Sa mòvida de Matteo Salvini però nd’at iscasidadu unu muntone de dibatas e disputas.

S’ex ministru de s’internu, pro s’atzione sua, at retzidu medas crìticas a livellu natzionale, ma fintzas internatzionales.

B’est mancadu pagu chi b’esseret fintzas unu’intzidente diplomàticu cun sa Tunisia, cun s’ambasciadore tunisinu in Itàlia, Moez Sinaoui,  chi at definidu su gestu de Salvini: «Una provocatzione bergungiosa».

Prus graes is faeddos su vitze presidente de su paisu nordafricanu Osama Sghaier: «Salvini est unu ratzista chi ponet in perìgulu is raportos tra is natziones nostras.»

Non sunt mancados is atacos de is aversàrios polìticos de su tzentrumanca, ma peri is alleados de su tzentrudereta sunt istados bastante fritos pighende is defensas de su dirigente leghista.

Fintzas su capu de sa politzia Franco Gabrielli at brigadu a su polìticu sa tzitofonata narende: «Nono a sa giustìtzia de ghenna in ghenna.»

Salvini at naradu de no èssere pentidu pro su chi at fatu,  antzis pro motivare s’atzione sua at afirmadu: «Non si tratat de èssere italianos o tunisinos, tocat a firmare s’ispainu de sa droga. Si serbit peri dae unu caminu a s’àteru e dae tzitòfono a tzitòfono.»

Una mòvida eletorale in vista de sas regionales de s’Emilia Romagna de domìniga 26 ghennàrgiu.

Sa tzitofonada de Salvini at fatu amachiare totu sas retzas sotziales, in ue ant cumentzadu a essire pàrreres  a favore e pàrrere contra a su leader leghista.

B’at chie at criticadu meda su segretàriu de su Carroccio, àteros imbetzes ant donadu coddu a s’atzione de su polìticu, cussigiadu dae una segnora de su bighinadu -chi sa die in fatu dd’ant fatu dannu a sa màchina-.

S’immàgine de Salvini alleghede a su tzitòfonu, cun fotomontàgios e istròtzios de ogna genia, at prenu totu sas retzas sotziales .

Ma a donare neghe o rajone a  Salvini, ,e  a detzìdere si at fatu bene o male, ant a èssere is eletores de s’Emilia Romagna cun votu de custa  domìniga.

A medas primos tzitadinos italianos, sa decraratzione de Jennifer Lopez, non nche ddis est essida dae s’àtera origra.

In un’intervista cuntzèdida a Vanity Fair sa diva americana at espressadu su disìgiu de si nche cambiare a bìvere a unu logu a largu dae sos Istados Unidos. Destinatzione: Bali o una biddighedda italiana.

Diat bòlere fàghere una vida prus trancuilla e prus simpre, faghende cosas normales comente andare in bitzicleta pro esèmpiu.

In deretura medas primos tzitadinos itàlicos si nche sunt intèndidos interessados, cuntentos e bregiosos de tènnere comente cuntzitadina a Jennifer Lopez, connota cun su nùmende de JLo.

Tra sos primos su sìndigu de Casteddu Paolo Truzzu, chi at cumbidadu sa cantante de orìgine portoricana a si tramudare in su cabulogu sardu. Truzzu in una lìtera at fatu ischire ca tzitade no est minore, ma addata a disìgiu de una vida a mesura de òmine espressadu dae s’artista.

Sighi sighi s’est fatu intèndere peri su vitze sìndigu de San Quirico di Orcia – in provìntzia de Siena – Marco Bartoli, chi at provadu a ingangulitzare s’artista bantende sa bidda sua comente logu de grandu bellesa ma peri riservadu.

Imbetzes su sìndigu de Berceto Luigi Lucchi, at propostu de regalare a JLo peri una domo, ma de restaurare.

Seguramente pro is sìndigos custa est istada una bella trassa publitzitària pro acostiare su nùmene sa bidda o tzitade issoro a cussu prus famadu de Jennifer Lopez.

Totu custu at iscasidadu sa reatzione bronta de is impitadores de is mèdia sotziales, chi ant prenu sa retze de memes incredìbiles e fotomontàgios ispassiosos de s’artista istadunidensa in is logos prus improbàbiles, opuru cun is colores de su gonfalone de is vàrios comunos chi si sunt propostos de dda ospitare.

Pro custos invitos non sunt mancadas fintzas is crìticas de is àteros primos tzitadinos italianos, medas imbetzes si l’ant pigada a rìere.

Sa beridade est ca chie bivet in una bidda pitica de sa Sardigna ischet ca su problema prus mannu est s’ispopulamentu. Chissai si una cuntzitadina comente a Jennifer Lopez diat pòdere firmare custu tristu fenòmenu. Tzertu, si non prus diat a èssere una bella presèntzia de bìere, ma serbit àteru.