Unu bilantzu prus chi positivu is primos 5 meses de fainas de su servìtziu de trasportu sotziale de s’Auser Ogliastra. Prus de 20 mìgia chilòmetros fatos essidas cuotidianas pro su Fiat Doblò chi acumpàngiat persones antzianas e diversamente àbiles prus che totu a is logos cura e tzentros sotziu-assistentziales in su territòriu ogiastrinu, ma non solu. Su servìtziu est mandadu a in antis gràtzias a s’impinnu sena pasu de is voluntàrios de s’assòtziu chi donant su tempus issoro a servìtziu de chie tenet bisòngiu. Totu custu est istadu possìbile gràtzias a 21 sponsor de su territòriu chi ant partetzipadu cun una cuota a s’achistu de sa vetura, e sa collaboratzione de sa Pmg Itàlia.

“Est unu servìtziu sentidu meda, chi est pighende pee semper de prus. In custos meses de fainas amus acumpangiadu impitadores printzipalmente a s’Oncològicu de Casteddu, ma retzimus rechertas fintzas pro s’ispidale de Aristanis e Nùgoro, in prus de is presìdios sanitàrios ogiastrinos- ispiegat su referente territoriale de s’Auser Giuseppe Simone. Ma non solu, amus acumpangiadu assistidos fintzas a eventos, comente a coja, pro ite est importante chi siat garantida a chi s’agatat in una cunditzione de dificultade s’oportunidade de partetzipare a sa vida sotziale. Pro evitare chi is rechertas si pòngiant in pitzu de pare, ammentamus chi est netzessàriu prenotare su servìtziu”.

S’assòtziu Auser cun s’obietivu de dare unu servìtziu semper prus efitziente at istantargiadu una retze de collaboratzione cun is assòtzios de volontariadu de su territòriu.

A sustentare s’indispensabilidade de su servìtziu sunt is impitadores etotu chi si nde serbint, comente contat Marta Secci de Triei: “Prima de connòschere custa possibilidade mama mea biagiaiat ogni duas chidas a s’Oncològicu pro is terapias cun su tassista, tando fiat acapiada e is oràrios de su tassì. Dae cando amus iscobertu custu servìtziu semus torradas a nàschere: benint a la pigare a domo, dd’acumpangiat a s’ispidale, isetant chi finat sa terapia e poi nche dda torrant a domo”.

“Ddis torro gràtzias meda meda pro su chi faghent – narat Serafino Pili, 38 annos de Tortuelie – pro more sa cunditzione mea, est difìtzile pòdere andare a medas logos. Pro esempru fintzas solu andare a bìdere una partida de bòcia, non tèngio niunu chi mi potzat acumpangiare e si non esseret pro isis ddoe dia a dèpere rinuntziare”.
“S’amministratzione cumunale promovet e sustentat s’assòtziu, agradèssida pro custu servìtziu bitu cun praghere de sa comunidade pro ite apuntu garantit mobilidade a is persones cun dificultades motòrias e megiorat sa calidade de sa vida issoro” afirmat s’assessore cun dèlega a su Volontariadu Stefania Vargiu.

S’ammentat chi su servìtziu est a disponimentu de totus is tzitadinos e is tzitadinas chi nd’ant a pòdere rechèrrere s’usu tràmite s’Auser Ogliastra tràmite prenotatzione a su nùmeru 331/5849989, ativu dae su lunis a sa chenàbura, dae is 9 a is 13 e dae is 16 a is 20. Chi boleret intrare a fàghere parte de sa famìlia manna de s’Auser comente voluntàriu podet mutire s’assòtziu a su nùmeru indicadu opuru sim podet presentare in sa sede provisòria de bia Baccasara acanta sa Càmera de su Traballu.

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22