Su sìndigu de Baunei, Salvatore Corrias, at emanadu un’ordinàntzia noa pro regulare s’intrada a is plajas de Cala Goloritzé, Cala Ispuligidenie, Cala Birìala e Cala dei Gabbiani.

Difatis at a èssere limitadu su nùmeru de is persones chi ant a pòdere intrare in s’arenile, cun oràrios pro s’intrada e mascareddas obligatórias.

Unu provedimentu sàbiu pro custu bìculu de terra de s’Ogiastra, chi est abarradu belle ìnnidu, chi s’at a podere bìdere segundu mesuras pretzisas.

S’at a pòdere lòmpere a Cala Goloritzé dae s’àndala de su monte ebbia e at a serbire s’aplicativu pro prenotare 72 oras a in antis in custu paradisu, acanta ant a èssere possìbiles isceti 250 presèntzias a sa die. Is nùmeros de is postos a dispositzione a Cala Biriala e Cala dei Gabbiani imbetzes ant a èssere 300, mentres sunt 700 cussos permìtidos pro Cala Ispuligidenie.

A Cala Sisine, at a èssere possìbile una presèntzia de 1500 turistas, pro ite est prus manna meda de is àteras plajas, e duncas sunt rispetadas is régulas mìnisteriales contra s’ispàinu de su Covid-19.

Ocannu a diferèntzia de s’annu coladu, est istadu postu s’oràriu de permanèntzia chi s’at a pòdere abbarare in s’arenile: un’ora e mesu pro is turistas chi ant a lòmpere cun is barcas mannas chi movent dae Arbatassa, Santa Maria Navarresa, Cala Gonone e Sa Caleta de Thiniscole. Imbetzes est cunsentida pro 70 minutos ebbia, sa pàsida a chie at a arribare cun su barca minore a nolègiu.

Pro immoe non s’ischit comente at a èssere regulada s’ispiàgia de Cala Luna, chi est a làcana tra is comunos de Baunei e Durgali.

Semus seguros chi est una cosa sàbia andare a bìdere custa bella marina ogiastrina cun is abbas lìmpidas a ue s’arribbat in barca opuru a pee colende dae su monte, cun nudda gente a incarcu duncas, pròpiu comente narant is disponimentos pro s’atrèmenu de su coronavirus.

A pompiare chi is regulas siant rispetadas ddoe sunt is barratzellos e is vìgiles chi tenent s’incàrrigu de costoire unu de in ungrones prus galanos de sa Sardigna.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Pro sa prima borta, a pustis de is eletziones USA de su 2020, su presidente americanu Joe Biden e su russu Vladimir Putin, s’ant a atopare a Ginevra in ocasione de su cungressu de su G7.

Sa data est belle detzisa, at a èssere su 16 de su mese de làmpadas e s’at a fàghere in unu logu segretu – pro immoe – a pustis de sa reunione de is sete Istados economicamente prus avantzados de su Mundu.

In custas dies is espertos de sa seguresa de USA e Rùssia sunt traballende pro aparitzare s’atopu cara a cara tra is duos presidentes de is pòtentzias nucleares prus mannas de sa Terra.

At a èssere s’ocasione pro betare abba a su fogu de is brigas, a pustis de is faeddos de Biden contra su capu russu chi dd’at acusadu de èssere unu mortore, e Putin chi dd’at torradu chi chie acusat a calicunu de èssere un’omitzida est dàbile chi ddu siat issu etotu.

Tzertu, tocat a nàrrere chi in custos meses colados is diplomàtzias de is duas natziones ant traballadu meda e custu atòbiu est su resurtadu de is isfortzos pro agatare un’arresonamentu prus serenu.

Unu fatu chi isperant puru is àteros Paisos de su Mundu, cumbintos chi sa lìnia polìtica de is duos presidentes de is potèntzias nucleares prus mannas diat èssere prus pagu treulada, pro sa seguresa de totus.

Naramus chi a pesare in custa situatzione ddoe est su casu Navalny, su dissidente printzipale de Putin chi est galu in càrtzere, e is acusas de is servìtzios segretos americanos a sa Rùssia, chi diat àere chircadu de cunditzionare is ùrtimas eletziones presidentziales.

Is partes in càusa pro immoe ant naradu chi custu atòbiu USA-Rùssia no at a èssere istòricu e mancu at a cambiare is sortes tra is duos Paisos, ma at a chircare de fàghere cumprèndere prus bene sa situatzione internatzionale e a pònnere a seguru sa zona euro-atlàntica.

Amus a bìdere nd’at a essire dae custu cungressu in tema de is deretos umanos e chi ant a megiorare is canales de comunicatzione e de cooperatzione de is duas natziones.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”