S’aberint is ghennas de su càrtzere pro Giovanni Brusca, lòmpidu a fine pena.

S’òmine chi at prèmidu su telecumandu a Capaci e fatu iscagiare in s’àtzidu su piticu Giuseppe Di Matteo est, cun totu is cautelas previstas pro unu personàgiu che a issu, una persone lìbera.

Custu ispresonamentu, comente si podet immaginare, at iscasiddadu medas crìsticas de s’opinione pùblica.

Is familiares de is vìtimas aiant giai naradu su chi nde pensat s’annu coladu, cando est essia a campu su problema de pònnere in libertade unu criminale che a Brusca, apanigiadu “iscannacristianos”.

Tocat a nàrrere chi a Brusca, sende unu collaboradore de giustìtzia, sunt istados aplicados os benefìtzios previstos pro is pentidos definidos “afidàbiles”.

In su càrculu de is cundennas a càrrigu de Brusca, in totale is annos de iscontare arribbaiant a 26 – fiat istadu arrestadu in su 1996 -.

Ma sa cundenna s’est incurtzada ancora pro sa “bona cunduta” a pustis de chi a Brusca fiant istados cuntzèdidos unas cantas dies prèmiu de libertade.

Immoe però s’aberit unu casu complicadu de gestione de sa libertade de su capu e de is familiares suos. Is servìtzios de vigilàntzia, ma fintzas de protetziones prevìdidos dae sa lege, ant a dèvere tènnere contu de is medas delitos e de is istragos chi Brusca etotu at cunfessadu.

No at ammìtidu petzi de àere coordinadu is preparativos de s’istrage acanta sunt mortos Giovanni Falcone, sa mugere Francesca Morvillo e tres òmines de s’iscorta. At cunfessadu numerosos delitos in sa zona de San Giuseppe Jato. Ma prus che totu at ammìtidu is responsabilidades suas in su rapimentu e in sa morte de Giuseppe Di Matteo, su fìgiu de trèighi annos de su collaboradore Santino Di Matteo.

S’ispresonamentu de Brusca torrat a abèrrere una ferta dolorosa pro s’Itàlia, mancari is rivelatziones suas ant permìtidu de aviare medas protzedimentos chi ant fatu craresa in sa gosi mutida “tratativa” intre Istadu e màfia. Ma mancari prevìdida dae sa lege pro is collaboradores de giustìtzia, vistos is delitos malos de s’ex capu e su passadu suo, est una noa chi nemos diat àere bòlidu mai intèndere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Unu de is eventos musicales prus abetados de s’istade sarda non s’at a fàghere a càusa de sa pandemia.

Sa manifestatzione musicale chi tenet comente teatru sas Rocas Rujas de Arbatassa, chi fiat brincadu peri s’annu, non s’at a fàghere mancu ocannu.

S’annuddamentu de su 2021 est ligadu a sa pandemia de su Covid-19 e a is cunsighentes limitatziones, e at a èssere unu dannu mannu pro totu s’economia de s’Ogiastra.

A ddu fàghere ischire sunt istados is organizadores etotu in is retes sotziales, chi a dolu mannu ant detzìdidu de de rinviare su Red Valley Fèstival a s’istiu 2022.

A su chi s’ischit, sa de ser editziones de s’eventu at a torrare a tènnere bator datas, dae su 12 a su 15 de austu 2022.

Is organizadores impromitent de torrare cun medas novidades. In custos annos su “Red Valley Fèstival” est devènnidu unu de is eventos prus amados e importantes de su cartellone istadiale de sa Sardigna.

Sa manifestatzione musicale chi s’acumprit in sa chida de mesaustu in sa pratza de is Rocas Rujas at acasagiadu in is ùrtimos annos artistas de su càlibru de Gigi de Agostino, Dark Polo Gang, Albertino, Fargetta, Mollello, Prezioso, Steve Aoki, Will Sparks, Emis Killa, Salmo, Sean Paul.

In is dies de su fèstival sas localidades de sa costa ogiastrina si prenaiant a isticu de giòvanos arribbados dae totu s’Ìsula e dae Itàlia, cun Arbatassa invàdida dae una truma manna de persones.

A is chi ant giai comporadu billetes de custa editzione, oramai brincada, is organizadores ant pedidu de ddos arrimare e de tènnere unu pagu de passièntzia.

Difatis intro su 30 làmpadas 2021 is titulares de is billetes e de is abbonamentos ant a retzire una comunicatzione ufitziale cun posta eletrònica e sms cun is inditos de su chi ant a dèpere fàghere.

Isperamus pro s’annu benente chi s’at a fàghere galu prus bellu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”