Cun sa metropolitana s’at a pòdere arribbare dae su tzentru de Casteddu a su Poetu: dd’at naradu custu mangianu su presidente de sa Giunta regionale Christian Solinas.

« Sa punna nostra est sa de donare a sa tzitade de Casteddu unu sistema integradu pùblicu de trasportos chi si basit a pitzu de sa mobilidade ligera. Sa firma de su protocollu chi inchìngiat unu tretu nou de sa metropolitana ligera de Casteddu est unu resurtadu importante pro su deretu a sa mobilidade, in lìnia cun is diretivas de is trasportos ligadas a sa sustenibilidade e a sa tutela de s’ambiente. At a èssere semper prus còmodu, non solu pro is casteddajos, lòmpere a su Poetu in ogna perìodu de s’annu».

Dd’at naradu su Presidente de sa Regione Christian Solinas cumentende sa firma de su protocollu de intesa tra Assessoradu de is Trasportos, Tzitade metropolitana, Comuna de Casteddu e Arst pro sa trata noa “Bonària-Poetu, Marina Piccola” de sa metropolitana ligera.

Su documentu est istadu firmadu dae s’assessore regionale de is Trasportos Giorgio Todde, dae su sìndigu metropolitanu e de Casteddu Paolo Truzzu, e dae s’amministradore ùnicu de s’Arst Chicco Porcu.

«Oe incarrelamus su percursu pro sa realizatzione de una trata de sa metropolitana ligera, importante pro sa tzitade de Casteddu pro ite at a aunire su tzentru cun su Poetu – at naradu s’Assessore de is Trasportos Giorgio Todde -. Su protocollu est su frutu de sa collaboratzione e de sa sinergia tra totus is sugetos interessados. Amus dèpidu apressibire a sa realizatzione de s’òpera pro non pèrdere is finantziamentos», at sighidu s’esponente de sa Giunta Solinas.

«Est unu progetu importante pro sa tzitade, fintzas si deo, si aere pòdidu seberare, dia aere impreadu custas risursas pro sa lìnia Policlìnicu – Sestu, chi a bisu miu est prus istratègica”, at decraradu Paolo Truzzu chi at allegadu in calidade de sìndigu metropolitanu e de Casteddu. “Est craru chi non podìamus fàghere in modu diversu, fintzas pro ite custas risursas balent unu terzu de su Patu de sa Tzitade metropolitana, e tando, cun responsabilidade, andamus a in antis augurende·nos de donare a is tzitadinos casteddajos un’òpera ùtile».

Sa trata noa, cun 5 firmadas e longa 4.420 metros, est finantziada cun una summa de prus de 44 milliones de èuros de is fundos FSC 2014/2020 chi faghent parte de su Patu pro s’isvilupu de sa Tzitade metropolitana de Casteddu.

Fatu fatu a sa firma de su protocollu ant a sighire totus is atos netzessàrios pro sa progetatzione definitiva e esecutiva e pro sa realizatzione imbeniente de s’òpera chi si pensat at a èssere cuncruida intro su 31 de mese de idas 2025.

«Non so cumbintu chi sa Giunta ghiada dae Christian Solinas at a durare chimbe annos, creo chi sa chistione de sa continuidade territoriale aèrea at a èssere su cumintzu de sa fine – at decraradu s’ex sìndigu de Casteddu – Sa Giunta at dimustradu totu sa discapatzidade sua pròpiu a s’ora de guvernare una Regione cumplessa comente sa Sardigna».

Ddi torrat a rispòndere in deretura Dario Giagoni: “Nos faghet praghere de iscobèrrere chi s’onorèvole collega Zedda in fines apat agatadu s’apentu beru suo: s’indovinamentu – iscriet in unu comunicadu su capugrupu de sa Lega- ma mancari sa cuntentesa, ddu sentimus meda de lu dèpere ismintzire, pro ite custa Giunta tenet idea de durare totu su mandadu e, mescamente de s’impinnare su prus possìbile pro more chi is tzitadinos sardos siant pregiados de sos resurtados otentos».

Eris imbetzes est istadu su Guvernadore a difùndere una nota pro torrare isceda a sa decraratzione de sa Cummissione Europea chi non reconnoschiat comente formales is atopos cun is esponentes de sa Giunta, «Est ingiusta meda e ofensiva» dd’at definida Solinas chi at pedidu a Bruxelles de ismintzire cussos faeddos. Ma non ddoe est istadu perunu passu in segus e antzis paret chi at a èssere pròpiu su Guvernadore a mòvere a Bruxelles pro chircare de nde tirare unu “sisse” a sa Cummissione e mescamente sa pròroga pro evitare su peus, s’iscadèntzia de su bandu de su 16 de abrile.

Peristantu Todde, s’assessore a is trasportos s’agatat in sa Capitale pro faeddare cun sa Ministra De Micheli chi in sa bìsita sua in Sardigna aiat aprovadu sa proposta de sa Regione. A dolu mannu oe sa ministra fiat impinnada a Lodi in ue est acuntèssidu s’intzidente ferruviàriu acanta sunt mortos duos machinistas. Tando sa chistione de sa continuidade territoriale est andende cràstina cràstina sena rimèdiu, francu chi non lompat sa meda disigiada risposta favorèvole dae Bruxelles, a su mancu s’isperat.