A dolu mannu, ocannu sa Sartìglia non s’at a fàghere a càusa dae su Covid-19.

Custa detzisione est lòmpida a pustis de sa reunione dae s’Istitutzione Sa Sartìglia de sa Fundatzione Aristanis. Forsis s’at a renèssere a sarbare is ritos prus importantes de sa manifestatzione, comente ant pedidu is Grèmios de is Massajos e de is Maistros de Linna.

Comente at naradu su sìndigu Lutzu, custos eventos s’ant a pòdere fàghere sena sa presèntzia de pùblicu, e s’ant a pòdere trasmìtere in direta internet.

Custas propostas sunt istadas presentadas a su prefetu Gennaro Capo e su cuestore Giusy Stellino.

Isperamus chi ocannu s’at a pòdere sarbare a su mancu sa calada de su capu-cursa cando poderat in sa manu sa pipia de maju – su dòpiu iscetru de violas prenu significados. Difìtzile chi si potzant fàghere parìllias meda.

Est una làstima chi in custu 2021 sa Sa Sartìglia non s’at a pòdere fàghere comente a semper. S’annu coladu sa manifestatzione fiat renèssida bene, cun unu pùblicu in festa chi aiat acudidu a tropa pro assìstere a s’antiga giostra de carrasegare a caddu.

Comente a semper sa tzitade istòrica si fiat fata agatare bronta e cortesa, cun sa bellesa medievale incantosa de sa capitale de su Giudicadu de Arborea.

Sa domìniga fiant istadas bintiduas is istellas pitzigadas dae is cadderis, contende peri is duas boddidas dae su capu-cursa etotu. Difatis fiat resèssidu in sa marrania de inferchire cun s’ispada s’isteddu in sa calada initziale, e cussu a oto puntas in su finale cun s’istocu. Pro su Grèmiu de is Massajos, s’annu coladu est istada una Sartìglia de no iscarèssere.

Bella a beru fintzas sa remada, cun su Componidori corcadu in gropas de su caddu Reinos, chi fiat renèssidu a donare proa de s’abilesa sua in totu sa giostra.

Su Martis sa giostra de su Grèmiu de is Mastros de Linna puru fiat andada bene meda. In totu fiant istadas degheoto is istellas boddidas dae is cadderis. Duas de custas, fiant istadas atzapadas dae duas fèminas: Antonella Rosa e Carmen Murru – assessora in su Comunu de Aristanis -.

S’ispera de totus est chi pro s’annu benente s’at a torrare a festare sa Sartìglia gosi comente s’est semper fata, cun sa gente in festa in sa caminera Mazzini.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu torrat a pèrdere, custa borta contra sa Fiorentina cun su resurtadu de 0-1.

Non binchet oramai dae bator partidas in campionadu pro ite siat in domo siat in trasferta ddas at pèrdidas totus.

Is casteddajos no ant conchistadu mancu unu puntu in Firenze, e non sunt resèssidos a andare a in antis in sa classìfica.

Tzertu, in s’Istàdiu Franchi su Casteddu at giogadu meda prus mègius, a cumparèntzia cun is isfidas coladas, e s’est torrada a bìdere un’iscuadra prus unida e gherradora.

Sa Fiorentina est calada in campu pro bìnchere e s’est dimustradu un’aversàriu risolutu a fàghere puntos pro si sarvare.

Sa partida pro is ruju-blu s’est posta bene a coa de su primu tempus cun unu rigore donadu dae s’àrbitru pro unu fallu de Igor a dannu de Joao Pedro.

Ma su brasilianu at iscutu male e su portieri viola Dragowsky at atzapadu sa botza sena dificultade.

A su cumentzu de su segundu tempus is sardos ant àpidu unas cantas ocasiones pro fàghere gol cun Simeone, ma no ddas ant isfrutadas.

Is toscanos imbetzes no ant tentu làstima de is sardos: a su 20′ Vlahovic, gràtzias a su passàgiu bellu meda de Callejon, nche at iscutu sa botza dereta in porta, detzidende in custu modu s’èsitu sa gara.

Posca a nudda sunt serbidos is atacos de su Casteddu, chi at istramancadu peri una bella ocasione cun Marin, firmadu dae su portieri de sa Fiorentina.

Giòbia is òmines de Di Francesco ant a andare a Bergamo pro giogare sa partida de Copa Itàlia contra s’Atalanta. Amus a bìdere s s’iscuadra at èssere prus assortada de comente ddu est istada finas a immoe e si at a superare sa crisi. Tzertu is lombardos allenados dae Gasperini sunt aversàrios isconchiosos e istant bene.

Una cosa est segura: s’allenadore ruju-blu contra is nieddos-asulos est gioghende∙si sa banchita. In casu de iscunfita, a èssere galu Di Francesco a ghiare is casteddajos contra su Milan in sa partida benente?

Isperamus chi su Casteddu agatet sa fortza de torrare a bìnchere, pro sighire su progetu tècnicu cun s’allenadore abrutzesu, òmine traballante e de valore.