“A pustis de chentu dies dae sa vitòria amus a tènnere su Puc nou”. Custas sunt istados is ùrtimos faeddos de Massimo Cannas in is oras sighentes a s’eletzione comente sìndigu de Tortolì in su mese de maju. A su chi paret Cannas bolet èssere de faeddu, sighende sa protzedura pro s’aprovamentu de su pianu urbanìsticu finas in austu, essende pro issu una cosa pretzisa giai cando fiat assessore in sa giunta ghiada dae Mimmo Lerede.

Intro mesu austu su sìndigu ant a addobiare in Casteddu a su funtzionàriu istrutore de su Puc pro presentare is integratziones e is curretziones fatas dae is ufìtzios de su comunu cunforma a is inditos imbiados dae sa Regione in is meses colados. In base a custas manera su Puc nou diat a dèpere permìtere sa disponibilidade de 731 mìgia metros cubos pro fràigos noos, 481 mìgia in sa zona C, in sa zona F 224 mìgia metros cubos, cumpresos is 77 mìgia pro su progetu Jana.

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22