S’epidemia de coronavirus sighet a s’ispainare: s’ùrtimu bulletinu faeddat de 56 mortos e belle duamìgia contagiados.

Segundu sas autoridades sanitàrias tzinesas su virus, uguale pro su 79,5% a sa Sars, non diat èssere gasi potente, ma prus contagiosu.

Unu comunicadu de su ministeru de sa Salude at fatu a ischire chi sunt “totus negativos” sos casos suspetos de coronavirus 2019-nCoV signalados in Itàlia, ma sos controllos sunt istados afortiados e su personale mèdicu in sos aeroportos de Roma Fiumicino e Milanu Malpensa est istadu aumentadu.

Sa Tzina, comente at iscritu Repùbblica, at annuntziadu una proibitzione provisòria de su cummèrtziu de pegos agrestes, bidu chi si pensat ca s’epidèmia siat cumentzada pròpiu in unu mercadu de animales serbàticos bèndidos pro si ddos papare.

S’allevamentu, su trasportu o su cummèrtziu de totus sas genias de animales agrestes est proibidu “dae sa die de s’annùntziu finas s’acabbu de s’istadu epidèmicu natzionale”, si leghet in una diretiva de su ministeru de s’Agricultura tzinesu.

Wuhan est divenida una tzitade pantasma e ddoe est istada sa prima vìtima a Shanghai, una de sas prus mannas pratzas finantziàrias mondiale, chi registrat 40 casos atzertados. A pustis de Pechinu, fintzas Tianjin, Xi’an e sa provìntzia de Shandong ant proclamadu su firmu de sos mèdios pùblicos a longa percurrèntzia.

S’impreu de sa fatzola est obrigatòriu in duas provìntzias (Guangdong, Jiangxi) e tres tzitades tzinesas (Nanchino, Ma’anshan e Xinyang). Disneyland Hong Kong at serradu a su pùbblicu. Sos Istados Unidos ant cumentzadu s’evacuatzione de sos cunnatzionales e su pròpiu sa fàbrica de sa Peugeot.

In su mentrestempus unu malàidu est suta osservatzione a Toronto, in Canadà. Unu casu suspetu est istadu signaladu fintzas a Vienna, si tratat de un’assistenta de bolu tzinesa chi su 24 de ghennàrgiu est arribbada in sa capitale austrìaca e chi in sas dies prima est istada a Wuhan.

Tres campiones de tres malàidos ricoverados sunt resurtados positivos a su virus.

S’influèntzia est lòmpida in Sardigna e sos primos campiones positivos a su virus de ocannu sunt istados agatados unas cantas die a oe dae su laboratòriu de Virologia Ispetziale de s’Aiensa Ospedaliera Universitària de Tàtari.

Su virus est istadu identificadu in duos malàidos ricoverados in sos repartos de s’Aou de Tàtari e unu in unu malàidu chi s’agatat in un’ispidale gadduresu.

Totus e tres sos campiones – faghet ischire su laboratòriu de Virologia Ispetziale – sunt resurtados positivos a su virus influente de tipu A sutatipu “H1N1 pdm09”. Pro s’ora non sunt istados identificados campiones positivos pro virus influente de tipu A sutatipu H3N2, e de tipu B giai signalados a livellu natzionale.

Su laboratòriu de Virologia Ispetziale, chi faghet parte de s’istrutura cumplessa de Microbiologia e Virologia dirìgida dae su professore Salvatore Rubino, est coordinadu dae sa professora Callina Serra.

«In Sardigna – at naradu Salvatore Rubino, diretore de sa Microbiologia e Virologia de s’Aou de Tàtari – s’istajone influente incumentzat pro su prus unu pagu a trigadiu cunfrontu a s’Itàlia. Finas a immoe, a livellu natzionale, s’istajone influente est istada caraterizada dae una tzirculatzione moderada de sos viros A/H3N2, A/H1N1 pdm09 e B, comente resurtat peri dae s’ùrtimu raportu Influnet pro sa vigilàntzia virològica. In Sardinga sa punta màssima l’amus a tènnere tra ghennàrgiu e metade de freàrgiu».

Sa regorta de sos campiones de analizare benit fata dae sos mèdicos “guardianos”, chi s’agatant in totu su territòriu de sa Sardigna. In prus s’agiunghent sos dotores de sos ispedales regionales.

Pro immoe su prus de sos campiones benit dae sos dotores de sos repartos de sos ispidales. Pretzisamente: Pediatria, Meighina e Terapia intensiva. Sos tres campiones positivos a su virus influente fiant de unu pipiu e de duos adultos.

«Sos campiones clìnicos impreados pro sa chirca de su virus influente o de sos cumponentes suos – ispiegat sa professora Callina Serra de su laboratòriu de Virologia Ispetziale – sunt istados testados cun metòdicas molecolares pro individuare tipu e sutatipu de su virus influente tzirculante. Sos datos otentos benint imbiados ogna chida, pro bia telemàtica, a su Tzentru de coordinamentu natzionale de s’Istitutu Superiore de Sanidade pro compudare s’eficatzidade de sa campagna vatzinale e s’essia de possìbiles mudaduras virales».

A livellu natzionale, sos primos duos campiones positivos a su virus influente sunt: unu de tipu A sutatipu “H1N1 pdm09” e unu de tipu B, lineàgiu Victoria, sunt istados signalados pro mèdiu de su portale InfluNet a s’acabbu de onnisantu.

In su perìudu a in antis de su cumintzu de sa vigilàntzia virològica (chida 46/2019), calicunu laboratòriu de riferimentu ant signaladu casos isolados de infetzione de virus influente in Itàlia. Mescamente, sunt istados cunfirmados tres casos de influèntzia: unu virus B/Victoria identificadu a s’acabbu de cabudanni (chida 39/2019) dae s’Azienda ospedaliera universitària de Parma in una pitzinna de 6 annos; unu virus A (H1N1) pdm09 identificadu a metade de mese de ladàmine (chida 42/2019) in su repartu de Maladias Infetivas de s’ispidale pediàtricu Giovanni XXIII de Bari in una pitzinna de 6 annos; unu virus B/Victoria identificadu a fine de mese de ladàmine (chida 43/2019) a s’IRCCS “Lazzaro Spallanzani” de Roma in unu sugetu de 24 annos contoniadu dae s’istràngiu.