Sa pandemia de su Covid-19 at cambiadu su modu de colare su tempus lìberu e prus che totu is abitùdines de is biagiadores.

Bitu chi non si podent programmare prus perìodos longos de de vacàntzia in logos esòricos e a tesu meda, nois sardos nde podent aprofitare de connòschere mègius s’ìsula Nostra.

Sa Sardigna est un’istùgiu prenu de siddados cun bellesas ambientales e logos de incantu. In custas dies semus andados a Sòrgonu, a bìere sa bella crèsia de sartu intitulada a Santu Màuru, a pagos chilòmetros dae sa bidda.

Calicunu espertu de istòria narat chi est istada fata a inghìriu de su 1120 pro manu de is mòngios benedetinos, imbetzes calicun’àteru narat chi siat de època aragonesa.

Sa primu fonte istòrica ufitziale de s’edifìtziu est de su 1574. Pro fraigare sa cresiedda sunt istadas impreadas pedras traballadas de epoca diversas, fintzas de perìodu nuràgicu.

Su santuàriu de Santu Màuru est assetiadu in sa zona de su monte Lisai, in unu logu ammajadore a beru.

Sa cresiedda tenet una pranta retangulare cun una fatzada arta deghe metros e fraigada in pedra mòlina. Su portale mannu de istile tardu-manierista abrontat in un’iscala manna cun a costadu duos leones chi poderant s’istemma de Aragona.

Comente si lòmpet a dae in antis de sa crèsia sa primu cosa chi si biet est su rosone in istile romànicu chi cun duos metros de raju, resurtat su prus mannu de s’Ìsula.

Ma su santuàriu no est formadu de sa crèsia ebbia: difatis s’istrutura de cultu faghet parte de unu cumplessu architetònicu prus mannu acanta sunt presentes is cumbessias, o muristenes. A unu tempus custos fràigos beniant impreados pro allogiare is pellegrinos o is bendidores in is dies de festa. Santu Màuru si costumaiat a festare s’ùrtima domìniga de maju e a is primos de mese de làmpadas pro sa sagra a issu dedicada.

Foras de su santuàriu de cultu cristianu, ddoe est una pedra fita chi benit dae sa tumba de Gigantes de Funtana Morta, a pagu tretu de sa cresiedda.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

S’ex Presidente de is Istados Unidos de Amèrica, Donald Trump, lassat pro s’ùrtima bia sa Domo Bianca paris cun mugere sua.

Ant pigadu su bolu cun su Marinas One chi ddos at a acumpangiare a sa base militare de Andrews, a presu de sa capitale, pro una tzerimònia de adiosu.

Fatu fatu s’ant a imbarcare in s’Air Force One e ant a lòmpere a residèntzia issoro de Mar-a-Lago, evitende sa tzerimònia de giuramentu de su presidente nou Joe Biden.

Trump in s’ùrtimu discursu suo at ammentadu totu is cosas bonas fatas, segundu issu, durante su mandadu suo: dae s’abbassamentu de is impostas a s’isvilupu de su vatzinu contra su Covid.

Su discursu suo no assimigiaiat a un’adiosu a sa polìtica, difatis at promìtidu de bòlere sighire a lutare in carchi modu pro su pòpulu americanu. A custu propòsitu: non diat ispantare chi potzas fintzas fundare unu partidu suo.

In su mentres mancant pagas oras a s’insediamentu de su Presidente nou, su democràticu Biden, cun su giuramentu e sa tzerimònia sulenne.

Giai de in deretura ddoe est un’istàgiu respetu a s'”Era Trump”: Biden at a donare s’inghitzu a s’amministratzione sua cun 17 òrdines esecutivos chi ant a cumprèndere sa torrada de is Istados Unidos in s’acòrdiu pro su clima de Parigi e in s’Oms.

Satisfatzione manna dae parte de su presidente de su consìgiu de s’Unione Europea Charles Michel chi proponet unu patu nou cun is USA cunforma a unu mundu mègius. Ursula Von der Leyen faeddat de un’arbèschida noa pro is USA e s’Unione Europea.

Biden at twittadu: “Est una die noa in Amèrica”. In su mentres su Presidente nou e sa mugere Jill sunt andados a sa catedrale de Santu Mateu apòstolu, su printzipale logu de cultu catòlicu de Washington.

Cuntentu meda pro s’eletzione de su mere nou de sa Domo Bianca, Barack Obama chi at iscritu in twitter: “Cumplimentos a s’amigu meu, su Presidente Joe Biden! Custu est su momentu tuo”. At fintzas postu una fotografia acanta ddoe est issu paris cun s’ex vitze suo.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”