In custos tempos sa cosa prus pretzisa est sa seguresa pro su pòpulatzione e evitare de favorire s’ispàinu de sa pesta malaita de su coronavirus.

Ma at a tocare a pensare a programare su cartellone musicale sardu e s’isperat in bonas noas pro ocannu a pustis chi in su 2020 medas ispetàculos mannos sunt istados suspèndidos.

S’istade colada est istada meda prus pòvera, sena istellas de sa mùsica e una làstima a beru, pro ite in Sardigna si fiant isentende artistas balentes e famados.

Ma àteras solutziones non fiant possìbile pro more de is disponimentos de su Guvernu contra s’epidèmia de su Covid-19.

Seguramente s’ant a dèpere fàghere cuntzertos cun prus pagu gente meda, ma custu at a permìtere su matessi s’organitzatzione de festas de livellu musicale bonu meda.

Diat a èssere unu messàgiu bellu meda cussu dae torrare a cumintzare a fàghere is ispetàculu musicales famados e totu is festas de is biddas sardas.

Una bona ispera pro torrare is meses benentes a sa vida chi aìamus a in antis de sa pandemia. Tzertu at a èssere istragosu meda prima dae su beranu, bastat a pensare is manifestatziones comente sa Sartìglia de Aristanis e su Carrasegare dae Tèmpiu chi sunt istadas cantzelladas pro su 2021. De s’antiga giostra de caddos s’est proadu a sarbare a su mancu sa calada de su capu-cursa cando poderat in sa manu sa pipia de maju – su dòpiu iscetru de violas prenu de significados- ma no est istadu agatadu s’acordu tra is Grèmios de is Massajos, de is Maistros de Linna e su prefetu.

Tzertu su sutzessu de sa campagna de vacinatzione pro su tempus benente at a èssere importante meda, paris cun su respetu de is normas contra su Covid, duncas de sa salude de totus, ant a bastare pro torrare a bìdere is festas in Sardigna. A su pùblicu si pedit solu de agafare sa mascaredda, a fàghere ispassiare, emotzionare, riflètere e bisare nch’ant a pensare, comente a semper, is organizadores e is artistas in iscena.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

A dolu mannu, ocannu sa Sartìglia non s’at a fàghere a càusa dae su Covid-19.

Custa detzisione est lòmpida a pustis de sa reunione dae s’Istitutzione Sa Sartìglia de sa Fundatzione Aristanis. Forsis s’at a renèssere a sarbare is ritos prus importantes de sa manifestatzione, comente ant pedidu is Grèmios de is Massajos e de is Maistros de Linna.

Comente at naradu su sìndigu Lutzu, custos eventos s’ant a pòdere fàghere sena sa presèntzia de pùblicu, e s’ant a pòdere trasmìtere in direta internet.

Custas propostas sunt istadas presentadas a su prefetu Gennaro Capo e su cuestore Giusy Stellino.

Isperamus chi ocannu s’at a pòdere sarbare a su mancu sa calada de su capu-cursa cando poderat in sa manu sa pipia de maju – su dòpiu iscetru de violas prenu significados. Difìtzile chi si potzant fàghere parìllias meda.

Est una làstima chi in custu 2021 sa Sa Sartìglia non s’at a pòdere fàghere comente a semper. S’annu coladu sa manifestatzione fiat renèssida bene, cun unu pùblicu in festa chi aiat acudidu a tropa pro assìstere a s’antiga giostra de carrasegare a caddu.

Comente a semper sa tzitade istòrica si fiat fata agatare bronta e cortesa, cun sa bellesa medievale incantosa de sa capitale de su Giudicadu de Arborea.

Sa domìniga fiant istadas bintiduas is istellas pitzigadas dae is cadderis, contende peri is duas boddidas dae su capu-cursa etotu. Difatis fiat resèssidu in sa marrania de inferchire cun s’ispada s’isteddu in sa calada initziale, e cussu a oto puntas in su finale cun s’istocu. Pro su Grèmiu de is Massajos, s’annu coladu est istada una Sartìglia de no iscarèssere.

Bella a beru fintzas sa remada, cun su Componidori corcadu in gropas de su caddu Reinos, chi fiat renèssidu a donare proa de s’abilesa sua in totu sa giostra.

Su Martis sa giostra de su Grèmiu de is Mastros de Linna puru fiat andada bene meda. In totu fiant istadas degheoto is istellas boddidas dae is cadderis. Duas de custas, fiant istadas atzapadas dae duas fèminas: Antonella Rosa e Carmen Murru – assessora in su Comunu de Aristanis -.

S’ispera de totus est chi pro s’annu benente s’at a torrare a festare sa Sartìglia gosi comente s’est semper fata, cun sa gente in festa in sa caminera Mazzini.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”