At a èssere una festa de inserru e acorru, a càusa de sa pandemia de su COVID-19.

S’Itàlia abituada a sos ritos suos e a sas traditziones antigas, a cumentzare dae sa Chenàbura Santa, at a èssere custrinta a bìdere annullados o modificados sos apuntamentos fitianos suos.

Ocannu sos pràngios cun sos parentes e sas gitas foras tzitade non sunt istados nemmancu pensados, totus custas cosas s’ant a fàghere in domo e a ognunu pro contu suo.

Medas s’ant a iscambiare sos augùrios in vìdeocunferèntzia, cun s’ispetu chi in su 2021 si torret a festare una Chida Santa comente l’amus semper connota.

Però, su pensamentu andat a sos medas chi in totu Itàlia, in custa epidèmia mala, ant pèrdidu persones caras chi no ant a pòdere prus abbratzare. Familiares chi si nche sunt andados sena lis pòdere donare unu interru dignu, pro ite custu virus nd’at chitadu fintzas custu piticu cunsolu.

A sos medas cuntagiados, chi lutant in unu letu de ispidale atacados a unu respiradore.

A sas categorias, comente sos mèdicos e su personale chi traballat in s’ispidale, chi ant a colare sas festas in prima lìnia a atremenare s’ispàinu de su coronavirus.

A issos andat sa riconnoschèntzia pro su chi sunt faghende in custa “gherra” contra s’inimigu vile e invisìbile, cun su coro prenu de tristura pro sos medas collegas chi ant pèrdidu in custas chidas.

Mancari totu, bìdidas sas limitatziones su dpcm chi nos òbrigat a abarrare in domo, tocat a chircare de colare custas dies cun atinu, provende de torrare a agatare sa normalidade chi amus pèrdidu.

No at a èssere fàtzile, ma a mala bògia lu depimus a sos pipios nostros. Eja, pro more chi a sos pitzocheddos non li siat de pesu meda custa Pasca Manna diversa. Non si depent abbigiare de s’istrachesa e de su pessamentu de sos mannos. Ant giai bidu in sos ùrtimos tempos un’iscola cambiada, cun sos genitores e sos professores unidos pro fàghere a manera chi s’addatamentu a sa didàtica a distàntzia siat prus pagu matanosa. E ocannu, custas, pro sos iscolanos, non ant a èssere vacàntzias de Pasca Manna beras.

Sos mannos ant a dèpere tènnere meda inventiva pro chessire a fàghere bìvere a sos pipios una Pasca Manna serena, sena sos pensamentos pro su COVID-19.

Mancari preparende sa cosa de papare de sa Chida Santa paris, coghinende retzetas gastronòmicas de sa traditzione e impreende ingredientes de su logu.

Agatare su tempus pro allegare a costadu de sa zeminera, mancari cun unu betzu chi contat calicunu contu antigu, comente si costumaiat a fàghere a unu tempus.

E si est possìbile, diat èssere bellu fintzas a bìvere su significadu beru de sa festa, cumprendende cussu messàgiu de isperu e de fide arribbadu dae tesu finas a tempos nostros.

Su Presidente de su Cunsìgiu, Giuseppe Conte, prus de una chida a oe at allargadu a totu su territòriu natzionale is medidas restritivas chi fiant giai istadas aplicadas in sa Regione Lombardia e in is àteras provìntzias de su Nord Itàlia prus corfidas dae s’epidemia a de su Covid-19.

Su presidente de su cunsìgiu at postu sa firma a su decretu su sero de su 9 de martzu, su provedimentu est intradu in vigèntzia sa die sighente at a bàlere finas a su 3 de abrile.

Custu su chi totus sos tzitadinos depent fàghere pro evitare s’ispàinu de sa pesta:

essire dae domo solu pro motivu de traballu, de salude o de netzessidade, custos bisòngios tocat a ddos atestare cun su follu de s’autodecraratzione chi si podet iscarrigare dae sa rete ìnternet o at a pòdere èssere donada dae is fortzas de politzia a su momentu de su controllu. Si si faghet una decraratzione frassa si cumitit unu reatu.

Evitare de s’atobiare cun medas persones in is logos pùblicos o abertos a su pùblicu. In prus si racumandat a totus is betzos o malàidos de patologias crònicas, est a nàrrere chi sufrint de immunudepressione cungènita o achirida, de fàghere a mancu de essire dae domo, francu pro netzessidades urgentes.

Si racumandat a totus de s’ispostare solu si est netzessàriu a beru. A is sugetos cun sintomatologia de infetzione respiratòria e calentura (prus arta de 37,5° C) si racumandadu de s’abarrare in domo, de non tènnere cuntatu cun àtera gente e de mutire su dotore de famìlia.

Totus is chi a cumentzare dae is batòrdighi dies prima de sa data de publicatzione de su Dpcm de s’8 martzu, siant intrados in Itàlia a pustis de èssere istados in zonas a arriscu epidemiològicu, ddu depent fàghere a ischire a su Dipartimentu de preventzione de s’azienda sanitària cumpetente pro territòriu, e fintzas a su dotore de famìlia.

Is persones postas dae su Dipartimentu de preventzione de sa Asl suta bardiamentu sanitàriu e isulamentu fidutziàriu depent abbarrare isulados pro batòrdighi dies, contende dae s’ùrtima essida.

Non depent tènnere nisciunu cuntatu sotziale, non depent cambiare allògiu e non depent biagiare. In prus tenent s’òbrigu de si fàghere agatare dae is autoridades adetas a su controllu in cada momentu de sa die.

Si sa persona suta bardiamentu mustrat is sìntomos de s’influèntzia depet avèrtere deretu su dutore de meighina generale; si depet pònnere sa mascaredda chirùrgica, depet abbarrare a largu de is àteros chi istant in domo cun issu; non depet essire dae s’aposentu suo e de depet poderare sa ghenna cungiada faghende girare s’àrea, in s’ora chi est isetende de nde ddu leare a s’ispidale, si est netzessàriu.