacatos provocados, mannos meda, non sunt galu istados cuantificados, ma s’ipotizat superent is milliardos de èuros.

Sa provìntzia de Aristanis intre su Sinis e su Montiferru est sa prus corpida dae is fogos essidos in is dies coladas. Un’apocalisse de fogu chi at ispintu sa Regione a decrarare s’istadu de calamidade pro deghinas de comunos.

Sa Protetzione Tzivile, in is dies coladas, aiat mandadu s’allarme “fogos” in bona parte de s’Ìsula pro sa die de sàbadu 24, cun su livellu de arriscu, coladu dae “artu” a “estremu”, cun alerta màssima pro su Sulcis, s’Aristanesu e sa Sardigna tzentrale.

Is pampadas, ispintas dae su bentu e in una die cun una temperadura de belle 40 grados, ant investidu su Sinis e su Montiferru, est ue si sunt registrados is majores disacatos.

Campos e forestas, buscu e àrbores seculares sunt istados brusiados totu. Ma fintzas aziendas agrìculas e infrastruturas. In sa serada de sàbadu su fogu est arribbadu a Santu Lussùrgiu e Cùllieri, acanta sunt istadas evacuadas unas cantas famìlias. Sunt intrados in atzione 5 canadair, elicòteros e un’esèrtzitu de òmines a terra formadu dae Vìgiles de su fogu, agentes forestales e personale de s’Agèntzia Forestas, in servìtziu note e su mangianu.

Fogos sunt essidos fintzas in àteros tzentros de s’ìsula, comente Fonne e Àrthana, in ue ant intervènnidu elicòteros e canadair.

Is rapresentantes de Coldiretti ant faeddadu de una bera e catàstrofe, ispieghende a àere tentu dannu dae su fogu, sunt istados prus che totu is allevadores, impinnados in una cursa contra su tempus fintzas durante sa note pro recuperare is animales, medas mortos brusiados.

Un’inferru ambientale cun chentinas de ètaros de èlighes, ròales e suèrgios seculares andados in fumu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22