Agiumai totu s’Itàlia est istada insertada in zona groga dae su Guvernu natzionale, bàtoro regiones ebbia e una provìntzia sunt abarradas in zona aràngiu: Puglia, Sicilia, Umbria, sa Provìntzia Autonoma de Bolzano e sa Sardigna.

Una befa manna pro is sardos, pro ite is limitatziones de sa zona assignada cumportant disacatos mannos pro s’economia isolana giai dannificada.

Bastat pensare a is tzilleris e a is ristorantes, chi podent fàghere servìtziu de asportu o cunsigna a domitzìliu ebbia. Pro more de  custa situatzione medas ant cungiadu s’atividade o s’agatant in dificultade manna.

Sa chida colada a fàghere “lassinare” sa Sardigna in sa zona colore de aràngiu fiat istadu, tra is vàrios paràmetros cunsiderados dae su guvernu, sa propassada de su lìmite crìticu de su 30% de is postos ocupados in terapia intensiva. Ma immoe custu datu est caladu a su 22% e andant mègius àteros paràmetros puru, comente at cunfirmadu su assòtziu Gimbe.

Pro custos motivos non s’est cumpresu su motivu de custu provedimentu, comente puru sa detzisione de torrare a insertare sa Lombardia e su Lazio in zona groga, mancari tèngiat nùmeros peus de sa Sardigna.

Una pariga de dies a oe, is sìndigos sardos ant denuntziadu chi su forte ritardu de notìfica podet àere influidu in su  pesu de is casos ativos e in su nùmeru de is infetziones in aumentu in is RSA, e in prus chi diant pòdere èssere isballiados is datos in su portale ufitziale.

Su Presidente Solinas, at definidu, torra, sena sentidu sa mòvida de su Guvernu e est prontu a fàghere batalla contra sa detzisione de lassare s’Ìsula in zona aràngiu. Su Guvernadore at naradu chi s’at a fàghere su ricursu a su Tar pro otènnere dae su tribunale su provedimentu pro torrare in zona groga.

Pròpiu is dies coladas s’ufìtziu legale de sa Regione fiat  aprontende sa documentatzione pro pòdere presentare su ricursu contra sa classificatzione donada dae su guvernu, ma s’isperaiat chi sa Sardigna dae eris diat èssere  torrada in zona groga.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Oramai est chistione de pagas oras, su presidente Conte si diat dèpere presentare dae su presidente de sa Repùblica Sergio Mattarella pro si dimìtere.

S’addòbiu diat dèpere acontèssere a mangianu a tardu, a pustis chi su primu ministru informet su Consìgiu de is ministros.

Ma immoe ite diat pòdere capitare? In medas pensant chi s’at a formare una majoria noa ghiada semper dae s’atuale presidente de su Cussìgiu, unu “Conte ter” formadu dae Partidu Democràticu, Movimentu Chimbe Isteddos, dae tzentristas e in fines da Italia Viva. Fintzas si su partidu ghiadu dae Matteo Renzi, diat èssere meda prus pagu determinante, bidu chi sa majoria diat èssere giai segudada cun is responsàbiles “noos”.

A ogna contu est difìtzile prevìdere cale ant a èssere is mòvidas de s’ex segretàriu Pd, chi diat puntare a unu guvernu sustentadu dae totus is fortzas polìticas e ghiadu dae unu primu ministru diversu chi non siat Conte.

A custu propòsitu, non faghet a esclùdere chi s’arribet a custa solutzione, essende chi s’Itàlia non si podet permìtere àteras “trumbulamentos” in is meses sighentes, bidas totu is problemàticas causadas dae sa pandemia.

In s’ora su Partidu democràticu est chirchende torra de fàghere torrare a paghe Conte cun Renzi. Is esponentes printzipales de Pd sutalìniant comente su presidente de su consìgiu apat bisòngiu de allargare sa majoria e chi su capu de Italia Viva non siat contràriu a un’eventuale Conte-ter.

Fintzas sa Cunferèntzia Episcopale Italiana intervenet pro mèdiu de su presidente suo, su card. Gualtiero Bassetti, narende•si apensamentada pro sa verìfica polìtica in cursu, in custu perìodu istòricu caraterizadu dae sa precariedade dèpida sa pandemia. S’assemblea permanente de is pìscamos italianos isperat chi sa classe polìtica collàboret a su servìtziu de is tzitadinos, chi ogni die traballant in operosu mudìmene e chi si lompat a una solutzione chi tèngiat contu de is medas crititzidades.

In custu cuntestu polìticu, su chi paret craru, est chi non s’at a lòmpere in presse a is eletziones – sarvu sorpresas – e chi sa legisladura atuale at a sighire cun un’àteru guvernu, cun medas probabilidades semper a ghia Conte.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”