Pro more de s’emergèntzia de su coronavirus s’economia de su Mundu est cambiada. Immoe pro traballare, produire o bèndere, gente meda devet abarrare cungiada in domo sua.

Est pro cussu chi sa sienda Zoom Video Communications, est renessende a tènnere sutzessu meda in custu tempus de COVID-19.

Sa prataforma americana permitit de fàghere vìdeu-cunferèntzias, letziones a distàntzia e de si bìere tra amigos.

Zoom est conchistende semper de prus su mundu, su mese coladu at superadu totu is àteras retzes sotziale prus connotas. In su mese de abrile sa vìdeu-tzarrada de sa sienda americana est istada s’aplicatzione prus iscarrigada a livellu mundiale.

Zoom at superadu TikTok puru, s’ispàtziu sotziale arribadu dae sa Tzina divènnidu virale in pagu tempus e impreadu dae gente de ogna edade.

Is iscarrigamentos de s’aplicatzione àudiuvisiva, in is butegas App Store pro iPhone e Google Play pro is dispositivos Android, sunt aumentados 60 bortas in prus de su matessi mese de abrile 2019.

In totale is impitadores de s’aplicatzione americana nche ant isciaddidu is 130 milliones. S’impreu suo est de su 18,2% in Ìndia e de su 14,3% in U.S.A.

Giòvanos e mannos sunt faghende•si ingangulitzare dae Zoom, e in prus is meres de sa sienda sunt faghende investimentos mannos pro isvilupare custa vìdeu-tzarrada.

Is atziones de sa sotziedade cuotada in su mercadu finantziàriu, dae su mese de ghennàrgiu, sunt crèschidas de su 101%.

Zoom Video Communications no est s’ùnica sienda chi est resèssida a tènnere profetu dae sa pesta de su coronavirus.

Amazon e Netflix ant àpidu una rechesta de servìtzios majore. Sa sotziedade de Seattle at assùmidu 175.000 traballadores, imbetzes pro sa sienda de sa Califòrnia in is primos meses de s’annu is impitadores sunt aumentados de 16 milliones.

Ma no est crèschida solu carchi sotziedade de su ramu dae sa tecnologia. Gràtzias a su COVID-19, fintzas is siendas farmatzèuticas ant aumentadu su giru de is afares issoro.

Dae sa tecnologia arribbat un’agiudu a s’Itàlia pro atremenare s’ispartzinamentu de s’epidèmia de su COVID-19.

Si tratat de un’aplicatzione chi est istada isvilupada dae sa domo de isvilupu milanesa Bending Spoons, chi at firmadu cun su Guvernu unu cuntratu chi previdet sa làssida a s’indonu de sa lissèntzia de impreu.

In tempus de crisi econòmica, tocat a ddu pònnere bene a notu, chi s’Istadu no at a ispèndere unu francu.

Immuni – custu su nùmene de s’aplicatzione – at a serbire a su Guvernu pro portare a pòmpiu e tratzare is personas malàidas de Covid-19. Custos datos ant a serbire pro fàghere partire cantu prima sa Fase 2. Sa noa s’est difùndida pro mèdiu de una nota publicada dae su Cummissàriu Arcuri.

Non sunt istadas galu iscoviadas is caraterìsticas de s’app, fintzas si si pensat chi su mètodu impreadu diat dèpere èssere cussu de su tratzamentu de is cuntatos pro mèdiu de su Bluetooth.

Unu sistema cunsideradu seguru e fidadu, fintzas pro un’aspetu importante: sa privadesa. A pitzu de sa pròpiu cosa diant dèpere èssere traballende fintzas Apple e Google pro more de cuncordare in pagu tempus un’agiornamentu de su programma pro Android e iOS chi ìntegret is trastos pro su tratzamentu de is cuntagiados.

Immuni at a permìtere de poderare sa rasta de is cuntatos tentos dae una persone: s’in casu resurtet cuntagiata, totus is chi ant tentu ite fàghere dae presu cun issa ant a èssere avertidos.

S’avisu at a arribbare isceti a is persones chi ant installadu s’app – chi no est obrigatòria – e podet èssere iscarrigada in manera voluntària dae totus.

Su Ministeru de s’innovatzione tecnològica e de sa digitalizatzione, at craridu chi pro funtzionare tocat chi siat installada nessi dae su 60% de sa populatzione.

Immuni diat permìtere de isulare eventuales printzìpios de ispàinu de su virus e poderare sa situatzione suta controllu, atremenende su virus. S’aplicativu at bintu sa cramada de su Ministeru de s’innovatzione tecnològica e de sa digitalizatzione pro agatare sistemas pro cuntrastare su coronavirus. Est resurtadu su mègius progetu tra is 318 arribbados in pagas dies e valutados dae s’iscuadra posta aparitzada dae su Ministeru.

S’aplicatzione est istada isvilupada cun sa collaboratzione de su Tzentru mèdicu Santagostino, espertu in sa digitalizatzione in campu sanitàriu.

Su sistema diat dèpere èssere disponìbile tra pagu tempus, a pustis de unu perìudu de proa pro controllare sa presèntzia de possìbiles problemas tècnicos.

Immuni s’at a pòdere iscarrigada diretamente de su Google Play Store e App Store.