Graziano Mesina non s’agatat. Mancari is chircas a pedras pesadas de sa giustìtzia in Orgòsolo e in totu s’ìsula, de issu non s’ischit prus nudda dae tres chidas.

No at donadu perunu resurtadu su traballu de is Carabineris de su Cumandu provintziale de Nùgoro e de sa Politzia de Istadu chi l’ant chircadu in is domos e in is cuiles de is persones chi ddu diant àere pòdidu agiudare.

Is fortzas de s’òrdine at fatu inchesta peri in Gaddura, in is domos de is nebodes de Mesina, ma est comente chi nche dd’apa ingurtidu sa terra.

Gratzianeddu mancat dae su 2 de mese de argiolas, cando una sentèntzia de sa Corte de Cassatzione at cunfirmadu sa cundenna a 30 annos pro tràficu de droga.

Difatis cando is carabineris si sunt presentados a domo de sa sorre in Orgòsolo pro dd’acapiare — in ue Mesina biviat a pustis chi in su mese làmpadas 2019 fiat essidu dae presone pro decurrèntzia de tèrmines — issu non ddoe fiat.

Immoe est lòmpidu su decretu firmadu dae su presidente de sa prima setzione de sa Corte de Apellu de Casteddu Giovanni Lavena chi decrarat s’orgolesu in modu ufitziale “latitante”. Est istada duncas atzetada sa recherta de sa Procuradora generale Francesca Nanni.

S’àutu est istadu notificadu a is legales de Mesina: Beatrice Goddi e Maria Luisa Vernier.

A custu puntu is boghes chi is abogados de Mesina esserent in tratativa cun is incuirentes non tenent prus perunu fundòriu.

S’est naradu chi Gratzianeddu èsseret dispostu a acabbare su bandidòngiu in càmbiu de una pena prus lèbia, ma custas noas no ant tentu mai una cunfirma ufitziale.

Is chircas sighint a andare a in antis e non solu Sardigna, ma peri in s’istràngiu. Is incuirentes pensant chi Mesina, a pustis de sa sentèntzia de sa Cassatzione, si nche siat fuidu de presse a Còrsica cun unu gommone, ma non benit trascurada nemmancu sa pista africana: su latitante diat pòdere èssere arribbadu fintzas in is costas de sa Tunisia.

Una cosa est segura però: comente a prus de 50 annos a oe, a belle otanta annos, Mesina torrat a èssere unu bandidu pregonadu in totu su Mundu.

Graziano Mesina, non s’agatat, si diat pòdere èssere in fuidu a pustis de s’ùrtima detzisione de sa Cassatzione.

A pustis de sa sentèntzia de s’arta Corte, chi at refudadu su ricursu de is abogados suos, pro “Gratzianeddu” si diant èssere dèpidas torrare a abèrrere is ghennas de su càrtzere.

Depet iscontare sa cundenna a trinta annos de reclusione pro assòtziatzione a delìncuere, istabilida in su mese de idas de su 2016.

Segundu sa Dda de Casteddu diat èssere istadu a capu de duos grupos criminales ativos in diversas zonas de sa Sardigna, chi operaiant in su tràficu internatzionale de droga.

Mesina, dae prus de un’annu fiat essidu dae su càrtzere de Badu de Carros pro unu vìtziu de forma, a pagas dies dae sa decurrèntzia de is tèrmines. Fiat torradu a bìvere a Orgòsolo, in ue s’agataiat in regìmene de semilibertade.

S’orgolesu, chi at coladu sa parte prus manna de s’esistèntzia sua a iscontare vàrias penas in càrtzere, oe tenet setantot’annos.

In su 2004 aiat retzidu sa gràtzia, cuntzèdida dae su Presidente de sa Repùblica de tando Carlo Azeglio Ciampi, e aiat incumentzadu a traballare comente ghia turìstica in su Supramonte.

Immoe cun su refudu de s’ùrtimu ricursu presentadu, nd’est rutu in bia definitiva su provedimentu individuale cuntzèdidu dae sa màssima càrriga de s’Istadu.

Perintantu Orgòsolo est torradu suta de assìtiu de is fortzas de s’òrdine, cun Politzia e Carabineris impinnados a chircare a pedras pesadas s’ex bandidu. Medas is postos de blocu, cun medas interrogatòrios e percuisitziones in ogni corratzu de sa bidda.

De Mesina perunu rastru in domo de is familiares. A su chi s’est ischidu, s’ùrtimu annu, s’òmine at bìvidu in domo de una de is duas sorres.

Ogni die – comente previdet sa lege in casu de regìmene de semilibertade – s’orgolesu andaiat a firmare in sa caserma de is Carabineris.

A diferèntzia dae is àteras dies, su primu merie de giòbia “Gratzianeddu”, non si diat èssere presentadu. Solu a pustis chi is fortzas de s’òrdine, a merie a tardu, si sunt presentadas in domo sua pro nde leare a Mesina a presone -a pustis de sa sentèntzia de sa Cassatzione – ant postu in contu sa possìbile fua sua.