Hugo Rafael Chávez Frías s’est mortu. Pro medas fiat petzi unu “populista” chi preigaiat sa rivolutzione solu pro afortire su podere personale suo. Pro medas àteros, imbetzes, fiat unu polìticu chi no atzetaiat cumpromissos, unu rivolutzionàriu berdaderu, unu de is pagos chi paraiat barra a is polìticas neo-liberales e imperialìsticas americanas. Sena duda, però, su capu bolivarianu fiat istimadu dae sa parti prus manna de su pòpulu suo, prus che totu de is pòberos, pro ite, in 14 annos de guvernu fiat renèssidu a inghitzare una surra de riformas in favore de is classes prus mìseras, abbassende de meda su malu nutrimentu, s’analfabetismu, sa disocupatzione. Diversos sunt istados is cummentos de is polìticos ogiastrinos pro sa morte sua.

Ispantosu su pàrrere de Paolo Stochino, Assessore comunale de is Traballos Pùblicos de Tortolì: “bos at a pàrrere istranu, bida s’istòria polìtica mia, ma apo semper tentu interessu e curiosidade pro Chavez. Non potzo nàrrere ca deo l’ammiraia, ma m’at semper ispantadu sa personalidade e su determinu suo”.

Prus apassionadu Salvatore Acampora, amministradore de sa Comuna de Lanusè: “Sende deo unu amantiosu de s’Amèrica Latina e de sa libertade, oe is làgrimas falaiant finas in Sardigna. Apo semper istimadu sa fortza sua, su coràgiu suo e s’amore chi issu teniat pro su pòpulu suo e pro sa gente prus mìsera, is prus male tratados e dae sèculos e sèculos de colonialismu. Chie narat chi fiat unu ditadore est unu ignorante de polìtica, pro ite Cheves est semper istadu votadu. Issu at rapresentadu s’ùnicu casu a su mundu a canta unu Presidente est istadu torradu a pònnere a su podere dae su pòpulu chi s’est opostu a su corpu de istadu de sa Dereta. Dae unu puntu de annotu polìticu m’at insingiadu s’amore pro sa pàtria e pro s’indipendèntzia”.

Chavet fiat unu personàgiu ambìguu chi s’est ispiradu a is ideas de Simon Bolivar. Cheriat dare serenidade econòmica a sa pàtria sua e isòrvere is problemas graves de corrutzione”. A ddu nàrrere est Roberto Marceddu, su Sìndigu de Gàiru, chi at sighiu narende: “Fiat amadu e odiadu in su matessi tempus, sa vida sua est istada marcada dae corpos de istadu fallidos, dae pèrdidas edae bìnchidas eletorales, s’ùrtima in su 2009 cando at chircadu de cantzellare su lìmite temporale de su mandadu istitutzionale suo pro pòdere guvernare pro semper. Segundu una visione anti-capitalista e anti-globalizatzione s’est semper opostu a is Istados Unidos e est istadu semper in favore de istados antidemocràticos comente cussu cubanu, cussu iranianu e cussu lìbicu de Gheddafi. Comete a totus is “ditadores” est istadu unu personàgiu egotzèntricu chi de seguru at fatu bene a sa terra sua gherrende sa poberesa, ma at causadu finas peleas, dificultades e problemas. Su lìmite mannu suo est cussu de àere impedidu s’evolutzione democràtica de s’istadu”.

Prenu de significadu su cummentu de Marco Melis, Sìndigu artzanesu: “Bos at a pàrrere de pagu impastu, ma so abarradu ispantadu de comente Chavez siat renèssidu a ghiare unu paisu che a su Venetzuela pro unu muntone de tempus e in su matessi tempus siat renèssidu a crèschere cu cunsensu suo. Sa cosa chi m’at fatu impressione est peri s’amigàntzia chi isse teniat cun su presidente iraniau, cun su cale, mancari cumpartziat unu grandu ispìritu antiamericanu, teniat meda diferèntzias a livellu culturale. Seguru est istadu una figura singulare e ambìgua”.

Dda segat prus in curtzu Giuseppe Mesina, consigieri de sa Provìntzia Ogiastra: “Si est istadu cunfirmadu medas bortas comente presidente bolet nàrrere chi su pòpulu ddu istimaiat a teniat fide in isse!”.

Portale digitale novu in Nugoro pro mezorare s’impittu de sas meighinas.

Unu sistema digitale novu pro conduire menzus sas meighinas e mezorare sa calidade de sas curas gratzias a un’impittu prus attentu de sos datos. Est custu s’intentu de Duttore Digitale, unu portale creadu pro rendere prus fatzile sa tramuda de informatziones intre dittas sanidarias e duttores e pro minimare sos isperdissios in s’ispesa de sas meighinas.

Sa base permittit de controllare e registrare sas retzettas de sos duttores recoglinde e esaminande sos datos supra de sas meighinas.In custa manera donzi duttore podet biere in manera simple e azzorronada comente faghet sas retzettas e cunfrontare sos datos suos cun cussos de s’Asl. Su disignu est bistadu presentadu in Nugoro in su mentres de unu addobiu ordiminzadu dae s’Asl n.3 imparis a sas zuras sotzio sanidarias. Ant partetzipadu duttores de base, de sos pitzinnos e proffessioneris de sos ambulatorios de s’iscrocca.

Su portale permittit a sos duttores de controllare s’attividade insoro dae su puntu de bista de sos costos e de sas cantidades faghinde sas retzettas cun prus attentzione e bidinde si bi sunt errores o cosas chi no andant bene. Intre sas funtziones printzipales bi sunt bilancios personalizzados e sinnos automaticos chi azzuant a cumprendere si bi sunt differentzias in cunfruntu a sos istandard prevedidos, mezorande su controllu de sas retzettas.

Custu sistema est unu primu passu assa parte de un’impittu prus zustu de sas meighinas cun vantazos siada pro sos malaidos chi podent rezire curas menzus, siada pro su sistema sanidariu chi podet minimare sos affianzos chi si podent evitare e impittare menzus sas disponibilidades. Su portale at azzuare fintzas S’Asl a connoschere in presse meda sos problemas in sas retzettas e intervennere in manera lestra pro garantire un’impittu prus siguru e balidu de sas meighinas.

In afficcu istrumentos comente custos podent dare unu contribbudu a rendere sa sanidade semper prus moderna e accanta a sos bisonzos de sos tzittadinos. S’impittu de sos datos, difattis,permittit de leare detzisiones prus scientes e mezorare s’ordiminzassione de sos servitzios e accottare su tribagliu de sos duttores in su controllu de sos malaidos mescamente in sos casos prus cumplicados. Sa digitalizzassione si cunfirmat gai una leva de fundamentu pro fraigare unu sistema sanidariu prus balidu, agguantabile e capatze de apparare curas de calidade a tottus.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22