Dae eris sa Sardigna est torra in zona groga, bidu su megioramentu de is paràmetros chi dd’aiant fata decrassare in una fàscia cun prus limitatziones.

Aici sunt 16 is regiones e una provìntzia autònoma italiana chi s’agatant in un’ àrea, amus a nàrrere, prus lèbia de sa classìfica.

Sa Sardigna est s’ùnica regione italiana a àere cambiadu colore in custa chida, segundu is disponimentos prevìdidos dae s’ordinàntzia de su Ministru de sa Salude. In sa fàscia de colore de aràngia abarrant Sitzìlia, Provìntzia autònoma de Bolzano, Pùglia e Umbria. Niuna regione in ruju.

Sa Sardigna pro pòdere colare dae sa zona colore de aràngia a sa zona groga at dèpidu isetare duas chidas cun datos cumpatìbiles cun sa fàscia prus lèbia. Custu peri pro more de s’interpretatzione noa de su Dpcm chi at eliminadu sa de tres chidas de ‘osservatzione’.

Custa variatzione est istada sollitzitada dae is guvernadores chi s’agataiant a gestire sa difìtzile situatzione de is tzitadinos “apretados” dae is restritziones de sa zona arantza.

In Sardigna sa zona noa de apartenèntzia, cun prus pagu limitatziones, est istada pigada cun praghere dae tzillerajos e ristoradores. Difatis su passàgiu a sa zona groga at fatu torrare unu pagu de sùlidu a is atividades de sa ristoratzione e de su cummèrtziu, postas in ghenugros dae is proibitziones de sa zona arantza, e giai proados dae is meses de sa pandemia.

A dolu mannu in zona groga is locales no ant a pòdere abèrrere a ora de chena, e s’òrdine de retiru abarrat semper a is 22.00, ma nessi cunsentit a medas imprendidores de sighire a poderare. Dae eris s’est incumentzada a bìdere prus gente in is caminos, e medas esertzìtzios ant torradu a abèrrere a is clientes pro unu cafè o unu pastu — donende cura a totu is normas pro evitare s’ispàinu de sa cundidura.

Unu messàgiu de isperu pro su benidore e una modu pro cumentzare a torrare a sa normalidade chi serbiat pro indànimare sa populatzione sarda, peri si abarrat galu meda de fàghere e tocat a sighire a donare cuidadu, bidu s’arriscu cuncretu de un’àtera undada de sa pandemia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In sa die de oe su Presidente de sa Camera Roberto Fico at a cumentzare is consultatziones cun is partidos pro bìere chi si ddoe sunt is cunditziones de fàghere su guvernu “Conte-ter”.

Fico – chi at retzidu su mandadu esplorativu dae su Presidente Sergio Mattarella – at a atopare pro primu is delegados de su Movimentu Chimbe Isteddos, e a sighire is rapresentantes de su Partidu Democràticu, Itàlia Viva e Lìberos e Uguales.

Sa crisi de su Guvernu s’est aberta a pustis de is dimissiones de is ministras Teresa Bellanova e Elena Bonetti e de su sutasegretàriu Ivan Scalfarotto.  Mancari is votos a favore de Giuseppe Conte a sa Camera e  a su Senadu – bàtoro dies a oe – est istada declarada   sa crisi cun is dimissiones de su primu ministru.

S’incàrrigu de Fico est istragosu meda, pro ite su capu de Itàlia Viva, Matteo Renzi, diat puntare a unu Guvernu ghiadu dae unu primu ministru chi non siat Conte.

Is esponentes printzipales de su Partidu Democràticu e de su M5S bolent  comente Presidente de su Consìgiu semper s’abogadu pulliesu.  Ma essende chi su tentativu de allargare sa majoria sena is votos de su partidu de Renzi no est resèssidu, at èssere difìtzile meda chi Conte bèngiat cunfirmadu.

In custas oras sunt essidos a pìgiu àteros nùmenes, comente cussu de su  Ministru de is Esteros Luigi di Maio e de sa Ministra de is Internos Luciana Lamorgese.

In unu cuntestu polìticu che custu non s’ischit ite at a pòdere capitare. Seguru – sarvu sorpresas – non s’at a lòmpere in presse a is eletziones, comente imbetzes est dimandende sa minoràntzia ghiada de su capu de sa Lega Matteo Salvini.

Fico at a dèpere agatare una solutzione a lestru, pro ite s’Itàlia non si podet permìtere àteros “trumbulamentos” in is meses sighentes, bidas totu is discumbènios causados dae sa pandemia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”