Su Casteddu depet torrare a bìnchere a malabògia. S’iscuadra est dae ses partidas chi non lompet a sa vitòria in campionadu.

Seguru in custas garas in domo at tentu aversàrios balentes che s’Atalanta – 0-1 – e su Sassuolo – 1-1 – ma in is àteras partidas, sa delusione est istada manna meda.

Est andada male meda contra sa Sampdoria de s’ex allenadore istimadu Claudio Ranieri – 3-0 -, cun is ruju-blu chi pariant iscambados e sena gana de gherrare. Cun su Bologna – 1-1 -, Fiorentina – 0-0 – e Lecce – 0-0 – is sardos sunt resèssidos solu a fàghere paregiare.

A pustis de sa partida cun su Torino – 4-2 -, is tifosos casteddajos s’aiant fatu sa buca bona cun s’iscuadra de Walter Zenga, e teniant isperu bonu de sighire in cuss’àndala.

Tocat a si subènnere chi sa punna de su Casteddu fiat de abarrare in Sèrie A, e ocannu puru su resurtadu est istada conchistada.

Sa partida chi benit est giòbia, foras de domo, contra sa Lazio de Inzaghi. No at a èssere fàtzile pro ite s’iscuadra romana est chirchende is ùltimos puntos pro sa cualificatzione a sa Copa de is Campiones.

Is casteddajos depent tènnere a mente chi ant pèrdidu sa partida de s’andada pròpiu contra s’iscuadra biancu-tzeleste, e dae tando s’iscuadra est andada male meda. Pròpiu pro more dae custos risultados est istadu lissentziadu s’allenadore Rolando Maran.

In prus in sa Lazio ddoe est Ciro Immobile  su capu-cannoneri – paris a Cristiano Ronaldo – de su campionadu cun 30 goal.

Is òmines de Zenga sunt motivados a donare una proa manna in s’istàdiu Olìmpicu de Roma pro cungiare bene custa istajone.

Comente at naradu s’ex portieri de sa natzionale, pro resèssere a bìnchere is giogadores ddis at a tocare a nde bogare a foras su caràtere issoro e rispetare sa màllia ruju-blu.

Est pretzisu pro cussu chi is atacantes torrent a èssere de muta bona, pro ite in is ùrtimas partidas ant marcadu bellu e nudda.

Casteddu-Torinu est istada una partida bella meda, in ue is sardos ant giogadu bene a beru. Su Casteddu torrat a bìnchere duas partidas de sighidu.

A pustis de sa trasferta vitoriosa a Ferrara contra sa Spal, su Casteddu at torradu a cassare is tres puntos tra is muros amigos de su Sardigna Arena.

Sa prima rete de Casteddu est istada marcada dae Nahitan Nandez – a sa segunda rete in custu campionadu -. A sighire est arribadu su 2-0 de s’atacante argentinu Giovanni Simeone.

Raja Nainggolan – torradu de s’infortùniu – at marcadu su gol de su 3 a 0, cun unu bella fichida de pee iscuta dae largu. S’iscuadra de s’allenadore Longo a pustis at apretadu unu pagu su Casteddu cun sa rete de su difensore Gleison Bremer, e a pustis cun Andrea Belotti, chi est resèssidu a marcare su segundu gol.

Posca est lòmpidu su de bator puntos de sa Casteddu, cun su rigore iscutu dae su brasilianu Joao Pedro.

Is giogadores sardos no ant sufridu e, abarrende unidos, sunt resèssidos a cungiare sa partida cun custu resurtadu.

Cuntentu meda s’allenadore de su Casteddu Walter Zenga, pro ite is giogadores suos ant chircadu de bìnchere a ònnia còstidu.

A s’agabbu de sa partida, paràulas bellas de s’ex portieri de sa natzionale italiana pro sa prestatzione de Andrea Carboni, giogadore giòvanu de Tonara, a sa prima partida dae titulare cun su Casteddu.

Unu triunfu pro is binchidores e grandu cuntentu pro is tifosos casteddajos. S’allenadore de su Torinu Moreno Longo, s’est cumplimentadu cun iscuadra isolana, fintzas si s’est arrennegadu cun is giogadores suos pro no aerent gherradu semper durante sa partida. Su Casteddu abarrat in sa parte arta de sa classìfica e is tifosos suos sighint a sonniare.

Cun custa partida su Casteddu at a tènnere galu de prus sa possibilidade de proare a s’inserire in sa luta pro is cualificatziones a sa Liga Europea benente.