“Traballu ogna die, cun orgòlliu pro su comunu, trascurende sa famìllia mia e is amigos puru, pro chircare de megiorare sa calidade de sa vida in sa bidda nostra e poi, lompo a s’ufìtziu e m’agatu custas fotografias! Ma deo naro, ite sensu tenet a nche fuliare s’àliga in caminu si totus pagamus is derramas de sa Tarsu?”.

S’est isfogadu in custa manera, in sa bacheca cosa sua de internet, su sìndigu de Irbono Andrea Piroddi chi chenàbura a mangianu at agatadu in sa mesa de s’ufìtziu suo is fotografias de s’arga chi calicunu intzivile at lassadu in custas dies pròpiu in s’essida de sa bidda, is su parcu de Samunadòrgiu, in su caminu pro calare a Tortolì.

A pustis de s’isfogu in Facebook, però, su sìndigu at detzìdidu de aumentare is controllos in su territòriu e de no nde perdonare mancu una a chie imbrutat su logu e a chie non rispetat su calendàriu de sa regorta diferentziada. Sa retzeta de su sìndigu pro fàghere rispetare s’ambiente est simpre ma eficatze: multas caras e controllos severos. Andrea Piroddi contat prus che totu in s’agiudu de is tzitadinos irbonesos. A abbandonare refudos in giru est podet costare una contraventzione chi andat dae 2.600 a 26.000 èuros e finas sa galera, dae 3 meses finas a 1 annu de presone, cunforma a sa norma de su D.Lgs. 152/2006. Is I violadores de sa lege sunt avèrtidos!

Sunt 47 subra 58 de sos chi nde tenent deretu sos Comunos chi ant formalizadu s’adesione a sa Fundatzione de su Treninu Birde.

Sos Comunos fundadores sunt sos sighentes: Azos, Aritzu, Àrthana, Brebì, Bortigiadas, Bosa, Calanzanus, Tzaramonte, Dèsulu, Elini, Flussio, Gàiru, Jelisuli, Irbonu, Ìsili, Iersu, Làcana, Laerru, Lanusei, Luras, Macumere, Magumadas, Mandas, Maltis, Meana, Modolo, Nulvi, Nuradda, Osilo, Osini, Pèifugas, Piaghe, Sàdili, Santu Antoni’e Calanzanus, Tàtari, Serri, Seui, Sòrgunu, Sune, Tèmpiu, Tinnura, Tonara, Tortuelie, Tresnuraghes, Ulassa, Ussassa, Biddamanna Strisàili.

Sos rapresentantes legales de sos 47 Comunos ant a firmare martis su 5 de nadale in Tàtari, a sas 10, in s’Àula magna de s’Universidade, a sa presèntzia de su notàriu, Andrea Porqueddu, s’atu costitutivu de sa Fundatzione chi tenet comente  òrganos su presidente, sa giunta esecutiva, s’assemblea de partetzipatzione e su revisore de sos contos. Podent otènnere sa cualifica de “partetzipantes”, sena deretu de votu in assemblea, sas pessones fìsicas e giurìdicas, pùblicas e privadas, sos entes e sos assòtzios chi contribuint a sas fines de sa fundatzione. Sa Giunta regionale, pro proposta de s’assessore de sos Trasportos, Antonio Moro, cun una deliberatzione aprovada in su cursu de s’ùrtima setziada, at designadu a sa càrriga de presidente su commercialista Elso Rei, 51 annos, titulare in s’omònimu istùdiu de cummertzialistas e consulentes de traballu.

Sa Fundatzione Treninu birde at a èssere presentada in Tàtari martis 5 de nadale, a sas 10, in s’Àula Magna de s’Universidade, in su cursu de unu cunvegnu abertu a su pùblicu, de su tema “Il treno ad altra velocità”, in ue ant a partetzipare su presidente de sa Regione, Christian Solinas, s’assessore regionale de sos Trasportos, Antonio Moro, su presidente de s’Anci, Emiliano Deiana, Giovanni Pruneddu, dotzente de Deretu de sa navigatzione e de su turismu de s’Universidade de Tàtari, e sa diretora de su mensile “Dove” (Rcs-Corriere della Sera), Simona Tedesco. Prevìdidos sos interventos de su retore Gavino Mariotti, de su sìndigu de Tàtari Gian Vittorio Campus, de su cummissàriu istraordinàriu de sa Provìntzia de Tàtari, Pietro Fois, e de su presidente de su Cussìgiu regionale, Michele Pais.

“Est una die istòrica pro su Treninu birde de sa Sardigna”- at naradu s’assessore Moro-. A pustis de annos meda, sa ferrovia istòrica prus manna  de Europa at agatadu duncas unu sistema de gestione chi potzat garantire finantziamentos pro satisfàghere sas aspetativas e sas aspiratziones de sos entes locales, de sos operadores, de sas impresas, de sos tzitadinos sardos e de sos turistas meda chi cherent unu biàgiu in sa Sardigna prus bera cun su trenu a àtera lestresa”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”