Incumentzat sa seletzione de 4 voluntàrios de impreare in progetos de Servìtziu Tzivile Natzionale pro su Comunu de Àrthana.

S’Amministratzione Cumunale informat chi at abertu su bandu de partetzipatzione pro is progetos de realizare in s’annu in cursu e in su 2019: durada de s’esperièntzia 12 meses. «Si tratat siguramente de un’esperièntzia fundamentale pro is giòvanos» sutalìniat su sìndigu Marco Melis «unu istrumentu pretziosu pro agiudare is giòvanos, contribuende a s’isvilupu sotziale e culturale.

Pro custu bolimus dare una visibilidade semper majore a su “servìtziu tzivile voluntàriu” e amus donadu a is pitzocos e a is pitzocas  sa possibilidade de ispèndere in sa manera mègius is energias issoro a su servìtziu de sa comunidade. Cunfidamus in sa partetzipatzione màssima de is giòvanos nostros, chi iscant collire un’oportunidade gai significativa chi at a èssere ùtile pro sa crèschida personale issoro».

Su progetu aprovadu “Il tuo custode 3″in su setore de su donamentu cura, at a permìtere de tènnere unu ruolu de tzitadinàntzia ativa favorende atziones de suportu a is betzos e a is malàidos chi non si podent manigiare a solos durante sa die.

Recuisidos pro pòdere partetzipare a su bandu: podent presentare dimanda sos giòvanos, sena distintzione de sessu chi, a sa data de presentatzione de sa domanda, apant lòmpiu degheoto annos e chi non tèngiant prus de bintoto anno (28 annos e 364 dies).

Sa domanda de partetzipatzione, indiritzada diretamente a su Comunu, depet lòmpere intro su 28 Cabudanni 2018 a s’ufìtziu de su protocollu de su Comunu de Àrthana.

Sardigna cun Matteo: unu biàgiu ispantosu intre itineràrios e comunidade

Matteo Gamerro, ingegneri de 46 annos originàriu de Barone Canavese, in provìntzia de Torino, est prontu pro un’aventura noa in Sardigna, chi at a comintzare s’8 de santugaine dae Terraba e at a sighire finas a su 14 de santugaine.

“Sardigna cun Matteo” est su nùmene de su progetu chi l’at a bìere andende peri s’itineràriu de Nostra Segnora de Bonària e in s’itineràriu mineràriu de Santa Bàrbara, passende in Arbus, Gùspini e Montevecchio, in sa provìntzia de Sud de Sardigna. Matteo, chi si faghet a cumprèndere pro mesu de puntadore oculare, at a èssere acumpangiadu in totu su biàgiu dae unu grupu de “Ànghelos de sa Guàrdia” chi l’ant a portare cun sa carrotzina ispetziale sua.

S’idea est istada de Federica Laneri, apassionada de Costa Verde e de Sardigna. Gamerro, persone curiosa dae semper, isportiva e amantiosa de sos biàgios, at agatadu in su caminare una manera pro sighire a esplorare su mundu nointames de sa diàgnosi de sclerosi multipla, chi at tentu a 20 annos. Dae 16 annos in carrotzina, Matteo at imparadu a si torrare a imbentare sa vida, mustrende chi finas a sas provas prus dificultosas si lis podet parare fronte sena rinuntziare a sos sognos.

S’esperièntzia sua in sos biàgios est una chirca de connoschèntzia e de isperimentatzione contìnua. Laureadu in ingegneria, bivet in mesu de sa natura in Barone Canavese e impreat su puntadore oculare pro si fàghere a cumprèndere e pro iscrìere, siat in computer siat in sos social. Dae su 2015 at publicadu chimbe libros, comente “2 grandi + 2 piccole” e “4 uguali”. At giai fatu duas bortas su biàgiu de Santiago e 1.300 chilòmetros de s’itineràriu de Santu Micheli. Sas impresas suas sunt documentadas in duos docufilm, de projetare in Sardigna, in Terraba, Gùspini e Arbus.

Onni pasu in su biàgiu de Matteo at a èssere oportunidade de iscàmbiu culturale e sotziale: atòbios cun amministradores locales, istudiantes, tzitadinos e assòtzios, e in prus momentos de convivialidade e esperièntzias in su territòriu.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”