Is istudiantes de Baunei ogna coa de chida ant a pòdere torrare a bidda issoro dae Casteddu cun  s’Universibus, unu servìtziu de collegamentu postu a disponimentu dae sa Comuna pro is universitàrios baunesos chi istudiant in sa “capitale” sarda. S’abbonamentu annuale costat 50 èuros e est su resurtadu de una cumventzione tra sa Comuna de Baunei e sa dita Canu Trasportos. Su postale at a partire ogna chenàbura a is 21.00 dae pratza Mateotti e at a torrare a partire dae Baunei domìnigu a is 18.30. S’initziativa, chèrfia dae s’amministratzione de Baunei e dae su Sìndigu Salvatore Corrias, bolet favorèssere is istudiantes chi disìgiant torrare a Baunei ogna coa de chida pro leare parte a sa vida sotziale de sa bidda issoro.  Baranta universitàrios ant giai aderidu sutascrivende s’abbonamentu. Pro leare parte a s’initziativa bastat a intrare in su giassu ìnternet ufitziale de sa Comuna () e iscarrigare su mòdulu de sa rechesta. Is iscritzione s’ant a pòdere fàghere finas a su 21 de su mese de idas 2011.

S’immensu patrimoniu de musica e cultura sarda at acciappadu vida noa gratzias a s’inscansabbile impignu de s’Accademia de Musica Sarda chi at preservadu e valoritzadu sa ricchesa de sas registratziones costoidas in su gai nomenadu “Fundu Pino Lai”.

Custu istravanadu archiviu, fattu de 3.600 cassittas de musica, est una prenda chentza cunfruntu, unu ponte derettu a sas artas raighinas de s’usantzia poetica a boghe de sa Sardigna. Sas naschidas de custu istravanadu archiviu arribant dae pius de 70 annos de passione e deditzione dae parte de Pino Lai, unu collessionista appassionadu, chi at accorradu cun sapientzia custas pretziosas testimonias de su passadu, in medas annos.

Torradu a battizzare in onore sou, su Fundu Pino Lai est unu pilotto fundamentale po cumprendere e
preservare sa ricca tessidura culturale de sa regione. Sas registratziones intro de custu archiviu, abbratzant unu tempus mannu meda, passande dae sos annos ‘50 po arrivare a su 2010, e apparant una ventana unica supra sas varias espressiones de s’arte poetica de sa Sardigna.

In mesu de sas andalas fittas supra custa cassittas, si podent agattare cantones de su connottu, versadas a tema, mutetos, arrepentinas e in pius, sas crispas e appassionadas garas poeticas, inube disputtadores chi teniant talentu meda, si disaffiant supra de temas seperados dae sa fantasia oppuru seperados dae su pubbricu.

Su valore de custu Fundu non si podet calculare, pro itte non si allindat solu a su valore annantu de sa musica e de sa poesia, ma arribat puru a su signifficu istoricu e de s’istudiu de s’omine. Onzi cassitta de musica, curada cun pretzisione dilica dae Pino Lai, est unu beru cassione de pretziosas notissias: dae sas datas e dae sos logos de sas registratziones, a sos nomenes de sos autores, a sa classificatzione de sas garas e puru a sos temas trattados in sas garas.

Gratzias a s’azzudu de Unica Radio, custu istravanadu patrimoniu est bessidu a fora, coffuzinde a meda zente de si affundare in sa fundaria de unu connottu betustu, chi sighit a drinnire cun intensidade in su coro de s’isula. S’opera de bardiada e balorimentu, fatta dae s’Accademia de Musica Sarda, assumit duncas unu signifficu detzisivu po preservare s’eredidade culturale de sa Sardigna e po la cussinnare a sas ingendras de su tempus benidore, in manera chi potant issas puru arregossiare de sa bellesa de custu istravanadu connottu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22