Cardedu: durante unu servìtziu antidroga, sos militares de su NORM e de s’iscuadrìllia de Iersu, ghiados dae su M.a.s.U.P.S Oggiano e dae su M.C. Fanni, ant arrestadu a N.D., pitzocu intzensuradu de tzint’annos de Iersu, pro su reatu de detentzione illètzita de droga finalizada a s’ispatzu.

Su fatu est acontèssidu in Museddu. A pustis de àere notadu movimentos suspetos tra duas màchinas, sos militares ant detzìdidu de intervènnere: s’inghesta at permìtidu de iscoprire duos sachiteddos de belle 1 grammu ognunu cun cocaina. A cussu puntu sos Carabineris ant detzìdidu de percuisire fintzas sa domo de su giòvanu e ant agatadu àteros 5 grammos de cocaina a s’istadu puru, 50 grammos de sustàntzia additivas, diversos materiales pro su cunfetzionamentu e casi 1.300 èuros in dinari.

Àteras duas persones sun istadas denuntziadas, sa prima pro guida suta s’efetu de drogas e sa segunda pro ispatzu.

Unu tempus de isporu e accottu at imboligadu Valledoria, inube sa comunidade si est affacchiada po narrere “No” a sa violentzia, pustis de sos attentados graves fattos cun su fogu, chi ant corpadu sa filigresia de su Cristu Re e su ex parracu suo, don Frantziscu Mocci.

Chentinajas de fideles ant partetzipadu a una proffiscione in sas bias de sa bidda, chi est finida cun d’una Missa tzelebrada in su palattu de s’isport, dae su piscamu de Tempio-Ampurias, Roberto Fornaciari. In su mentres de sa celebratzione, su Piscamu Fornaciari at diritzadu un’appellu dae su coro a sa comunidade, imbidande chie tenzat notissias chi serbant, a faeddare cun sas autoridades.

Sas peraulas suas ant evidentziadu s’apprettu de faghere lughe supra cantu est sutzessu. Sa Missa est bistada unu momentu de consideru e de isperantzia, ma puru po bistare accanta a don Frantiscu Mocci, chi est bistadu iscuttinadu dae s’accadessimentu. Pustis de essere bistadu mira de paritzos accadessimentos de intimidassione, su parracu at dassadu sa ghia de sa filigresia, tuccande in d’una attera comunidade. Su Piscamu at creffidu dare a sos chi funt presentes sos saludos de s’ex parracu.

Sa bessida a campu at bidu sa partessipatzione de casi dughentas pessonas, unu signale forte de unione e resistenzia contra sa violentzia. Sas fraccas azzesas in su mentres de sa proffiscione ant lughizadu sas carrelas de sa bidda, mustrande sa volontade de no si apprigare a sa timoria. In su mentres de sa preiga, su piscamu at evidentziadu s’importantzia de accomettare sas difficultades cun corazu e ispiritu de unidade. At imbidadu sos fideles a no si arrendere a s’annuzu, ma a impittare custa crisi comente un’opportunidade po affortigare sos ligamenes de sa comunidade e tribagliare imparis po su bene de tottus.

S’incorazamentu a addurare unidos est bistadu accollidu cun emossione meda dae sos presentes, chi ant bidu in sa celebratzione unu puntu de tuccada po unu caminu novu de paghe e appaghiamentu.

In su mentres sas scruccullas sunt andande a daenanti. Sos aberguadores sunt chircande de assebertare sos responsabbiles, controllande donzi minimu elementu chi potat faghere lughe supra sas resones e supra chie at fattu custos crimenes. Sas autoridades de su logu e sa comunidade ant espressadu accottu prenu a sa politzia, cunfirmande sa netzessidade de faghere craresa.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22