A pustis de sa vitòria cun su Parma, su Casteddu torrat a bìnchere a Ùdine.

A sa Dacia Arena, is sardos sunt resèssidos a brincare s’Udinese pro 1-0 gràtzias a unu tiru de rigore realizadu de Joao Pedro a su 10’minutu, pro more de unu tiru faddidu de Molina a pitzu de su defensore ruju-blu Carboni.

Su brasilianu at iscutu sa botza bia su palu de su portieri biancu-nieddu Mussu, chi però at intzertadu s’àngulu giustu, ma su tiru fiat forte e pretzisu a beru.

Est istada una partida sacrificada meda pro is òmines de Leonardo Semplici, chi contras is friulanos at conchistadu àteros tres puntos – ses in chimbe dies – e in custu modu tenent un’isperàntzia in prus de pòdere sarbare sa permanèntzia in sa màssima sèrie.

Su Casteddu at àpidu duas ocasiones mannas pro marcare gol in su primu tempus: torra cun su capitanu Joao Pedro chi at fatu unu bella rete – chi però s’àrbitru at annulladu – e cun s’atacante Pavoletti chi at pitzigadu unu palu. Ma is meres de domo cun su matzèdone Nestorovsky in su segundu tempus ant proadu a adderetzare sa partida: prima su portieri ruju-blu Vigorito est istadu sarbadu dae sa traversa, e a pustis s’atacante biancu-nieddu no at pitzigadu sa porta mancari dae positzione bona.

Sa vitòria finale est unu triunfu pro is sardos e unu grandu prègiu pro is tifosos casteddajos, chi immoe isperant galu de prus chi s’iscuadra si potzat sarbare dae sa ruta in Sèrie B.

Pro sa partida benente in su retàngulu birde de sa Sardigna Arena, su Casteddu si dd’at a bìdere cun sa Roma.
Is òmines de Fonseca si presentant in s’Ìsula de muta bona, a pustis de su 1-1 contra s’Atalanta. In sa partida chi benit s’at a bìdere si is sardos ant a èssere galu perigulosos e cuntzentradu gosi comente cumandant su presidente Giulini e s’allenadore Semplici.

A is meres de domo at a mancare Nainggolan a tzentru-campu, pro more de una giorronada de iscualìfica, a pustis de unu cartellinu grogu chistidu contra de s’Udinese. Ma mancari sena su belga, is òmines de Semplici ant a dèpere fàghere de totu pro bìnchere, si bolent sìghire a abarrare in su màssimu campionadu de fùbalu natzionale.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Est durada pagu prus de 48 oras, sa Superlega presentada s’àtera note de 12 sotziedades tra is prus famadas de su mundu.

Unu campionadu europeu in ue diant a dèpere giogare 20 iscuadras europeas, 15 fissas e àteras 5 a mudas, a segundu de is resurtados de s’istajone colada.

Is sotziedades fundadoras sunt: ses inglesas – Arsenal, Chelsea, Liverpool, Manchester City, Manchester United e Tottenham -, tres italianas – Internazionale, Juventus e Milan – e tres ispagnolas – Atletico Madrid, Real Madrid e Barcellona -.

A pustis chi su presidente de sa UEFA Aleksander Ceferin e su presidente de sa Fifa Gianni Infantino ant incumintzadu a ameletzare custas iscuadras, is federatziones natzionales ant declaradu de nde bòlere bogare custas iscuadras dae is campionados.

Is governos puru ant criticadu custu progetu nou e su primu ministru inglesu Boris Johnson at naradu de bòlere fàghere una lege contra sa Superlega.

Pròpiu is iscuadras inglesas si sunt torradas a pensare in deretura e ant decraradu chi no ant a giogare in su campionadu europeu nou pro club.

A pustis de custu fatu, s’Inter puru nd’est essida a foras dae su progetu, e comente a naradu su presidente de sa Juventus Andrea Agnelli, at a èssere difìtzile fàghere partire sa Superlega.

Tzertu de custa istòria ant a abarrare is faeddos de fogu chi su presidente Ceferin at tentu pro sotziedades chi diant àere aderidu a sa liga de is iscuadras prus ricas. Difatis sa Banca J.P. Morgan fiat pronta a investire dinare meda.

Ma immoe e ite at a capitare? Is iscuadras chi ant firmadu in favore de sa Superlega ant a pagare calicuna penale? Est seguru ca su fùbalu est passende tempos malos meda, e pro more de sa pandemia su dinari est semper prus pagu.

Ma sa chistione seguru chi no acabbat inoghe, e is chidas chi benint amus a bìdere àteros trèulos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”