Un’iscuadra de viròlogos de s’Universidade de Casteddu ghiados dae Enzo Tramontano, dotzente de Microbiologia e virologia, est tra sos pagos grupos de chirca italianos motivados in unu de sos progetos de primore finantziados dae s’Unione Europea in su campu de su programma Horizon 2020, pro megiorare sa cumprensione de s’epidèmia de coronavirus, contribuire a una gestione clìnica prus profetosa de sos malàidos infetos e megiorare sa preparatzione e sa risposta a sos apretos de sanidade pùblica.

Su progetu in ue traballant sos chircadores de s’Ateneu sardu – paris cun sos collegas viròlogos de s’Ispidale Spallanzani e de s’Universidade Catòlica de Lovanio – at passadu sa seletzione pro atzèdere a su pianu finantziàriu complessivu de 10 milliones de èuros postu a disponimentu pro sustentare unos cantos progetos de chirca de arta cualificatzione in totu Europa.

EXSCALATE4CoV (E4C) – custu su nùmene de su progetu – est unu de sos pagos finantziados (tra sos 91 presentados) e est istadu elaboradu dae una retza internatzionale ghiada dae sa Dompè Farmaceutici SpA cun sa collaborazione de su CINECA e àteras trumas de chirca (in totale 18) italianos, belgas, polacos, ispagnolos, isvìtzeros, e tedescos. Su finantziamentu reconnotu a E4C est de belle 3 milliones de èuros.

“Pro nois est un’onore mannu su de nos aerent partetzipadu in custa retza de primore – at naradu su prof. Tramontano– Amus a pònnere a disponimentu totu s’esperièntzia e totu sa capatzidade nostra in su campu de s’isvilupu de meighinas antivirales pro pòdere segudare, cantu prus a lestru possìbile, unu resurtadu chi potzat contribuire a donare una risposta eficatze in unu momentu dìligu comente a custu”.

“So orgogliosa de sa resessida otenta dae su grupu de chircadoras, m’at a iscusare su professore Tramontano, in custu campu – cummentat Maria De su Zompo, Retore de s’Universidade de Casteddu referinde·si a su fatu chi si tratat de un’iscuadra belle totu de fèminas – Su bisu miu est cussu de unu mundu in ue sa chirca sientìfica siat avalorada e finantziada pro s’avantzamentu chi permitet a su connoschimentu, est a nàrrere semper, e non solu in ocasione de crisis sanitàrias, climàticas o de àteru gènere. Dia bòlere fintzas chi su respetu pro sos chircadores e sas chircadoras benneret reconnotu pro su traballu chi faghent ogna die in nùmene de unu progressu ligadu a sa connoschèntzia”.

In particulare, s’iscuadra de s’Universidade de Casteddu, dirìgida dae Enzo Tramontano, dotzente de Microbiologia e Virologia a su Dipartimentu de Sièntzias de sa Vida e de s’Ambiente, at a tènnere su còmpitu de istudiare su mecanismu de atzione de sas molèculas identificadas, indagare sos mecanismos de meighina-resistèntzia, identificare sos determinantes molecolares de sas interatziones intre sas molèculas e sos bersàllios virales e averguare s’efetu de sas molèculas identificadas in sos diversos Coronavirus, pro more de pòdere intervènnere non solu in s’epidèmia in cursu, ma pònnere a disponimentu de sa comunidade un’armamentàriu farmatzèuticu chi si potzat impreare fintzas unu incras.

E4C cheret impreare sas risursas de supercomputer pro istantargiare una prataforma pro s’isvilupu de fàrmacos noos (drug discovery) aplicada a s’emergèntzia sanitària atuale, partinde dae sas meighinas giai aprovadas o acanta de èsserent aprovadas finas a s’identificatzione de sustàntzias noas a atividade antivirale. Pro custu sunt istados interessados paritzos grupos de chirca europeos cun cumpetèntzias diversas comente cussas de càrculu bionformàtcu, de chìmica farmatzèutica, de biologia istruturale e de virologia.

Portu Flavia: sa meravizza de s’archeologia industriale sarda.

Accaradu supra su mare cristallinu de sa Sardigna sud-occidentale, Portu Flavia est unu de sos logos pius galanosos e ammaghiantes de s’isula, esempiu istravanadu de archeologia industriale. Postu in sa costa de Masua,fratzione de su comune de Iglesias, Portu Flavia est famadu no solu po sa bellesa de sa bista sua, ma fintzas po s’istoria unica ligada a s’industria  mineraria.

Fattu in sas primas deghinas de annos de su Noighentos, su portu leat su numene dae Flavia, fizza de s’inzenieri Cesare Vecelli,imbentore de custu istravandu disignu. S’opera est bistada fatta po agilitare sa carradura de sos minerales de prumu e zincu chi arribaiant dae sas minieras de sa zura, evitande giros longos in terra e apprettande s’esportassione dae su mare.

Sa particularidade de Portu Flavia est in sa contestura unica sua: su minerale beniat carrigadu direttamente da sos magasinos iscavados in sa rocca supra sas naves arribadas in su mare. Po mesu de unu sistema de gallerias iscavadas in sa montera, su materiale calaiat po gravidade fintzas a sas naves, minimande sos tempos e sos arriscos e diventande una solutzione importante po cussu tempus. Oe sas gallerias e sos silos iscavados in sa rocca addurant tistimonzos de unu addelentu chi aunit funtzionalidade e bellesa.

In pius de su balore istoricu e industriale, Portu Flavia est unu logu de istravanada bellesa naturale, suspesu intre mare e chelu, cun arroccargios a atza e abbas colore ‘aera chi faghent divennere sa zura perfetta po camminadas, trekking e accabussos. S’armudiu intre s’istruttura artifissiale e sa bista a inghiriu faghet in manera chi Portu Flavia benzat cussideradu unu de sos logos pius fottograffados e bisitados de sa Sardigna sud-occidentale.

In sos urtimos annos Portu Flavia est divennidu fintzas cataffale de abbenimentos isportivos e culturales, intre sos cales garas de tuffos dae artarias mannas e initziativas dedicadas a s’archeologia industriale e sa tamburinada iscientifica.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22