Si torrat a abèrrere custu mangianu in su tribunale de Lanusè su dibatimetu pro dannos ambientales in Cirra. S’udièntzia, fissada pro su 29 de su mese de ladàmene, fiat istada ispostada a oe pro more chi sa Regione Sardigna cun sa Provìntzia de Casteddu, aiant detzisu de si costituire parte tzivile, paris cun su sòtziu WWF e is vìtimas de sa “sindrome de Cirra”. At a tocare a su giuighe monocràticu  Nicola Caschili a detzìdere si acollire sa rechesta de is partes opuru nono.

In su bancu de is imputados ddoe ant a èssere is oto generale chi dae su 2004 a su 2010 si nche sunt donados su càmbiu in sa ghia de sa base: Fabio Molteni, Alessio Cecchetti, Roberto Quattrociocchi, Valter Mauloni, Carlo Landi, Paolo Ricci, Gianfranco Fois e Fulvio Ragazzon.  Totus depent respùndere de s’ùnicu reatu abbarradu durante sa fase preliminare: omissione dolosa agravada de cautelas contra a infortùnios e disacatos.

Oe puru, a dae in antis de su tribunale  ddoe at a èssere un’atopu de unos sòtzios e partidos antimilitaristas.

Paolo Anibaldi est un’esempiu istravanadu de fortza e cambiamentu in su campu de sa meighina. Naschidu in Rieti in su 1966, at deppidu affrontare un’iscancaradura grave meda a solu 17 annos po una maladia a su miuddu, chi li che at bogadu s’usu de sas ancas.

Bell’e gai, non si est dassadu dirrenare e at apprettadu sa passione sua po sa meighina, diventande meigu silugianu. In d’unu primu momentu operaiat sezzidu supra de una cadrea cun sas rodas, ma gratzias a una cadrea partigulare disignada propriu po issu, est diventadu su primu silugianu in Italia e su terzu in su mundu a operare a sa rea mancari non potat usare sas ancas.

Anibaldi si est laureadu cun lode in Meighina e Suligiania in s’Universidade de Sa Sapienza de Roma e at leadu puru una cualiffica in Silugiania Generale in s’Universidade de Tor Vergata. Sa formassione sua si est arricchida de pius cun d’unu master de secundu livellu in Management e mezoru de sas ASL e unu titulu de duttore de chirca in Limpidoria e Sanidade Pubbrica cun d’unu istudiu puru in Meighina Legale e Iscentzia Forense.

In su mentres de sa carriera sua, at isboddiadu arrolos de dirigente importantes meda, mustrande sas primorosas capatzidades suas de guvernu e organizassione. In mesu de sos suos sutzessos, est riconnoschidu commente su primu silugianu a usare in Italia sa tecnica “Snoll”(Sentinel Node Occulte Lesion Localization) in s’ispidale San Camillo de Lellis de Rieti. Custa procedura noa, chi dimandat una collaboratzione istrinta meda de sos duttores in meighina nucleare e suligianos, est usada po che bogare bugnos a sas tittas chi siant pitticcos,
evidentziande s’importantzia de s’iscoperta primitia e de s’accottu de sas materias divressas.

Pagu tempus faghede ,Anibaldi est bistadu nomenadu direttore de sa sanidade de su Mater Olbia Hospital. Cummentande custu incarrigu nou, at evidentziadu s’importantzia de connoschere e balorizare sas cumpetantzias de su personale, agguantande unu sensu de appartennentzia pius mannu, po dare servitzios de eccellentzia a sa comunidade. Sa nomina sua est unu riconnoschimentu non solu a sas cumpetentzias suas in sa proffessione, ma puru de s’istravanada capatzidade sua de leadership e bisione po su tempus benidore de sa sanidade.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22