Esperièntzia noa in su set pro su regista baunesu Gabriele Incollu e su cast minore, ma mannu suo de Mondo Rincitrullulito, formadu dae bator pipios ogiastrinos.

Bator pipios, cumpàngios de iscola, s’agatant in punitzione in un’aposentu durante sa ricreatzione. Tra nervosismu, desatinos e ofesas, a s’acabbu ant a diveniere prus amigos de prima.

“Semus inoghe, s’iscuadra a su cumpletu. Nos semus istracados, amous passadu fele, nos semus arrenegados, in su perfetu istile de su curtumetràgiu, ma fintzas nois a sa fine semus divenidos prus amigos chi non mai. A pustis Tempi, semus in campu cun Mondo Rincitrullulito, torra a traballu cun custos bator giòvanos. Pipios chi finas a un’annu faghet non connoschia, e de sos cale immoe non dia ischire fàghere a prus a mancu” contat su regista “Deo so unu de issos, non b’at peruna duda. Mancu sas boghes prus disumanas o sos arrenegos subitàneos comente a una cadira chi benit iscuta a terra los podent assustare, pro ite non mi pigant in su sèriu. Deo pro issos so comente unu frade majore. So seguru chi s’esperièntzia (minore) cun Tempi e immoe custa ùrtima (prus particulare e cumplessa), si l’ant a portare pro semper in su coro, e deo su matessi. Traballare cun issos est istada una de sas cosas prus bellas chi mi poderent capitare”.

“Oramai semus una crica, sa crica de sos filmados, e fintzas si fortzis custu at a èssere s’ùrtimu traballu cun issos, no at a cambiare nudda, pro itecomo semus amigos. “Amigos mannos”. A Gabri, Giulia, Alessia e a Sara su ringratziamentu meu prus mannu. Iscurtades sos pipios, colade tempus meda cun issos, ispassiade·bos cun issos e acabadela de èssere mannos pro 5-10 minutos. Nde balet a beru sa pena” concruit Incollu.

Custu su trailer de su filmadu nou de Incollu:

https://www.youtube.com/watch?time_continue=9&v=m8Yw0oL65eE&feature=emb_title

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22