Unu bilantzu prus chi positivu is primos 5 meses de fainas de su servìtziu de trasportu sotziale de s’Auser Ogliastra. Prus de 20 mìgia chilòmetros fatos essidas cuotidianas pro su Fiat Doblò chi acumpàngiat persones antzianas e diversamente àbiles prus che totu a is logos cura e tzentros sotziu-assistentziales in su territòriu ogiastrinu, ma non solu. Su servìtziu est mandadu a in antis gràtzias a s’impinnu sena pasu de is voluntàrios de s’assòtziu chi donant su tempus issoro a servìtziu de chie tenet bisòngiu. Totu custu est istadu possìbile gràtzias a 21 sponsor de su territòriu chi ant partetzipadu cun una cuota a s’achistu de sa vetura, e sa collaboratzione de sa Pmg Itàlia.

“Est unu servìtziu sentidu meda, chi est pighende pee semper de prus. In custos meses de fainas amus acumpangiadu impitadores printzipalmente a s’Oncològicu de Casteddu, ma retzimus rechertas fintzas pro s’ispidale de Aristanis e Nùgoro, in prus de is presìdios sanitàrios ogiastrinos- ispiegat su referente territoriale de s’Auser Giuseppe Simone. Ma non solu, amus acumpangiadu assistidos fintzas a eventos, comente a coja, pro ite est importante chi siat garantida a chi s’agatat in una cunditzione de dificultade s’oportunidade de partetzipare a sa vida sotziale. Pro evitare chi is rechertas si pòngiant in pitzu de pare, ammentamus chi est netzessàriu prenotare su servìtziu”.

S’assòtziu Auser cun s’obietivu de dare unu servìtziu semper prus efitziente at istantargiadu una retze de collaboratzione cun is assòtzios de volontariadu de su territòriu.

A sustentare s’indispensabilidade de su servìtziu sunt is impitadores etotu chi si nde serbint, comente contat Marta Secci de Triei: “Prima de connòschere custa possibilidade mama mea biagiaiat ogni duas chidas a s’Oncològicu pro is terapias cun su tassista, tando fiat acapiada e is oràrios de su tassì. Dae cando amus iscobertu custu servìtziu semus torradas a nàschere: benint a la pigare a domo, dd’acumpangiat a s’ispidale, isetant chi finat sa terapia e poi nche dda torrant a domo”.

“Ddis torro gràtzias meda meda pro su chi faghent – narat Serafino Pili, 38 annos de Tortuelie – pro more sa cunditzione mea, est difìtzile pòdere andare a medas logos. Pro esempru fintzas solu andare a bìdere una partida de bòcia, non tèngio niunu chi mi potzat acumpangiare e si non esseret pro isis ddoe dia a dèpere rinuntziare”.
“S’amministratzione cumunale promovet e sustentat s’assòtziu, agradèssida pro custu servìtziu bitu cun praghere de sa comunidade pro ite apuntu garantit mobilidade a is persones cun dificultades motòrias e megiorat sa calidade de sa vida issoro” afirmat s’assessore cun dèlega a su Volontariadu Stefania Vargiu.

S’ammentat chi su servìtziu est a disponimentu de totus is tzitadinos e is tzitadinas chi nd’ant a pòdere rechèrrere s’usu tràmite s’Auser Ogliastra tràmite prenotatzione a su nùmeru 331/5849989, ativu dae su lunis a sa chenàbura, dae is 9 a is 13 e dae is 16 a is 20. Chi boleret intrare a fàghere parte de sa famìlia manna de s’Auser comente voluntàriu podet mutire s’assòtziu a su nùmeru indicadu opuru sim podet presentare in sa sede provisòria de bia Baccasara acanta sa Càmera de su Traballu.

Su New York Times at cumpiladu una lista de sos 25 prattos de pasta chi non si podet faghere a mancu de assazzare in Italia, apparande unu viaggiu in sa coghina chi rugat sa penisula intrea, incluidinde puru sa Sardigna. In mesu de sas saboridesas seberadas, si marcant sos tzelebres culurgiones, chi espressant sa traditzione sarda.

Custos culurgiones particulares sunt bistados assebertados e appretziados in su ristorante Hotel Ispinigoli de Durgale.

Su giornale famadu, presentat s’Hotel Ristorante Ispinigoli, commente unu logu galanosu, abbertu dae Aprile a Santuaini, chi serbit prattos de sa traditzione sarda torrados a faghere. S’Hotel, godit de una vista chi che bogat s’alenu supra binzas, arbules de olia e de frutta chi che andant a banda de su Golfu de Orosei, chi est in sa costera orientale de sa Sardigna.

Sos culurgiones sunt fattos cun pasta frisca prena de patata, casu, azu e menta, serrados cun d’una cosidura distinta a pittiche chi ammentat sas ispigas de su ranu. Naschidos in s’Ozzastra, chi si acciappat a casi 90 minutos de macchina pius in bassu de Durgale, custos culurgiones ant sos limides de sa localidade po divennere unu prattu appretziadu in tottu s’isula. Bell’e chi, sa retzetta pottat cambiare de pagu dae coghineri a coghineri, manteninde vivu su connottu e sa diversidade de sa coghina.

In s’Hotel Ristorante Ispinigoli, sos culurgiones sunt preparados dae su coghineri Giovanni Cossu e dae s’isquadra sua, in mesu de sa cale bi est su coghineri Gian Nicola Mula. Custa coghina de medas ingendras a condussione de famiglia at seberadu de presentare sos culurgiones in manera nova: imbetzes de los cundire cun sa bagna de prumatta rustica, los serbint cun d’una cugliera de bagna e casu de erbeghe rattadu. Po accumpanzare custu prattu, s’indittat su binu de sa chentina Tani Taerra Vermentino de Gaddura 2022, unu accropamentu chi evidentziat sos sabores de sa coghina sarda.

Fintzas su coghineri e mere de su Ristorante Redzora de New York at laudadu su Ristorante Hotel Ispinigoli. At evidentziadu commente su ristorante, chi est guvernadu dae sa mattessi famiglia dae tres ingendras, apparet una de sas menzus vistas de sa Sardigna e una coghina chi acconziminat connottu e novidade.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22