Sunt belle 180 is vìtimas in is aundaduras chi ant corpidu sa Germània otzidentale, s’Olanda e su Bèlgiu su 14 e 15 de argiolas, bilantzu destinadu a aumentare, ca medas sunt mìgias is ispèrdidos.

Una catàstrofe chi at sutaliniadu s’importu de cuntrastare su cambiamentu climàticu. Custu apretu est istadu fintzas a su tzentru de is interventos cummoventes de Angela Merkel, chi guvernat sa natzione prus corfida.

Custa emergèntzia est istada remonada in totu sos mediàs, sende chi est su tema de su momentu, bidu chi est capitada pròpiu a presu de su G-20 subra su clima, fissadu pro su fine mese de argiolas in Nàpoli.

S’addòbiu s’est serradu cun un’acòrdiu non totale, sende chi no est istada detzisa un’iscadèntzia pro s’eliminatzione de su carbone, obietivu chi però est istadu cumpartzidu dae totus.

Epuru, pro su chi interessat is alluviones tedescas, s’apretu climàticu podet forsis ispiegare medas cosas, ma non totu, sende chi sa catàstrofe fiat istada prevìdida e lantzadu s’allarme.

Difatis su primu avertimentu chi sa Germània fiat pro èssere corpida dae una temporada mala chi diat àere pòdidu causare un’alluvione manna, est istadu dadu dae su servìtziu meteorològicu de su Paisu su 12 trìulas, belle tres dies in antis de sa disgràtzia.

Fiat istadu generadu unu modellu de previsione chi previdiat cun prus su 90% de seguresa e una pretzisione finas a 2 chilòmetros cuadrados chi una sèrie de comunidade de sa Germània otzidentale diat èssere istada corpida cun probabilidade dae graves aundaduras intro mèrcuris.

S’alluvione tedesca at gasi alimentadu s’apretu de su cambiamentu climàticu, pernu tzentrale de sa polìtica globale. Is tedescos non si subenent una calamidade naturale sìmile in s’istòria reghente issoro. Is disacatos sunt istados mannos, s’allegat de milliardos de èuros de dannos, ma is peus cunsighèntzias devent galu lòmpere. E non si cumprendet solu in su sentidu chi andat identificada sa resone de una sìmile catàstrofe: su momentu si faeddat prus a prestu de su sistema malu de avisu de catàstrofes imbenientes.

Is cunsighèntzias, però, interessant fintzas s’isfera polìtica. Eja, polìtica, ca tra una pariga de meses in Germània ddoe ant a èssere is eletziones.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Semper prus a probe s’òbrigu de su passaportu birde pro sos logos a arriscu de ammuntonamentu.

Difatis sa proposta at otentu su parre a favore de is presidentes de Regione. E cras su guvernu at a aprovare su decretu chi imponet fintzas s’òbligu de presentare, in zona bianca, sa tzertificatzione birde pro ispetàculos, biàgios e isport.

Ancora de definire si sa medida at a corpire sos ristorantes a su serradu, ma s’idea est cussa de prevìdere unu passaportu “lèbiu” pro chie at fatu una dose vatzinale ebbia, opuru su tampone negativu fatu in is ùrtimas 48 oras.

Custa diat èssere sa cunditzione indispensàbile pro cambiare is paràmetros chi mesurant sas zonas de arriscu e poderare totu s’Itàlia in zona bianca durante s’istiu.

In s’ora sa variante Delta de su virus sighit a s’ammanniare cun sos contàgios creschent ogni die, e su nùmeru de vatzinados aumentat a pagu meda.

Segundu is ùrtimos datos trasmìtidos dae s’Istitutu superiore de sanidade, cun is paràmetros de immoe unas cantas Regiones diant torrare in zona groga giai dae chenàbura. Sunt is àreas acanta su pesu de is contagiados noos est prus importante.

Cun su sistema nou custu indicadore no at a èssere prus fundamentale. A contare at a èssere prus che totu su nùmeru de ricoverados in àrea mèdica e in terapia intensiva. Su guvernu pensat a una pertzentuale de su 5% pro is terapias intensivas e de su 10% pro is repartos mèdicos. Is Regiones pedint de artziare custas pertzentuale a su 20 e a su 30 %. Sa cabina de regia cunvocada pro oe at a dèpere fissare su lìmite màssimu, e detzìdere sa lista de is logos acanta s’at a dèpere intrare cun su tzertificadu.

S’isetat sa detzisione de su guvernu, chi oe at a pònnere in s’elencu fintzas is trenos a percurrèntzia longa, is aeroplanos e sas naves.

S’òbrigu de su passaportu birde serbit a poderare abertas is atividades, ma fintzas a permìtere s’intrada de prus persones in is logos a su serradu. In is tzìnemas e in is teatros at a tocare a ddu presentare a s’intrada, ma no at a èssere indispensàbile a lassare postos bòidos tra un’ispetadore e s’àteru e is salas ant a pòdere èssere prenas totu.

In su mentres su tema in discussione in su guvernu est cussu de s’òbligu vatzinale in is iscolas. S’abetat su parre de su Comitadu tècnicu sientìficu.

Is presidentes de Regione isperant chi su guvernu racumandet sa vatzinatzione pro su personale iscolàsticu e universitàriu, siat dotzente siat tècnicu-amministrativu e mescamente chi, in casu orìgines pandèmicas in iscola, si fatzant sighire is letziones in presèntzia a su mancu a chie tenet su passaportu birde.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”