In Sardigna puru oe est incumentzada sa gosi mutida Fase 2 de s’apretu Coronavirus. In s’Ìsula, in prus de su chi est prevìdidu dae su Dpcm, ddoe tenet calicuna diferèntzia introduida dae is ordinàntzias regionales.

Su presidente de Anci Sardigna Emiliano Deiana at chircadu de fàghere craresa cun unu messàgiu in Facebook in ue ispiegat su chi si podet fàghere e su chi non si podet fàghere in Sardigna, a profetu de totus is primos tzitadinos collegas suos.

«Fàghere resumos de custos ùrtimos duos provedimentos (DPCM 26 abrile 2020 e Ordinàntzia Regionale n.20 de su 2 maju 2020) no est simpre e abbarrat de acrarire galu carchi chistione chi m’ais domandadu chi a però non podimus donare una risposta segura pro ite non sunt remonadas in is documentos», antìtzipat Deiana.

Custa s’interpretatzione de Anci Sardigna:

ISPOSTAMENTOS

Sunt permitidos cun autodecraratzione pro:

– motivu de traballu;

– netzessidades fundadas;

– motivos de salude;

– bìsitas a is parentes ma cun mascareddas, poderende sa distàntzia de seguridade de unu metru e sena ammuntonamentos (proibidos pràngios, ispuntinos, festas, e gosi sighende)

[Donade cara: pro s’ora s’ispostamentu dae unu comunu a un’àteru pro comporare produtos chi podent èssere cuberados in su territòriu cumonale de apartenèntzia no est cunsiderada situatzione de netzessidade]

– andare a campusantu pro abisitare sa tumba de unu parente mortu rispetende is mesuras de cuntenimentu de su virus;

– andare a is segundas domos de propiedade petzi pro fàghere manteniduras, acontzps e controllos sena unu trasferimentu istàbile;

– sa mantenidura de is imbarcatziones, natantes o naves de diportu de propiedade;

– sa cura, s’allenamentu e s’addestramentu de caddos e canes;

– sa cura de is ortos, frutedos e giardinos e de is àreas birdes pùblicas e privadas fintzas pro prevènnere s’arriscu de fogos;

FAINAS A S’ÀERA ABERTA E ISPORTIVAS

– est cunsentidu praticare atividade motòria, sena su lìmite de is 200 metros, ma in modu individuale ebbia, a distàntzia de a su mancu duos metros cun sa mascaredda;

– est cunsentidu praticare isport individuales a s’àera aberta in is tzentros isportivos;

– is minores e is sugetos diversamente àbiles ant a pòdere fàghere atividade motòria cun un’acompangiadore, sena òbrigu de distantziamentu e cun òbrigu de fatzoledda pro is acumpangiadores;

– est permìtidu a praticare sa pisca isportiva, subàcuea, de terra o a lentza in forma individuale e cun òbrigu de distantziamentu.

ISTRUTZIONE PÙBBLICA E FAMÌLIAS

– Is fainas ant a torrare a cumintzare a cabudanni

– Sunt cunfirmados is agiudos a is famìlias comente su cungedu istraordinàriu e su bonus pro su babysiteràgiu.

TZELEBRATZIONES RELIGIOSAS

– Sunt cunsentidas is tzelebratziones de is interros, in presèntzia de is familiares istrintos ebbia pro unu màssimu de 15 persones.

RISTORATZIONE E TZILLERIS

– Cunsentidu s’asportu

CUMMÈRTZIU

( òbrigu de s’impreu de sa mascaredda in totus is esertzìtzios cumertziales )

– cunsentida sa bèndida de materiales pro sa nàutica, pro sa mantenidura de is àreas birdes e pro sa cura de animales;

– cunsentida sa bèndida de frores, sèmenes e matas;

– cunsentida sa bèndida de gioghitos e botinos pro pipios.

ESTETISTAS E PILUCHERIS

Ddoe est sa possibilidade, a segunda de s’inditze de cuntàgiu Rt de ogni sìngulu comunu (chi at a èssere comunicadu dae sa Regione s’8 e maju), de torrare a abèrrere dae s’11 de maju, cun s’òbligu de sighire unas cantas normas.

ATIVIDADES PRODUTIVAS

– aviu de s’edilìtzia pùblica e privada cun s’assuntzione de protocollos de seguridade;

– cunsentidu su traballu de is agèntzias immobiliares e finantziàrias;

– cunsentida sa cura de animales;

– cunsentida sa mantenidura de is istabilimentos balneàrios.

S’Itàlia proat a pònnere torra in motu sos motores de sas sindas, fintzas si no at a èssere una riapertura cumpleta.

Pro torrare a sa normalidade, prima de s’apretu de su coronavirus, nch’at a bòlere meda tempus.

Dae oe sunt partidas diversas siendas importantes chi tenent cuotas istratègicas de mercadu in s’istràngiu e arriscaiant de las pèrdere. Sa parte prus manna de sas impresas de sos setores de sa manifatura, edilìtzia e cummèrtziu ant a partire su 4 de maju. Pro torrare a sa vida sotziale chi connoschìamus, imbetzes, amus a dèpere isetare finas a cando s’at a agatare unu vatzinu contra su COVID-19.

Ma ite s’at a pòdere fàghere in cuncretu dae su 4 de maju? Descrivimus in curtzu sos puntos printzipales.

Ant a èssere permìtidos sos ispostamentos, motivados, in intro de sa regione de residèntzia. Sos ispostamentos motivados sunt cussos de traballu, de netzessidade e de salude. Ma b’at fintzas un’àtera novidade: sa possibilidade de abisitare e adobiare familiares e parentes- semper respetende sa proibitzione de s’addobiare in medas e su distantziamentou -.

Abbarrat s’òbrigu de cumpilare s’autotzertificatzione pro sos ispostamentos: su follu chi amus imparadu a connòschere in custos meses.

Sos aparatos de protegimentu – sa fatzoledda pro nos cumprèndere – divenint obrigatòrios in sos logos cungiados, cun sa novidade chi est istadu fissadu unu prètziu màssimu.

At a èssere possìbile praticare isport a sa sola in su territòriu comunale de residèntzia, ma poderende semper sa distàntzia dae sos àteros.

Ant a èssere torrados a abèrrere sos parcos tzitadinos, fintzas si in sas àreas destinadas a sos pipios diant pòdere èssere regulamentadas sas intradas, pro evitare amuntonamentos de minores. S’ùrtima paràula a pitzu de sa riapertura de custos logos at a tocare a sos sìndigos de ogni tzitade.

S’at a pòdere andare a mare pro nadare e a su monte pro passigiare, ma a sa sola e pro su prus in duos. No at a èssere galu possìbile a si tramudare in sas segundas domos.

S’at a pòdere retirare su màndigu dae de sos tzilleris, pitzerias e ristorantes, fintzas si no at a èssere possìbile los consumare in sos locales, cosa chi, fortzis, s’at a pòdere fàghere dae su mese chi benit.

Sos interros ant a èssere tzelebrados in sa presèntzia de màssimu bìndighi persones, chi ant a dèpere portare sas fatzoleddas e mantènnere sa distàntzia de seguresa. A s’imbesse no est istada dada s’autorizatzione pro sa partetzipatzione de sos fideles a sa missa, pro ite est galu perigulosu.

Si totu at a andare bene cun sa fase 2, su 18 de maju b’ant a èssere àteras aperturas e at a èssere bogada calicuna de sas limitatziones introduidas dae su guvernu pro firmare s’epidèmia de coronavirus.