Una de is maneras mègius pro connòschere ognuna de is caras de su paesàgiu sardu, mescamente de s’internu, est cussa de biagare cun su Treninu birde. Su trenu atraessat unu territòriu prenu de buscos e de padentes, acanta sa lìnia ferrada, is pontes is istatziones e is contaneras parte chi fagherent dae semper parte de su paesàgiu, incravadas in logos chi si ddoe lompet petzi cun sa ferrovia. Su trenu si movet a su giustu biore, sonende sa possibilidade a is passegeris de ammirare e de si gosare su paesàgiu chi mudat a cada furriada. Dae su 15 de abrile at a cumentzare su programma de “Biàgios a vapore”, su calendàriu nou de su Treninu Birde de sa Sardigna, in collaboratzione cun s’Arst, s’azienda regionale de is trasportos. S’at a pòdere biagiare cun su Treninu Birde cuncordadu cun sa cumpositzione prus de prestìgiu: sa locomotiva a vapore Reggiane 400 e sa carrotza s’època Bauchero 407. Custu est su calendàriu cun is datas e is oràrios:

Pauli (CA) –Mandas: 15, 22, 29 abrile e 6, 11 de maju (partèntzia 9.20 – arribu 12.20)

Mandas – Seui: 16, 25, 25 abrile e 7, 12 maju (partèntzia 9.00 – arribu 13.30)

Seui – Mandas: 17, 24, 26 abrile e 9 maju (partèntzia 9.00 – arrribu13.30)

Mandas- Pauli(CA): 18,27, 30 abrile e 9 maju (partèntzia 15.08 – arribu 18.18)

Pauli (CA) – Mandas: 19, 20 abrile e 3,4, 10 maju (partèntzia 9.20 – arribu 12.20)

Mandas – Pauli (CA): 19, 20 abrile e 3,4, 10 maju (partèntzia 15.08 – arribu 18.18)

Pro informatziones, prètzios de is billetes e prenotatziones: ARST Servizio Commerciale, tel. 070.580246- Istatzione de Mandas 070.984234, opuru [email protected]

«Sa Sardigna est manna, fitiana, pro nudda irregulare, ma chi isparesset dae tesu. Donat una sensatzione de ispàtziu…ispàtziu ammajadore a inghìriu e distàntzia de biagiare, nudda de finidu, nudda de definidu. Est comente sa libertade etotu»

David Herbert Lawrence

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22