In Sardigna, ùnica regione “bianca” de Itàlia, si pedit a is istitutziones prus controllos pro chie isbarcat in s’ìsula.

A parte prus controllos, si pedit de sighire s’esèmpiu de sa Badde de Aosta, pro ite sa timoria est chi cun is arribos, motivados dae sa netzessidade de andare a is segundas domos, potzat causare un’undada noa de contàgios.

Si pedit duncas prus atentzione e prus rigore cun is chi lompent a Sardigna e su rispetu de su chi est prevìdidu dae s’ordinàntzia in vigèntzia: s’òbligu de registratzione in su portale o aplicativu de sa Regione, tzertificadu de vatzinatzione o negatividade dae presentare a s’imbarcu o, a s’imbesse, tampone a s’isbarcu, esàmene de negatividade intro is 48 oras o cuarantena pro 10 dies.

Su presidente regionale de s’Anci, Emiliano Deiana, sollìtzitat fintzas provedimentos prus severos e s’aùgurat chi sa Regione Sardigna a pitzu de sa chistione pighet una positzione contrària crara, forte e unitària.

Pedit chi s’adotet un’ ordinàntzia gosi comente at fatu sa Badde de Aosta, sende chi cun custas persones si movet fintzas su virus.

Deiana at evidentziadu chi a bisu suo, dae una zona ruja depat èssere proibidu a s’iscostiare conca a una zona bianca, grancu pro motivos de salude e pro traballu, e solu pro chie at giai fatu su vatzinu.

Su presidente Anci Sardigna s’àugurat chi su Guvernu etotu s’impinnet a fàghere sua custa prospetiva de bonu sensu.

Deiana isperat chi bèngiat torrada a bìere sa detzisione de permìtere a is tzitadinos de s’iscostiare dae is zonas rujas a is segundas domos in Sardigna. Annotamala pedit chi, si esseret a colare s’ipòtesi guvernativa de cunsentire is iscostiamentos, in s’ordinàntzia regionale, siat obligatòria sa previsione chi is biagiadores si potzant sutapònnere a proas in is 48 oras imbenientes a s’intrada e in manera obligatòria si sutapònnere a sa proa prima de sa partèntzia .

S’arresonu de Deiana partit dae s’idea chi sa zona bianca si depat tutelare in cale si siat modu, pro ite s’Ìsula non si podet permìtere de pònnere in perìgulu s’economia sua chi in custa parte de s’annu si basat in su turismu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu at paregiadu 2-2 contra sa Sampdoria, a pustis de una partida bella a beru.

Is sardos, pro comente si fiat posta sa gara in su segundu tempus, torrat dae Genova cun unu puntu de oro.

Difatis is òmines de Semplici sunt resèssidos a colare in vàntagiu – in su primu tempus – gràtzias a su gol de su brasilianu Joao Pedro, a pustis de unu tiru lestru chi at coglionadu su portieri Audero.

Ma s’iscuadra doriana de s’ex allenadore Ranieri, òmine sabiu meda, at reagidu in is ùrtimos 25′ minutos de giogu, marchende duas retes.

Prima cun una calada de pee de su tertzinu Bereszynski e poi cun un’àteru tiru de s’atacante Gabbiadini – intradu in campu pagos minutos a in antis -.

Immoe i sardos non sunt prus s’iscuadra iscambada e sena gana de gherrare de is chidas coladas: sun prus unidos e sunt renessende a fàghere bìdere totu su caràtere issoro.

Custu assentu at fatu lòmpere is casteddajos a su parègiu a sa coa de sa partida, gràtzias a Nainggolan – su giogadore prus famadu de is ruju-blu – chi at marcadu su gol de su 2-2.

Pregiadu meda pro su resurtadu s’allenadore nou Semplici, chi at fatu is complimentos a is òmines suos, ma sena festare meda, antzis, pensende a sa partida benente.

Su Casteddu at a giogare contra sa Juventus in sa Sardigna Arena, ca eris est istada bogada dae sa Copa de is Campiones pro manu de is portoghesos de su Porto.

Pro is sardos at a èssere una partida isconchiosa meda pro ite is biancu-nieddos ant a èssere afelonados ca non sunt resèssidos a adderetzare su resurtadu de andada de sa manifestatzione de Fùbalu prus importante in Europa.

Ronaldo puru, su mègius giogadore de Sèrie A, eris at delusu, e seguru at a bòlere fàghere bìdere su valore suo pròpiu contra is sardos.

Sa partida chi benit no at a èssere fàtzile duncas. Su Casteddu at a dèpere donare cura a non repìtere is matessi isbàllios de sa partida pèrdida contra s’iscuadra de Pirlo in su girone de andada e proare a regalare una bella satisfatzione a is tifosos sardos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”